Хылбык дойга кырган-аваның йөрээли

Хылбык дойга кырган-аваның йөрээли

Төк кээп дүжүп төрүттүнген хүнүнден бээр

Үш хар чедип харны немээн уйнуумга
Үш-ле харлаан өөрүнчүг хүнүнде
Төлүмге мен байырымны чедирейн.

Бажын чыттап, эргеледип ханмазым
Бичии чиирбей, эрге-чассыг уйнуумга
Эки чүүлдер эктин ажып доктаазын!
Элег-түрег, доткар-моондак турбазын!

Эргим ынак ада-иең чоргаары
Эзир куш дег хостуг чоргаар бол, уйнуум!

Аас- кежик, буян-чолдуң ээзи бооп
Амыр-кадык, сүлдең бедик-ле болзун!

Алызында төлептиглер бирээзи
Арат-чонга хүндүткелдиг үрен бол!
Сайын-Белек адың чайгаар бадыткап
Содак кедер түрлүг-сүрлүг мөге бол!

Суму, кожуун, хоорайларга шүглүп каар

Сураглыг дээн күчүтен бооп өс, уйнуум!
Ак орук чайгаар сеңээ ажык бооп,

Алгап-мактаан йөрээл сөзүм доктаазын!

Экер-эрес, шоваа чаңныг сергекпей
Эргелиг чаш уйнуум менди өс-ле, өс!
Белек кылдыр уйнуумга мен бызааны
Бай- байлак чурттазын дээш айыттым.

Кодан сыңмас тос чүзүн малдыг бооп,
Кырыыр назын чедир чуртта, чоргаарбай!

Автору:Тюлюш Шеңне Алдын-ооловна,

Кызыл хоорайның № 38 уруглар

садының кижизидикчи башкызы,

мөөрейниң 1-ги чергениң тиилекчизи.

III. Кудага хамаарышкан йөрээлдер

Чавага ёзулалының йөрээлдери

(игил үделгези-биле чомчуурга тааржыр)

Ада-иең чырык черге сени чаяаш

Аадып-чайгап ѳпейлиинден ѳстүрүп каан,

Эжиң-ѳѳрүң, тѳрелдериң аразынга

Ээлдек чаңныг, чараш кыс бооп ѳзүп келдиң, чараш кенним!

Эки хүнде оглум сени эскерип каан

Эки хүнде оглумну сен ээ кѳрдүң,

Эргелиг чаш азырап каан оглум чүве

Эктин орта бажың салгаш чассып чору,

эргим кенним!

Ийи боттуң чүректери деңге сокса

Ийи боттуң холдары-ла салдынмаза,

Ындынналган чүрээңерни хорувайын

Ынак мен деп сѳглежип-ле чоруңарам,

ынак кенним!

Улуг чуртка чоргаар ѳзүп, мени ѳѳртүр

Уйнуктарым эргим ынак авазы бол,

Ада-иең мурнун орта сѳзүм берейн

Аваң ышкаш иең боор мен, эжиң боор мен,

күжүр кенним!

Ам бо хүнде кенним болдуң, чараш кызым

Аас-кежиимни чүге деңнээйн, кудаларым!

Чажыңны мен ийи чара ѳрүп берейн

Чараш кенним, чассыг кенним, ынак кенним!