Кано́н пра́здника, со ирмосо́м на 8, глас 1.

Пе́снь 5.

Кано́н пра́здника, со ирмосо́м на 8, глас 1.

Ирмо́с: Бо́жию и неизрече́нную добро́ту/ доброде́телей Твои́х, Христе́ испове́м:/ от Присносу́щныя бо сла́вы/ Соприсносу́щное и Ипоста́сное возсия́вый Сия́ние,/ из де́вственныя утро́бы/ су́щим во тьме́ и се́ни, вопло́щся,/ возсия́л еси́ Со́лнце.

Я́ко на о́блаце, Де́во, апо́стольский лик носи́мь,/ к Сио́ну от коне́ц служи́ти Тебе́, О́блаку ле́гкому, собира́шеся:/ от нея́же Вы́шний Бог су́щим во тьме́ и се́ни Пра́ведное возсия́ Со́лнце.

Труб богоприя́тнии язы́цы богосло́вных муже́й благогла́снейше Богоро́дице вопия́ху,/ исхо́дную возглаша́юще пе́снь Ду́хом:/ ра́дуйся, нетле́нный Исто́чниче/ Бо́жия живонача́льнаго и спаси́тельнаго всем воплоще́ния.

Ин кано́н святы́х на 4, глас 8.

Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.

Разделе́ния не подъя́т Боже́ственная дво́ица му́ченик самобра́тная:/ Неразде́льней бо Святе́й Тро́ице ве́ровавше еди́ною наде́ждою,/ разделе́нием пре́лести безме́стныя содержи́мыя совокупи́ благода́тию.

И́стины ве́рвию, оско́рдом же Боже́ственнаго ра́зума/ окамене́нныя мы́сли благоче́стно, страда́льцы, истеса́вше,/ хра́мы Тро́ице пресла́вны Боже́ственною ве́рою соде́ласте, си́лою Ду́ха.

Кореносека́тели зло́бы вся́кия яви́стеся, му́ченицы сла́внии,/ сади́тели же вся́каго благоче́стия и словесы́ и вещьми́:/ изра́стший цвет Иессе́ев от ко́рене Боже́ственнаго в непроходи́мых сердца́х насади́сте.

Богоро́дичен: Пре́жде всех век, Де́во, сокрове́ное вели́кое та́инство,/ е́же не уве́дено бы́сть ро́дом пе́рвым, Всенепоро́чная,/ Тобо́ю яви́ся Сло́во О́тчее Преве́чное, вопло́щся и быв Челове́к.

⇐ Предыдущая 1 2 3 4 567 8 9 10 Следующая ⇒