Фæндзæм сæр

Фæндзæм сæр

Нæ карикатурæ æнæхъæн къуыри газеты ауыгъдæй фæлæууыд, æмæ иумæйаг æмбырдæй æрмæст бон раздæр рацыд ног къулы газет, æмæ уым карикатурæ нал уыди æмæ дзы рауагътой нæ дыууæ уацхъуыды дæр: мæнон дæр æмæ Шишкины уон дæр. Уыди дзы, кæй зæгъын æй хъæуы, æндæр уацхъуыдтæ дæр, æрмæст ныр мæ зæрдыл нал лæууы, цæй тыххæй уыдысты, уый.

Володя нын загъта, неппæт дæр иумæйаг æмбырдмæ нæхи куыд бацæттæ кодтаиккам æмæ алы скъоладзауы ахуырыл дæр куыд æрныхас кодтаиккам, афтæ. Стыр переменæйы нæ нæ звеновой Юрæ Касаткин æрæмбырд кодта æмæ ныхас кæнын райдыдтам, алчи дæр нæ ахуыры куыд æййафы, ууыл. Бирæ ныхасагæй нæм ницы уыдис. Сеппæт дæр æмхъæлæсæй загътой, æз æмæ Шишкин нæ двойкæтæ цыбыр рæстæгмæ куыд сраст кодтаиккам, афтæ.

Мах, кæй зæгъын æй хъæуы, сразы стæм. Цы зæгъæн ис, исты нæхи фæнды, двойкæтæ нын цæмæй уа, уый?

Дыккаг бон нæмуыд къласы иумæйаг æмбырд.

Ольгæ Николаевнæ радзырдта нæ къласы ахуыры æййафындзинады тыххæй. Уый нын радзырдта, къласы чи куыд ахуыр кæны, стæй нæ алкæмæн дæр йæ хъус тынгдæр цæмæ æрдарын хъæуы, уый. Хорз фесты, двойкæтæ кæмæн уыд, канд уыдонæн нæ, фæлæ ма тройкæтæ кæмæн уыд, уыдонæн дæр, уымæн æмæ тройкæтæ чи исы, уымæн æнцонæй æртулæн ис двойкæмæ.

Стæй ма Ольгæ Николаевнæ загъта, дисциплинæ нæм нырма æвзæр у — къласы хъæр кæнут, лæппутæ кæрæдзийæн сусæгæй фæамонынц, зæгъгæ.

Мах дæр райдыдтам дзурын. Ома æрмæст зæгъгæ афтæ кæнын, «мах», зæгъгæ, æцæгæй та æз нæ радзырдтон, уымæн æмæ двойкæимæ мæхи размæ куыд байстаин, мæн хъуыди фæсфæд бадын. Фыццаг раныхас кодта Глеб Скамейкин. Алы фыдбылызы аххос дæр, дам, сусæгæй амонын у. Уый загъта, сусæгæй куы ничи амонид, уæд дисциплинæ уаид хуыздæр, æмæ йæ зæрдæ сусæг амындыл ничи дарид, фæлæ алкæмæ дæр йæхимæ зонд æрцæуид æмæ хуыздæр ахуыр кæнид, зæгъгæ.

— Ныр æз барæй зыгъуыммæ сусæгæй амондзынæн, цæмæй сусæг амындыл йæ зæрдæ мачиуал дара, — загъта Глеб Скамейкин.

— Æмбал афтæ нæ фæкæны, — загъта Вася Ерохин.

— Æмæ сусæгæй æмбал фæцамоны?

— Нæ фæцамоны. Де ’мбал куы нæ ’мбара, уæд ын баххуыс хъæуы, ахуыргæнæг æй куы фæрса, уæд та йын сусæгæй амонын зиан хæссы, — загъта Вася.

— Уый тыххæй цас æмæ цас ныхас уыд! Фæлæ уæддæр сусæгæй амонынц.

— Сусæгæй чи амоны, уыдон хурмæ хæссын хъæуы.

