Тема. У-ү тартынҡы өндәре.

⇐ ПредыдущаяСтр 44 из 44

43-сө дәрес.

Тема. У-ү тартынҡы өндәре.

Маҡсат: У-ү өн-хәрефтәрен үҙләштереү, фонематик ишетеү һәләттәрен һәм телмәр үҫтереү.

I.Ойоштороу моменты.

- Китапты мин яратам,

Ташламайым, йыртмайым.

Беләм, сөнки һәр китап

Минең яҡшы дуҫҡайым. (Хор менән ҡабатлау).

II.Дәрес барышы. Өн-хәреф анализ-синтезы менән [у-ү] тартынҡы өндәрен үҙләштереү.

- «Рәүилә ҡауын ашай».

- Һөйләмдә нисә һүҙ?

- Беренсе һүҙҙә нисә ижек?

- Икенсе ижектә ниндәй өндәр?

- «Рә-үи-лә» - [ү] өнө ижек яһамай, тимәк ул тартынҡы.

- Ниндәй тартынҡы? (Яңғырау).

- «Ҡа-уын» - [у] өнө ижек яһамай, тимәк ул да тартынҡы. Ниндәй? (Яңғырау).

III. Тыңлау һәм өндө айырыу өсөн шиғырҙар. У һәм ү тартынҡы өндәр булған һүҙҙәрҙе табыу, өндәрҙең урынын билдәләү.

1.Берәү һөйләй, икәү тыңлай.

Икеһе ҡарап тора. (Ауыҙ, ҡолаҡтар, күҙҙәр).

2. Әминәнең тубы икәү,

Сәлимәнең тубы икәү.

Йә, әйт әле һин, иркәм,

Ике ҡыҙҙа туп нисәү?

3.Дүртәү.

-Берәү, икәү, өсәү, дүртәү –

Гөлдәрегеҙ күп икән.

Береһе ҡыҙыл, береһе һары,

Ә икәүһе күк икән.

-Берәү, икәү, өсәү, дүртәү –

Гөлдәребеҙ аҙ ғына.

Уларын да дүртәүләшеп

Ултыртҡайныҡ яҙ ғына.

Берәү, икәү, өсәү, дүртәү –

Беҙгә килеп йөрөгөҙ.

Ситтән берәү, икәү, өсәү,

Дүртенсеһе өйөбөҙ.

- Берәү, икәү, өсәү, дүртәү-

Өйөгөҙҙө табығыҙ.

Йә ҡыҙыл гөл, йә һары гөл

Һеҙгә алып барабыҙ. (Г. Юнысова).

4.Берәү, икәү, өсәү, дүртәү,

Бишәү, алтау, ун ике.

Ун икенең араһында

Иң матуры минеке.

IV.Был өндәр менән һүҙҙәр уйлау.

- Был өндәр менән үҙегеҙ ниндәй һүҙҙәр уйлай алаһығыҙ?

Ау, тау, ҡыу, быу, һыу, бау, быу, шыу, һауа, дауа, ҡыуа, шыуа, быуа, ҡаяу, таяу, буяу, ҡойоу, тойоу, берәү, икәү, өсәү, дүртәү, бишәү, алтау, етәү, унау.

V.Физкультминутка.

Аяҡтарҙы йүгертәбеҙ,

Ҡулдарыбыҙ сәпәкләй.

Баштарҙы беҙ борғолайбыҙ,

Ҡулдарҙы ла күтәрәбеҙ,

Аҙаҡ аҫҡа төшөрәбеҙ.

Әйләнәбеҙ тыпырлап:

Тыпыр-тыпыр, тып-тып.

Ҡулдарыбыҙ сәпәкләй:

Сәпәк-сәпәк, сәп-сәп.

Аҙаҡ тағы йүгерәбеҙ

Һәм урынға ултырабыҙ.

VI.Хәрефте иҫтә ҡалдырыу өсөн күнегеүҙәр.

1.Киҫмә хәрефтәр менән һүҙҙәр төҙөү: ҡауын, ҡаяу, буяу, таяу,китеү, ҡайтыу, барыу, һ.б.

2.Баҫма хәрефтәр менән хәрефтәр, ижектәр, һүҙҙәр яҙыу: йырлау, һөйләү, бейеү, күреү, китеү, килеү, һ.б.

3.Үтелгән хәрефтәрҙе печатлау:Уу Үү.

4.Дәреслекте, таблицаны уҡыу.

5.Дәресте йомғаҡлау.

Йөкмәткеһе.

1-се дәрес. Тема. Әлифба – беренсе дәреслегебеҙ. Бәйләнешле телмәр, һөйләм төҙөлөшө, һүҙ составы, өндәр һәм хәрефтәр менән танышыу.

2-се дәрес. Тема. Аа өн-хәрефтәре. Ҡыр йәнлектәре.

3-сө дәрес. Әә өн-хәрефтәре. Йорт хайуандары

4-се дәрес. Оо өн-хәрефтәре. Ҡыр ҡоштары.

