Тропарь, глас 3:. Величание. Акафист. преподобному Илье Муромскому,. Киево-Печерскому чудотворцу. Кондак 1

Тропарь, глас 3:

Яко от рождения во мнозех летех немощствуя слежай, терпение стяжал еси пребезмерное. Сего ради Бог исцеление ти даровав, воздвиг тя на подвиги ратныя и земля Русская защитника позна тя великого. До конца же смиренномудрен явился еси, во всечестную обитель Богородицы притекши, подъял еси подвиги иноческия. Темже и от Христа нетлением увенчан быв, преподобне отче Илие. Буди граду твоему Мурому покров, Отечеству и людем твоим заступление.

Кондак, гл. 6:

Времена скорбей претерпевающее, люди русстии молят тя, преподобне: не остави нас предстательствы твоими, в терпении содевающих спасение душ наших.

Величание

Ублажаем тя, преподобне отче Илие, и чтем святую память твою, наставниче монахов и собеседниче ангелов.

Акафист

преподобному Илье Муромскому,

Киево-Печерскому чудотворцу

Кондак 1

Воеводе сил земли Русския, воину Царя Христа и заступнику Руси Святой, славному во бранех и неодолимому в ратех, дивному чудотворцу Илии Муромцу песнь хвалебную воспоем, да заступит и ныне нас, зовущих: Радуйся, преподобне отче Илие, земли Русския славный заступниче.

Икос 1

Ангелов Творец, егда во рабии зраце на землю сниде, до тридесятьлетнего возраста не являше Себе миру, тако и тя, святе Илие, сподоби до тогожде возрасту никомуже ведома бытии и телеснее недвижиму, да послежде послужиши Господеви и людем Его со всяким усердием и ревностию, ихже мы восхваляем: Радуйся, промышлением Божиим тридесять лет премудро хранимый; радуйся от рождения избранный, да явятся на тебе дела Господня. Радуйся, через недуг свой соблазнов юности многих избегший; радуйся, душу чисту чрез страдания соблюдший. Радуйся, сими на приятие благодати ю уготовавый; радуйся, болезни, яко дар Божий, с покорностию терпевый. Радуйся, преподобне отче Илие, земли Русския славный заступниче.

Кондак 2

Виде внезапу святый Илия явльшихся ему триех мужей-странников, просящих у него воды испити, Отвеща им: «Аз напоил бых вас, обаче не имам хождения ногама моима, и накормил бых такожде, обаче рукама моима не имам владения», темже старцы трищи повелеша ему на нозе стати и послужити има, скочив же тогда Илия на нозе свои, возопи Богу: Аллилуиа.

Икос 2

Разумев Илия, яко исцеле внезапу от недуга своего, первее крест, по писанному, на себе положи, последи же странников напои, они же такожде даша ему чашу пития медвяна, рекоша испити до дна сию, той же, повинуяся им, сотвори сие. Мы же, грешнии, дивящееся, зовем: Радуйся, яко премудрых триех странник Господь посла ти; радуйся, яко Троица Святая возлюби тя. Радуйся, исцелевый по словеси Господню; радуйся, от одра воздвигнутый волею Божиею. Радуйся, чашу, яко от руки Спасителевы испивый; радуйся, напоенный благодатию Христовою. Радуйся, преподобне отче Илие, земли Русския славный заступниче.

12 3 4 5 6 Следующая ⇒