— Куыд сæ хъуамæ хæссæм?

— Къулы газетмæ сыл фыссын хъæуы.

— Раст зæгъыс! — загъта Глеб. — Мах къулы газеты тох кæнын байдайдзыстæм сусæгæй амоныны ныхмæ.

Уый фæстæ радзырдтой фыццаг æмæ дыккаг звеноты лæппутæ. Уыдон загътой, зæгъгæ, тох кæндзысты æппæт къласы кадыл æмæ дзырд радтой, сæ ахуыры иттæг хорз æмæ хорз бæрæггæнæнæй ныллæгдæр кæй нæ исдзысты, уый тыххæй.

Уый фæстæ ныхасы бар райста Ольгæ Николаевнæ æмæ загъта, зæгъгæ, хорз ахуыр кæныны тыххæй кусгæ бон раст адихтæ кæнын хъæуы. Раздæр схуысс æмæ раздæр сыст. Райсомæй зарядкæ скæн, арæхдæр цæуын хъæуы сыгъдæг уæлдæфмæ. Уроктæ кæнын хъæуы, скъолайæ æрбацæуыны хæд фæстæ нæ, фæлæ сахат æмæ æрдæг — дыууæ сахаты фæллад суадзыны фæстæ. (Æз Ликæйæн куыд дзырдтон, раст афтæ). Уроктæ кæнын хъæуы æнæмæнг бонæй. Изæрæй æнафоны ахуыр кæнын зиан у, уымæн æмæ уæдмæ сæры магъз бафæллайы æмæ ахуыр сæрмæ нал фæхизы. Раздæр хъæуы зындæр уроктæ скæнын, уый фæстæ та æнцондæртæ.

Славæ Ведёрников загъта:

— Ольгæ Николаевнæ, скъолайы фæстæ иу — дыууæ сахаты баулæфын хъæуы, уый æмбарын, фæлæ куыд баулæфын хъæуы? Æз нæ зонын æнцад бадын æмæ фæллад уадзын. Афтæ фæллад уадзгæйæ æнкъард кæнын.

— Фæллад уадзын — уый афтæ нæу, æмæ дæ цæнгтæ дæ дæлæртты бакæн æмæ сбад. Ацу æмæ тезгъо кæн, ахъаз, истæмæй дæхи аирхæфс.

— Футболæй хъазæн дæр ис? — бафарстон æз.

— Футболæй хъазгæйæ адæймаг тынг хорз баулæфы, — загъта Ольгæ Николаевнæ, — æрмæст æнæхъæн бон хъазын нæ хъæуы. Иу сахат куы ахъазай, уæд хорз баулæфдзынæ æмæ ахуыр дæр хуыздæр кæндзынæ.

— Æмæ тагъд уарынджын рæстæг байдайдзæн, — загъта Шишкин, — æмæ футболæй хъазæн фæз сцъыф уыдзæн. Æмæ ма уæд кæм хъаздзыстæм?

— Тæрсгæ ма кæнут, лæппутæ, — дзуапп радта Володя. — Тагъд скъолайы спорты зал срæвдз кæндзыстæм æмæ дзы суанг зымæг дæр баскетболæй хъазæн уыдзæн.

— Баскетболæй! — сцин кодта Шишкин. — Гъе уый хъуыддаг у, гъе! Нæ фехъуыстон ма зæгъут, æз уыдзынæн командæйы капитан! Æз ма иу хатт уыдтæн баскетболон командæйы капитан, æцæг зæгъын!

— Ды уал раздæр уырыссаг æвзагæй иннæты баййаф, — загъта Володя.

— Æмæ мæн цы хоныс? Æз ницы... Баййафдзынæн сæ, — -загъта Шишкин.

Ууыл иумæйаг æмбырд фæци.

— Ехх, лæппутæ, нæ сарæхстыстут! — загъта Володя, иууылдæр куы ацыдысты, не звенойæ фæстæмæ, уæд.

— Цæмæ? — фæрсæм æй мах.