5-се дәрес. Өө өн-хәрефтәре. Йорт ҡоштары.

6-сы дәрес. Уу өн-хәрефтәре. Умарталыҡта.

7-се дәрес. Үү өн-хәрефтәре.

8-се дәрес. Лл өн-хәрефтәре. Танышыу, телефондан һөйләшеү.

9-сы дәрес. Мм өн-хәрефтәре. Мышы.

10-сы дәрес. Нн өн-хәрефтәре. Нефть – ҡаҙылма байлыҡ.

11-се дәрес. Йй өн-хәрефтәре. Йәйен.

12-се дәрес. Тт өн-хәрефтәре. Тейен.

13-сө дәрес. Ии өн-хәрефтәре.Ишембай ҡалаһы.

14-се дәрес. Бб өн-хәрефтәре. Беҙҙең йылға.

15-се дәрес. Ыы өн-хәрефтәре. Ыласындар.

16-сы дәрес. Сс өн-хәрефтәре. Сәй.

17-се дәрес. Шш өн-хәрефтәре. Шыршы турғайҙары.

18-се дәрес. Кк өн-хәрефтәре. Күбәләктәр.

19-сы дәрес. Ҡҡ өн-хәрефтәре. Ҡуян.

20-се дәрес. Рр өн-хәрефтәре. Урал тауҙары ҡаҙылма байлыҡтары.

21-се дәрес. Һһ өн-хәрефтәре. Һеләүһен.

22-се дәрес. Ҫҫ өн-хәрефтәре. Һайыҫҡан.

23-сө дәрес. Пп өн-хәрефтәре. Терпе.

24-се дәрес. [Э] өнө, Ээ-е хәрефтәре.

25-се дәрес. Ңң өн-хәрефтәре. Һин беләһеңме?

26-сы дәрес. Ғғ өн-хәрефтәре. Ҡарағат.

27-се дәрес. Гг өн-хәрефтәре. Гөлйемеш.

28-се дәрес. Ҙҙ өн-хәрефтәре. Көҙ буяуҙары.

29-сы дәрес. Зз өн-хәрефтәре. Әхмәтзәки Вәлиди.

30-сы дәрес. Дд өн-хәрефтәре. Дөйә.

31-се дәрес. Вв өн-хәрефтәре. Вертолёт.

32-сы дәрес. Фф өн-хәрефтәре. Фил.

33-сө дәрес. Хх өн-хәрефтәре. Хәйләкәр төлкө.

34-се дәрес. Жж өн-хәрефтәре. Жираф.

35-се дәрес. Цц өн-хәрефтәре. Цирк.

36-сы дәрес. Чч өн-хәрефтәре.

37-се дәрес. Щщ өн-хәрефтәре. Щи.

38-се дәрес. Яя хәрефтәре. Янғантау.

39-сы дәрес. Ее хәрефтәре. Ерек ағасы.

40-сы дәрес. Юю хәрефтәре.

41-се дәрес. Ёё хәрефтәре. Самолёт.

42-се дәрес. ь һәм ъ хәрефтәре.

43-сө дәрес. У-ү тартынҡы өндәре.

Ҡулланылған әҙәбиәт.

1. Аҙнабаева Ф.Г. Тылсымлы өндәр, Өфө, БМКИ, 2004.

2. Аслаев Т.Х. Уйнат, уйлат баланы, Өфө, Китап, 1993.

3.Әлифба Ф.Ш.Сынбулатова, Өфө, Китап, 1999.

4. Ғәлләмов А.А. Әлифба, Өфө, Китап, 1999.

5. Ғәләүетдинов И.Ғ. Балалар фольклоры, Өфө, Китап, 1994.

6. Ф. Ғөбәйҙуллина. Физкультминуткалар. Журнал «Башҡортостан уҡытыусыһы» №6, 2004.

7. Ш. Иҙрисов. Йәнле хәрефтәр. Журнал «Башҡортостан уҡытыусыһы»

8. Б. Мөлөков. Йәнле хәрефтәр. Журнал «Башҡортостан уҡытыусыһы»

9. Салихова М.Т. Башҡорт теленән диктанттар йыйынтығы, Өфө, Китап, 1997.

10. М. Свириденко. Физкультминуттар. Журнал «Башҡортостан уҡытыусыһы», №3, 2002.

11. Шарапов И.А. Йомаҡлы әлифба, Өфө, Китап, 1996.

12. Г. Юнысова. Бәпембә. Өфө, Китап.

13. Янышева З.И. Уҡыу күнекмәһен үҫтереү. Журнал «Башҡортостан уҡытыусыһы», №1, 1998.

I категориялы башланғыс синыфтар уҡытыусыһы Вәғиҙә Рауил ҡыҙы Кужагильдина.

БР Хәйбулла районы Ивановка ауылы Утарбай урамы, 48

телефон: 834758-23605. Паспорт 8004 663822, Хайб РОВД, выдан 26.06.2003

Соцномер 024800681207, СНИЛС 026-862-55169

⇐ Предыдущая 35 36 37 38 39 40 41 42 4344