Главная

Контакты

Случайная статья

• Автоматизация
• Антропология
• Археология
• Архитектура
• Биология
• Ботаника
• Бухгалтерия
• Военная наука
• Генетика
• География
• Геология
• Демография
• Деревообработка
• Журналистика
• Зоология
• Изобретательство
• Информатика
• Искусство
• История
• Кинематография
• Компьютеризация
• Косметика
• Кулинария
• Культура
• Лексикология
• Лингвистика
• Литература
• Логика
• Маркетинг
• Математика
• Материаловедение
• Медицина
• Менеджмент
• Металлургия
• Метрология
• Механика
• Музыка
• Науковедение
• Образование
• Охрана Труда
• Педагогика
• Полиграфия
• Политология
• Право
• Предпринимательство
• Приборостроение
• Программирование
• Производство
• Промышленность
• Психология
• Радиосвязь
• Религия
• Риторика
• Социология
• Спорт
• Стандартизация
• Статистика
• Строительство
• Технологии
• Торговля
• Транспорт
• Фармакология
• Физика
• Физиология
• Философия
• Финансы
• Химия
• Хозяйство
• Черчение
• Экология
• Экономика
• Электроника
• Электротехника
• Энергетика

СЫРДОН НАРТЫ ÆХСÆН КУЫД ÆРЦАРДИ

СЫРДОН НАРТЫ ÆХСÆН КУЫД ÆРЦАРДИ

Йæ сывæллоны бонтæ Сырдон арвыста йæ мадимæ, Донбеттырты бæстæйы. Куы бахъомыл ис, уæд æй Дзерассæ нарты æхсæнмæ æрвитын райдыдта. Рацыдис-иу Сырдон Донбеттырты бæстæйæ æмæ-иу нарты ныхасы нартимæ йæхи ирхæфста. Нарт дис кодтой лæппуйыл æмæ сæ кæрæдзийæн дзырдтой:

— Ацы лæппу цæсгомæй нæхи хуызæн бæргæ у, фæлæ йæм дæлимонтæй цыдæр хæццæ кæны.

Стæй нарт Сырдонæн йæхи бафарстой:

— Радзур нын, Сырдон: чи дæ, цы дæ, кæцæй нæм фæзындтæ?

Сырдон цы загътаид, уый нæ зыдта æмæ фæстæмæ йæ мад Дзерассæмæ аздæхт.

— Нарт мæ фæрсынц — чи дæн, цы дæн. Æмæ сын цы дзуапп раттон?

Дзерассæ йын бацамыдта:

— Зæгъ сын, æз дæр, зæгъ, сымах хуызæн нартæй дæн. Æрмæст-иу сын ма схъæр кæн, æз дæ мад дæн, уый. Куы нæ йæ базоной, уæд дын нарты хæрæфырт чызджы усæн ратдзынæн. Уазæгуаты мæм ис æмæ мæм арæхдæр цу.

Сырдон радзырдта нартæн уыцы ныхæстæ. Нарт ыл нæ баууæндыдысты, сæхицæй тæнтъихæгдæр уыд, æмæ йыл худтысты. Сырдон уæддæр нарты ныхасмæ цыд æмæ сын фыддæрагæн митæ кодта. Кæй-иу мæсты скодта, кæйты та-иу кæрæдзийыл сардыдта. Нарт Сырдоны се ’хсæнмæ нал уагътой. Æмæ уæд зæххы бын хæдзар скодта. Æвæдза, сæ маст дзы райсынмæ хъавынц нарт, зæгъгæ, уæд-иу зæххы бын йæ хæдзары фæаууон. Йæ хæдзар та йын зонгæ ничи кодта.

Иухатт, дын, Сырдон уыди ныхасы. Уыцы афон цуанæй æрбаздæхт Сослан æмæ йемæ æрбакодта æвæджиау хорз куыдз. Ныхасы бадæг нарт куыдзæй æппæлыдысты. Æхсæвы Сослан йæ кæрты бабаста куыдзы. Адæм иууылдæр куы бафынæй сты, уæд Сырдон Сосланы кæртмæ бахъуызыд. Стæй бавдæлд æмæ куыдзы адавта. Æркодта йæ йæ хæдзармæ, цыдæр хинтæ æмæ кæлæнтæ йын бадардта. Куыдз хæдзарыл афтæ иузæрдион сси, æмæ-иу бон кæмфæнды дæр куы фæзылди, уæддæр ын æхсæвы хæдзармæ æнæ æрцæугæ нæ уыд.

Сосланы бæргæ фæндыд куыдзы фæстæмæ йæ хæдзармæ æрбакæнын, фæлæ ма уый, марадз-зæгъай, æмæ лæгмæ хæстæг цæуа — уайтагъд дзы-иу дардмæ алыгъди. Бамбæрста Сослан, йæ куыдз ын Сырдон кæй адавта, уый, фæлæ цы бакодтаид — йæ хæдзар кæм уыд, уый нæдæр Сослан, нæдæр æндæр исчи зыдта. Æмæ йæ куыдзы раздахынæн йæ бон ницы баци.

Гъе афтæ Сырдон æрцарди нарты æхсæн, йæ цæрæнбынат та йын зонгæ ничи кодта.