Кондак 5

Кондак 5

Боготечно бысть странствие твое ко граду Киеву, яко первее тамо хотел еси в церквах Божиих Господу помолитися и Богоматере Печерстей в Лавре Ея Успения поклонитися, за исцеление благодарно хвалу воспети песнию: Аллилуиа.

Икос 5

Видя скорби велия, постигшия землю Киевскую от нахождения поганых, начало положи подвигом своим, град Чернигов и стезю ко граду Киеву свобождая и врагов веры христианския истребляя, да людие, тобою свобождении, вопиют: Радуйся, меч духовный, иже есть глагол Божий, восприявый; радуйся, копием веры нечестивых прободивый. Радуйся, палицею благочестия неверных одолевый; радуйся, шлемом целомудрия от стрел вражиих сохранивыйся. Радуйся, бронею добродетелей ся преодевый; радуйся, во всеоружии духовном со врагом ратоборствовавый. Радуйся, преподобне отче Илие, земли Русския славный заступниче.

Кондак 6

Проповедник могуществ Бога Христианского явился еси, Илие, рати иноплеменнныя вся возмогий побеждати о укрепляющем тя Иисусе, христиане же, свобождении тобою, не преставаху звати: Аллилуиа.

Икос 6

Возсия тогда звезда светозарная во граде Киеве, Илие прехвальне, на устрашение нечестивых, жестокосердых на попрание; земли Русстей на прославление Богом данный, идеже сродницы твои доселе тя величают:

Радуйся, войска русскаго предводителю; радуйся, сиротам и вдовицам охранителю, Радуйся, Великому князю верное вспоможение; радуйся, градовом и весем надежная стено. Радуйся, силы вражия благодатное одоление; радуйся, народа православного возвышение. Радуйся, преподобне отче Илие, земли Русския славный заступниче.

Кондак 7

Хотяще о всея души и сердца Богу поработати и Руси Святей, помысл тщеславный отвергл еси, егда тя нецыи тщахуся воеводою града Чернигова поставити, со смирением на службу ко князю киевскому поступил еси, да не токмо единому граду, но всему народу службу сослужиши, яко тому невозбранно пети Богу: Аллилуиа.

⇐ Предыдущая 1 234 5 6 Следующая ⇒