Келин кыска ада-иезинден чагыг-йөрээл

⇐ ПредыдущаяСтр 6 из 6

Келин кыска ада-иезинден чагыг-йөрээл

Арыг шынчы ынакшылдан төрүттүнгеш,

Ада-ие бедик атты биске шаңнап,

Бир-ле дугаар ажы-төлге ынакшылды

Билиндирген күзээнивис уруувус сен.

Чуртталгавыс частып үнген чечээ болуп,

Кежик-чолдуг чаяаттынган кызывыска

Черге чедир мөгейбишаан четтирген деп,

Катап-катап ада-иең сөглеп чор бис!

Чоокта чаа-ла хензиг бичии турдуң ышкаш,

Келин болуп өскениң-даа билдиртпеди.

Чүрээң-биле шилип алган эргимиңниң

Коданынче эргин артап чоруп тур сен.

Келин болуп барган аалың каазы болуп,

Кежээ, топтуг болуруң-на күзээл, кызым!

Болбас тенек аажы-чаңың көргүспейин

Бээ-кунчууң чагыг-сөзүн дыңна, кызым!

Ада-иең алдар-адын баскыратпайн
Ажыл-ишчи болуп-ла көр күжүр, уруум!
Адар даңда эрте туруп, буян дилеп
Аяк-шайың үстүн чажып чаңчык, кызым!

Улуг уйгу, улуг тура хүндү болбас!
Ону черле боданып чор, ынак төлүм!

Улуг угаан, биче сеткил сени каастаар
Оон өске артык чүүлдүң херээ-даа чок.

Ужуп үнген, өскен-төрээн аалыңны

Утпайн сактып, өйлеп-өйлеп эргип каап чор!

Азырап каан ада-иең ынакшылы
Алдынга-даа орнаттынмас эртине-дир.

Уруувус сээ ынаавыс-даа кызыгаар чок
Ууттунмас аас-кежиивис чүгле сенде
Чоргааралдан сеткиливис хей-аът кирип,

Чүс-даа чылда сеңээ бараан болуул, кызым!

Аас-кежик, амыр-кадык сээңии болзун!
Күзелдериң чайгаар бүдүп боттанзын-на!

Кежик-чолдуг чуртталгаңның узун оруу

Арыг-чаагай каалама болзун, кызым!

Келин болур кыстың авазындан уруу,

күдээзинге йөрээл

Танышпасты таныштырган төлдеримниң

Чорук-херээ аайлажып турзун дээштиң

Чурттувуска аал немээн аас-кежиин

Төрээн ие алгап-мактап, йөрээп тур мен!

Чагда бүүрек чаңгыс кызым дилеп кээрге,

Чагыг-сөске байырымны согажалап,

Чүлдү-чүрээм ханызындан сөглексээним

Чагыым берейн таптыг дыңна,

чассыг кызым!

Кижээ барган келин кыстың

сагып чоруур

Кылыр-кылбас сагылгазын сагындырып,

Бердингениң ынак эжиң хүндүлээриң

Бирги черде турар дээрзин чагыыйн,

кызым!

Чүрээң-биле шилип алган ынак эжиң
«Ажы-төлүм адазы!» деп, чассыткылап
Арыг-шынчы ынакшылың илередип,
Чуртталгада үнелеп чор, хүндүлеп чор!

Аъш-чемниң чаагайын мурнун орта
Делгеп салып, ишти-хырнын тоттуруп чор!

Ажы-төлүң адазынга чоргаарланып

Даянгыыжың ол-дур дээрзин медереп чор!

Хүрегенден улуг дилээм, чагыым болза,
Хинде тудуш ажы-төлүң чаяакчызы
Хүнчүгеш дег ынак эжиң үне бодап,
Хирге-чамга дээспезиң дилээр-дир мен!

Келин, күдээ адыңарны бедик тудуп,
Ажыл-ишчи болуруңар күзээр-дир мен!
Кады демниг найыралдыг болуруңар
Аас-кежик чуртталгаңар дөзү ол-дур.

Чуртталганы кады чурттаар күзелиңер
Чүүлдүгзүнүп кудашкылар деткип тур бис!

Куда-байыр, доюңарны дүжүрерин

Кудашкылар аравыста дугуржур бис.

Амыдырал делгеминче үдеп чоруй
Алгап-мактап, йөрээливис сала бээр бис.
Арыг-шынчы ынакшылды ыдыкшыдып,
Араңарда эптиг-демниг болуруңар
Ада-ие бисти чүгле өөртүр дээрзин
Аныяктар билириңер күзенчиг-дир.

Автору:Тюлюш Шеңне Алдын-ооловна,

Кызыл хоорайның № 38 уруглар

садының кижизидикчи башкызы,

мөөрейниң 1-ги чергениң тиилекчизи

ДОПЧУЗУ:

I. Чаа төрүттүнген чаш төлге ураскааткан йөрээлдер «Чаш төлге йөрээл» – Игнатьева Чодураа «Оол уруг төрүттүнгенде йѳрээл» – Шончалай Сат «Дойга йөрээл»-Шеңне Тюлюш
II. Үш харлаан чаш төлге тураскааткан йөрээлдер «Үш харлаан хеймер оглумнуң хылбык-доюнга ак йөрээлим» - Лилия Куулар. «Хылбык байырлалынга йѳрээлдер»-Айдыслана Сундуй «Хылбык дойга кырган-аваның йөрээли- Тюлюш Шеңне
III. Кудага хамаарышкан йөрээлдер «Чавага ёзулалының йөрээлдери»- Мурат Ондар «Оолдуң талазындан кудаларның йөрээл сөстери»- Мурат Ондар «Кудаларга белек сунар ёзулалдың йөрээлдери»- Мурат Ондар «Келин кыстың даай-авазындан йөрээл»- Шеңне Тюлюш «Келин кыска ада-иезинден чагыг-йөрээл»- Шеңне Тюлюш «Келин болур кыстың авазын-дан уруу, күдээзинге йөрээл»- Шеңне Тюлюш

Министерство культуры Республики Тыва

Республиканский центр народного

творчества и досуга

Союз ведущих Республики Тыва

«Прекрасный праздник семьи»: Сборник лучших работ по итогам Республиканского конкурса среди ведущих семейных праздников, самодеятельных поэтов и прозаиков в рамках реализации Государственной антиалкогольнойй программы Республики Тыва.- Кызыл: КЦО «Аныяк», 2020 –26 с.

Издание предназначено для широкого круга читателей.

Издание к выпуску подготовили:

Начальник отдела культурно-досуговой деятельности и народного творчества Урана Намгай-оол,

специалисты отдела медиа и информационного сопровождения Республиканского центра народного творчества и досуга:

художественное оформление – Владлен Саая, вёрстка – Диана Монгуш.

При перепечатке благопожеланий, сценариев ссылка на издание обязательна.

Редакция не несёт ответственности за нарушение авторских прав и приведённые стихи, песни и цитаты.

⇐ Предыдущая 1 2 3 4 56