— Куыд цæмæ! Сымах дзырд радтат, двойкæтæ уын куыд нал уа, афтæ ахуыр кæныны тыххæй. Иннæ звенотæ та иууылдæр дзырд радтой æрмæст четвёркæтыл æмæ пятёркæтыл ахуыр кæныны тыххæй.

— Æмæ мах иннæтæй цæмæй фыддæр стæм? — загъта Лёня Астафьев. — Кæд уыдоны бон у, четвёркæйæ ныллæгдæр бæрæггæнæн куыд нæ исой, афтæ ахуыр кæнын, уæд мах бон цæуылнæ у?

— Æмæ куыннæ! — загъта Ваня Пахомов. — Махæй ницæмæй хуыздæр сты.

— Лæппутæ, цæй æмæ мах дæр гъе афтæ бакæнæм, — дзуры Вася Ерохин. — Æцæгæй уын зæгъын, ахуыры цыппарæй ныллæгдæр бæрæггæнæн нæ райсдзынæн. Мах иннæтæй æвзæрдæр не стæм.

Уалынмæ мæнмæ дæр бахъардта.

— Раст у! Мах лæппутæ æвзæрдæр ницæмæй сты. Ахъуыды ма кæнут: нæ звено иууылдæр ахуыр кæнынц хорз, цыппарæй дæлæмæ дзы никæмæн ис! Мæн дæр нæ фæнды фæсте уæвын. Æз дæр дзырд дæттын! Ныронг куыд æмбæлд, афтæ нæ ахуыр кодтон, ныр байдайдзынæн, фендзыстут. Мæнæн, зонут, райдайын у зын!

— Райдайдзынæ-иу, стæй-иу кæудзынæ æмæ-иу ууыл фæуыдзынæ, — загъта Шишкин.

— Æмæ уæдæ дæу нæ фæнды? — бафарста йæ Володя.

— Æз мæ ныфс нæ хæссын четвёркæтæм, — загъта Шишкин. — Ома иннæ предметтæй мæ ныфс хæссын, фæлæ уырыссаг æвзагæй мæ бон бауыдзæн æрмæст тройкæтæ исын.

— Ды та ма уый цы ми кæныс! — загъта Юрæ. — Æнæхъæн кълас иуырдæм, ды та иннæрдæм! Бакæсут-ма амæ, цы зондаби у!

— Омæ мын цы кæнын кæнут? Уырыссаг æвзагæй мын тройкæйæ хуыздæр бæрæггæнæн никуы уыдис. Тройкæ дæр мын хорз у.

— Байхъус-ма, Шишкин, цæуылнæ разы кæныс? — загъта Володя. — Иу хатт дзырд куы радтай, ахуыры æппæт предметтæй дæр четвёркæйæ дæлдæр нæ исдзынæн, зæгъгæ.

— Кæд радтон дзырд?

— Мæнæ ай дæ уацхъуыд нæу къулы газеты? — бафарста йæ Володя æмæ равдыста, дзырд кæй радтам, уый кæм фыст уыд, уыцы газет.

— Растзæгъыс! — загъта Шишкин. — Мæнæй та рох дæр фæци.

— Гъы, ныр та ма цы зæгъыс, дзырд дæттыс?

— Цы гæнæн ис, фæуæд хорз, ныр дзырд дæттын, — сразы ис Шишкин.

— Ура! — ныхъхъæр кодтой лæппутæ. — Лæг дæ, лæг, Шишкин! Нæ нæ фæхудинаг кодтай! Ныр неппæт дæр иумæ тох кæндзыстæм нæ къласы кадыл.

Фæлæ уæддæр Шишкины зæрдæмæ нæ цыд æмæ йæ нæхимæ цæугæйæ мемæ дзурын дæр нæ фæндыд: мæсты мæм кодта, къулы газетмæ йын уацхъуыд кæй ныффыссын кодтон, ууыл.

⇐ Предыдущая 1 2 3 456 7 8 9 10 Следующая ⇒