Кондак 13. Кондак 1. Молитва

Кондак 13

О великий святителю Димитрие, прими сие похвальное пение, и избави нас от всякаго зла твоим к Богу ходатайством воспевающих: Аллилуйя.

(Этот кондак читается трижды, а потом икос 1 и кондак 1 )

Икос 1

Ангел нравом, аще и человек естеством был еси, святителю Димитрие: незлобием бо души твоея, кротостию и милостию привлекл еси Благодать Всесвятаго Духа, и явился еси Его обиталищем: темже мы благодарящее Бога, прославившаго в земли нашей таковаго Святителя, воспеваем тебе сице:

Радуйся, незлобием твоим Агнца прореченнаго Исайем подражавый.

Радуйся, кротости христианския пример собою показавый.

Радуйся, милосердием своим нищия препитавый.

Радуйся, сердоболием утешивый страждущия.

Радуйся, к подвластным тебе всегда бывый отцем чадолюбивым.

Радуйся, Димитрие, великий чудотворче.

Кондак 1

Избранному чудотворцу и угоднику Христову Димитрю составим похвалы, яко заступнику нашему и теплому о нас молитвеннику: ты же имеяй дерзновение ко Господу, преклонися милостивне к зовущим ти: Радуйся, Димитрие великий чудотворче.

Молитва

О всеблаженный святителю Димитрие, великий угодниче Христов, златоусте Российский, услыши нас грешных молящихся тебе, и принеси молитву нашу к милостивому и человеколюбцу Богу, емуже ты ныне в радости святых и с ликами Ангел предстоиши: умоли его благоутробие, да не осудит нас по беззакониям нашим, но да сотворит с нами по милости своей, испроси нам от Христа и Бога нашего мирное и безмятежное житие, здравие душевное и телесное, земли благоплодие, и в всем всякое изобилие и благоденствие, и да не во зло обратим благая, даруемая нам от щедраго Бога, но в славу Его и в прославление твоего заступления, даруй нам богоугодно прейти поприще временныя жизни: избави нас воздушных мытарств и настави нас на путь ведущий в селения праведных, идеже празднующих глас непрестанный, зрящих Божия лица неизреченную доброту: Церковь же святую от расколов и ересей сохрани, верных укрепи, заблуждающих обрати, и всем даруй вся, яже ко спасению и славе Божией подобающая: Отечество твое сохрани от врагов ненаветно: но поборай оружию крестоноснаго воинства, и подаждь нам всем твое Архипастырское и святое благословение, да оным осеняеми, избавимся от козней лукаваго, и избегнем от всякия беды и напасти. Услыши моление наше, отче Димитрие, и моли непрестанно о нас Всесильнаго Бога, славимаго и покланяемаго во триех ипостасех, емуже подобает всякая слава, честь и держава, во веки веков, аминь!

⇐ Предыдущая 1 2 34