МÆ МАДЫЗÆНÆГ ХО ДИБÆХАН!

Дзасохты М.С. «Дæллаг Ир» / Дзасохов М.С. «Нижний Ир»

Рауагъдад «Ир» (г. Дзæуджыхъæу) / Издательство «Ир» (г. Владикавказ). 2007 г.

ISBN 5-7534-0357-3

Оцифровка — dziglo

dziglo2013@yandex.ru

Проза Музафера Дзасохова изначально автобиографична. В книгу, выход которой приурочен к 70-летию со дня рождения писателя, помимо романа «Нижний Ир» вошли также рассказы и миниатюры о природе.

Дзасохты Музафер

ДÆЛЛАГ ИР

МÆ МАДЫЗÆНÆГ ХО ДИБÆХАН!

Дæумæ дзурын мæнг дунейæ æцæг дунемæ: ацы чиныгæй дæ ном ардзынæн, зæгъгæ дын зæрдæ куы бавæрдтон, уæд кæдæм батагъд кодтай? Цæуылнæ банхъæлмæ кастæ йæ рацыдмæ? Æви дæм мæрдты бæстæйы дæр æнхъæлмæгæсджытæ уыди?

Нæ фыд дæ нæ базондзæни, ды дæр æй нæ базондзынæ, уымæн æмæ кæрæдзийы никуы федтат, фæлæ дын æй Вéринкæ бацамондзæн, æмæ-иу ыл бацин кæн. Дæ фыд дæн, зæгъгæ дын куы зæгъа, уæд-иу æй дæ хъæбысы акæн. Мæн тыххæй дæр. Райæйы тыххæй дæр. Мах дæм, зæгъ, уæлæуыл бирæ фенхъæлмæ кастыстæм, фæлæ куы нæ зындтæ, уæд дæм æз мæ хо æмæ ме ’фсымæры разæй фæдæн...

Веринкæйы хъæбысæй дæр сывæллонæй фæхицæн дæ, æмæ дыл сабийы узæлд куы кæна, уæд-иу дæм диссаг ма фæкæсæд: рæвдауынæй дæ кæй нæ бафсæст, уый тыххæй афтæ кæндзæн.

Ноджыдæр ма дæм иу хатт дзурын: Дибæхан, ацы чиныгæй арын дæ рухс ном. Цалынмæ цæрон, уæдмæ мын стъалыйау æрттивдзæн...

Дæу мысгæйæ йæ зæрдæйы саутæ чи никуы сисдзæн, дæ уыцы æфсымæр

12 3 4 5 6 7 8 9 10 Следующая ⇒