Кондак 3. Кондак 4. Кондак 5. Кондак 6. Кондак 7. Кондак 8. Кондак 9. Кондак 10

Кондак 3

Силою Благодати Божия еще во временной жизни приял еси власть, святителе Димитрие, бесы изгоняти и недуги исцеляти; по смерти же твоей наипаче прослави тебе Всемогущий Бог многими чудотворениями, да вси зрящее сие, непрестанно воспевают Богу: Аллилуйя.

Икос 3

Имея неусыпное попечение о спасении душ, вверенных от Бога, святителю Димитрие, непрестанно наставлял еси паству твою к душеспасительной жизни, подавая собою пример совершенства христианскаго: исправив неленостно таковый подвиг, прими от нашего усердия похвалы сицевыя:

Радуйся, вместилище добродетелей.

Радуйся, святыни жилище.

Радуйся, мечу, пороки посецающий.

Радуйся, светило, путь правый указующее.

Радуйся, луна приемлющая свет свой от Христа Солнца правды.

Радуйся, звездо, сияющая во тме сущим.

Радуйся, Димитрие великий чудотворче.

Кондак 4

Буря недоумения смущает мя, Святителю Димитрие, како достойно могу возглаголати величие твоя; но ты яко благ и милосерд, воззри не на достоинство творения сего, но на усердное мое произволение, и научи мя грешнаго, како подобает душею ощущати славословие Божие, и пети: Аллилуйя.

Икос 4

Слышаша суемудреннии раскольницы твое о них изобличение, еже ты, болезнуя о заблуждении их сердечном, написал еси, возпламенишася гневом и яростию: но ты, яко твердый адамант не изменился еси под ударами злобы и ненависти, и радя о славе Божией паче любве человеческия, непрестанно укорял оных зверонравных чад, терзающих утробу своея матерее: сего ради вопием ти:

Радуйся, златоустаго ревнителю.

Радуйся, Церкви Христовы поборниче.

Радуйся, златословесными устами Небесныя истины вещаяй.

Радуйся, земныя почести ни во что вменяяй.

Радуйся, пастырю добрый, ограждаяй свое стадо от волков губителей.

Радуйся, манною Божественнаго учения своя овцы питаяй.

Радуйся, Димитрие великий чудотворче.

Кондак 5

Боготечная звезда явился еси в течении твоем, еже ты совершал еси, свое спасении устрояя, и примером своим душы верных назидая, вопиющих усердно к Богу: Аллилуйя.

Икос 5

Видевше Ангельстии чинове еще во временной жизни твоей подвиги твоя и воздержное житие твое, прославляху Человеколюбца Бога, подкрепляющаго немощное человеческое естество: мы же ублажаем тя похвалами сими:

Радуйся, усердный Божий служителю.

Радуйся, Ангелов сожителю.

Радуйся, преподобных собеседниче.

Радуйся, святителей удобрение.

Радуйся, монахов и постников наставниче.

Радуйся, всех верных несомненное прибежище.

Радуйся, Димитрие великий чудотворче.

Кондак 6

Проповедует Россия вся величия Божия, на тебе показанная, святителю Димитрие, яко всем просящим тя подаеши в болезнех исцеление, в бедах избавление и во всех нуждах скорое вспомоществование: сего ради немолчно воспеваем Благодетелю Богу нашему: Аллилуйя.

Икос 6

Возсия в душе твоей блистающий свет истиннаго боговедения, освящая души верных, с сладостию внимающих учению твоему, и похваляющих тя сице:

Радуйся, органе Духа Всесвятаго.

Радуйся, тимпане, услаждающий благочестивых чувства.

Радуйся, златокованная труба, враги устрашающая.

Радуйся, свирель утешающая овцы, тобою пасомыя.

Радуйся, архиерею великий.

Радуйся, пастырю предобрый.

Радуйся, Димитрие великий чудотворче.

Кондак 7

Хотя достойным образом совершити подвиг, возложенный на тя от Бога, первее укреплял еси свою душу прочитанием жития Святых, предполагал себе подражание онех: таже почувствовал пользу из того проистекающую, не обленился еси бытии списателем жизни тех, с нимиже ныне в невечернем свете сладко воспеваеши Богу: Аллилуйя.

Икос 7

Новаго тя Николая Мир Ликийскаго и Златоуста Цареградскаго видим, святителю Димитрий: овый бо ария беснующагося от собора Отцев отгнал есть: ов же Церковь Божию сладкословесными учении украсил есть: ты же еретичествующих расколников обличил еси, и верных списаньми твоими и Богодухновенным учением уцеломудрил еси: услыши убо нас, вопиющих таковая:

Радуйся, православия ревнителю.

Радуйся, расколов искоренителю.

Радуйся, светило благочестия.

Радуйся пламеню, пожигаяй нечестие.

Радуйся, росо, угобжающая сердца верных.

Радуйся, громе, поражающий злочестивых.

Радуйся, Димитрие, великий чудотворче.

Кондак 8

Странно видети неверующим Божией силе, како в мертвенном челе и тленнем возможно было тебе, святителю Христов, непреткновенно проходити Ангельское житие: мы же благодаря о сем милосердаго Бога любовию сердечною взываем: Аллилуйя.

Икос 8

Весь и всего себе покорив воле Божией, и вся вещественная и тленная вменив уметы бытии, душею и сердцем возжелал еси наслаждатися Божиим лицезрением: таковое благое твое произволение увенчав Всещедрый Человеколюбец Своею благодатию, повелевает нам воспевати тя сице:

Радуйся, яко Богу совершенно угодил еси.

Радуйся, яко венец безсмертныя жизни получил еси.

Радуйся, наслаждаяся райския сладости.

Радуйся, насыщаяся Божия благости.

Радуйся, верных учителю и наставниче.

Радуйся, прибегающим к тебе теплый заступниче.

Радуйся, Димитрие великий чудотворче.

Кондак 9

Всякия беды, скорби и напасти избавляй нас святителе Димитрие, твоими к Богу теплыми молитвами, и даруй нам и временная благая и вечное блаженство получити, да с тобою купно в селении праведных воспоем Богу: Аллилуйя.

Икос 9

Витийство человеческое не возможет изрещи довольно, коликую благодать получил еси, святе Димитрие, от Бога, Егоже ты усердно возлюбил еси: но мы любовию побеждаеми, дерзаем воспети тебе похвалы таковыя:

Радуйся, больных исцеление.

Радуйся, немощных подкрепление.

Радуйся, скорбных и печальных утешение.

Радуйся, страждущих скорая помоще.

Радуйся, неимущим богатство источаяй.

Радуйся, всем просящим скорую помощь подаваяй.

Радуйся, Димитрие великий чудотворче.

Кондак 10

Спасти хотя твою душу, нерадил еси о твоей плоти: но паче измождил еси ю постом, бдением, молитвами и всяким удручением, да возможеши неленостно возсылати к Богу теплые молитвы, поя: Аллилуйя.

⇐ Предыдущая 123 4 Следующая ⇒