СЫРДОН УÆЙГУЫТЫ КУЫД АСАЙДТА

СЫРДОН УÆЙГУЫТЫ КУЫД АСАЙДТА

Иу бон дын Сырдон нарты ныхасмæ рацыд. Кæсы, æмæ уынджы иу лæг дæр нæй, æрмæст дзы сывæллæттæ хъазынц. Уæд Сырдон уыдоны бафарста:

— Нарт цы фесты?

Иу лæппу йæ размæ бауад æмæ йын загъта:

— Ма мæ-иу схъæр кæн, фæлæ нарт дæ сусæгæй балцы ацыдысты.

Аздæхт фæстæмæ йæ хæдзармæ Сырдон, йæхи барæвдзытæ кодта æмæ нарты фæд-фæд балцы араст и. Æртæ боны фæцыди æмæ иу сау хъæдмæ бахæццæ. Куыддæр «мæ фæллад суадзон», зæгъгæ, загъта, афтæ дын кæсы æмæ æрдузы æртæ уæйыджы кæрæдзи нæмынц. Сырдон сæ йæхи нæуынæг скодта æмæ сæ рæзты фæцæйцыд. Уыдон уæддæр сæ над нæ ныууагътой, æмæ сæм уæд нал фæлæууыд:

— Байриат, къобор уæйгуытæ! Уый цы ми кæнут, кæрæдзи цæмæн нæмут? Худинаг уын нæу?

Уæйгуытæ йын дзуапп раттой:

— Бæргæ нæ нæмиккам кæрæдзи, фæлæ нæ бон байуарын нæу.

— Æмæ уын цы уаринаг ис? Кæд уæ, мыййаг, æз бафидауын кæнин, — загъта Сырдон æмæ æрлæууыд.

Уæйгуытæ та йын загътой:

— Ис нæм махмæ æртæ зынаргъ дзаумайы — æрчъиаг, фынг æмæ бæндæн. Æрчъиаг хуымæтæджы æрчъиаг нæу — абад ыл æмæ дæ кæдæм фæнда, уырдæм фæхæццæ кæндзæн. Нæ фынгмæ дæр диссаджы миниуæг ис — нымæтын ехсæй йæ æрцæв, æмæ алыхуызон дзæбæх хæринæгтæй айдзаг вæййы. Уæдæ нæ бæндæн та хæрз æмбисонд у: цасфæнды мулк дзы æрбабæтт, — рогæн сæ сисдзынæ.

Фæхъуыста сæм Сырдон, стæй сæм дзуры:

— Кæд мæ коммæ бакæсат, уæд уæ æз бафидауын кæндзынæн, алчидæр уæ йæхион айсдзæни. Æриут мын фæйнæ фаты. Æз сæ фæйнæрдæм фехсдзынæн. Раздæр уæ йæ фат мæ размæ чи æрбахæсса, уымæн фыццаг равзарыны бар. Дыккагæн та дыккаг — бар, чи ма дзы баззайа, уый та — æртыккагæн.

Уайтагъд сразы сты уæйгуытæ Сырдоны ныхасыл. Ратта сæ алчидæр фат Сырдонмæ. Уый сæ алырдæмты фехста æмæ дзуры:

— Тагъддæр уайгæут сæ фæстæ!

Азгъордтой уæйгуытæ сæ фæтты фæстæ, æзфæраздæронæй фæстæмæ æрбаздæхæм, зæгъгæ.

Сырдон райста бæндæн æмæ фынг, сбадти æрчъиагыл æмæ йæм дзуры:

— Нæ уæлхæдзармæ мæ фæхæццæ кæн.

Куыддæр уыцы ныхас йæ дзыхæй схауд, афтæ сæ уæлхæдзар фестади.

Скодта Сырдон куывд. Æрæвæрдта йæ диссаджы фынг, æрцавта йæ нымæтын ехсæй æмæ æнæхъæн къуыри хорз фæуыдта нарты.

Федтой нарт, Сырдон амалджын у, уый æмæ йæ уæдæй фæстæмæ æдзухдæр семæ балцы кодтой.

⇐ Предыдущая 23 24 25 26 272829 30 31 32 Следующая ⇒