AElig;ВДАДЗЫ ХОС

ÆВДАДЗЫ ХОС

Иу фæндаггон тынг бафæллад, фырæххормагæй йæхиуыл нал хæцыд, — йæ дзыппы иунæг сау суари дæр нæ уыди. Цæуы, цæуы æмæ, фыццагдæр цы хæдзармæ бахæццæ, уый дуар бахоста. Ракастис æм иу сылгоймаг. Уæд ын фæндаггон афтæ зæгъы:

— Сыдæй мæлын. Æхца мæм нæй, фæлæ мæ бон цы уа, уымæй дын бафиддзынæн дæ хорздзинад. Æз зонын ахæм æвдадзы хос, йæ удисæг адæймаджы дæр адзалæй чи фервæзын кæндзæн. Абоны онг æз уыцы сусæгдзинад никæмæн ма радзырдтон. Æмæ, мыййаг, куы амæлон, уæд æй ничи зондзæн. Бафсад мæ, æмæ дын æй зæгъдзынæн.

Сылгоймагæн бирæ лæгъстæтæ нæ бахъуыди. Уайтагъд ын фынг ацарæзта. Уазæг йæхи хорз куы федта, уæд ын фысым йæ разы æрæвæрдта ручкæ, гæххæтт æмæ йын афтæ зæгъы:

— Ныффысс дæ хосы рецепт!

— О! Уый тынг зынаргъ хос у, — дзуапп радта фæндаггон. — Фæлæ йæ фыссын ницæмæн хъæуы, афтæ дын æй радзурдзынæн, йе та мемæ цом, æмæ йæ дæхи цæстытæй фенай.

Уазæг æмæ фысым хæдзарæй рацыдысты æмæ фæндагыл фæраст сты. Уазæг цыди æнæ дзургæйæ, æмæ сылгоймаг мæты бацыди, ай цы хабар у, зæгъгæ.

— Бирæ ма нæ хъæуы? — афарста уый.

— Иучысыл ма, æмæ уæд фендзынæ уыцы хос, æз дын йæ рецепт дæхи дыууæ къухмæ ратдзынæн.

Уалынмæ бахæццæ сты пырындзы хуымтæм. Фæндаггон иу æфсир ратыдта æмæ йæ сылгоймагмæ бадардта.

— Мæнæ дын, цы æвдадзы хосы тыххæй дзырдтон, уый. Ай у адæмы ирвæзынгæнæг. Пырындз нæ уæвгæйæ, уæд мæ афонмæ мæрдты стæгдар дæр нал уаид.

Сылгоймаг хорзау нал фæци. Уый цыдæр диссаг фенын æнхъæл уыд, уынгæ та фæкодта хуымæтæджы пырындз. Æмæ пырындзы хуымтæм кæсгæйæ баззад, цыма сæ фыццаг хатт федта, уыйау.

Фæндаггон йæ ныхас дарддæр кодта:

— Раст нæ зæгъын? Ацы хос бирæты фервæзын кодта адзалæй. Архай ууыл, цæмæй дæм ахæм хос фылдæр уа.

Мæгуыр лæг сылгоймагæн йæ сæрæй ныллæг акуывта æмæ араст дарддæр.

⇐ Предыдущая 9 10 11 12 131415 16 17 18 Следующая ⇒