Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́// в сердца́ нас, пою́щих Тя.

Песнь 3

Соверша́я стра́шная, Кодра́те, чудеса́,/ неве́рных в ве́ру Боже́ственную приве́л еси́,/ я́ко апо́стол богоприя́тен, я́ко че́стен иера́рх, свяще́ннейше.

Боже́ственными уче́нии мно́гия просвети́л еси́,/ Све́та бо слуга́ яви́лся еси́, просвети́вшаго концы́,/ священнонача́льниче Кодра́те, боже́ственными сия́ньми.

Велича́йших благи́х хода́тай был еси́ па́стве,/ изыма́я сию́ тьмы неве́дения/ и просвеща́я ту пресла́вных чуде́с показа́ньми.

Богородичен: Всели́ся в Тя Огнь нестерпи́мый,/ не опали́в утро́бы Твоея́, Богоро́дице,/ и попали́ стра́сти на́ша, и ти́ну пре́лести испепели́.

Ин

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Исцеле́ния соверша́я призыва́нием Христо́вым, преподо́бне,/ от ле́сти вра́жия спасл еси́/ град и лю́ди Бо́жиею благода́тию.

Храм сый Бо́жий,/ и́дольская ка́пища, му́чениче, низве́ргл еси́,/ Вседе́тельную Си́лу́ име́я Помо́щника и Содействи́теля.

Во́инство ви́дено бысть, Фо́ко, а́нгельское/ и свет Бо́жий безме́рный,/ пред суди́тельными тя престо́лы Го́споду прославля́ющу.

Богоро́дичен: Из Тебе́ Бог воплоти́вся,/ за благоутро́бие челове́ком соедини́ся и кля́тву разруши́,/ еди́на Всеблагослове́нная Влады́чице.

Конда́к священному́ченика, глас 6. Подо́бен: Еже о нас:

Яко архиере́й принося́, о́тче, же́ртвы,/ на коне́ц себе́ прине́сл еси́ же́ртву живу́ю,/ свиде́тельствовав зако́нно о Христе́ Бо́зе,/ от А́нгел укрепля́емь и смерть изволя́я,/ сый с вопию́щими тебе́:// прииди́, Фо́ко, с на́ми, и никто́же на ны.

И́кос:

Жи́зни на Небесе́х жела́ющии, сла́дость на земли́ попира́юще,/ устне́ очи́стим и язы́ки уясни́м на пе́ния и благохвале́ния,/ я́ко да исплете́м досто́йно Фо́ке иера́рху./ До Небе́сных бо врат вшед,/ невозбра́нно обре́те во вну́тренняя ше́ствие/ и зрит жела́емаго, от А́нгелов сла́вимаго,/ отту́ду бо и мо́жет нам уми́лостивити Еди́наго благосе́рдаго душе́вным неду́гом,/ я́ко свиде́тельствовав о Нем./ Воспева́ем у́бо ему́ и вопие́м:/ призира́я на ны, прииди́, Фо́ко, с на́ми, и никто́же на ны.

Седа́лен апо́стола, глас 3. Подо́бен: Красоте́ де́вства:

Красне́йшаго добро́тою су́ща па́че сыно́в челове́ческих,/ Сло́во Пребезнача́льное, воплоще́нное па́че ума́, Кодра́те, пропове́дал еси́,/ тем просвети́л еси́ во тьме су́щия,/ свет язы́ком быв я́ко иера́рх боже́ствен./ Тем твое́ светоно́сное торжество́ ве́рою соверша́юще, пое́м тя.

Сла́ва, му́ченика, глас 1. Подо́бен: Гроб Твой:

Яко му́ченик и па́стырь свяще́нно просла́вился еси́,/ кро́вию оде́жду свяще́нства обагри́в светле́йше,/ и Го́споду предстои́ши./ Тем днесь Бо́жия Це́рковь пра́зднует пресла́вную твою́ па́мять,/ Фо́ко всеблаже́нне.

И ны́не, Богоро́дичен:

Наде́ждо христиа́н, Пресвята́я Де́во,/ Его́же родила́ еси́ Бо́га па́че ума́ и сло́ва,/ непреста́нно моли́ с вы́шними Си́лами,/ да́ти оставле́ние грехо́в нам всем и исправле́ние жития́,/ ве́рою и любо́вию при́сно Тя прославля́ющим.

Крестобогоро́дичен:

Ви́дящи Тя, Христе́, Всенепоро́чная Ма́ти/ ме́ртва на Кресте́ распросте́рта, вопия́ше:/ Сы́не мой, Собезнача́льне Отцу́ и Ду́ху,/ что неизрече́нное строе́ние сие́,/ и́мже спасл еси́ пречи́стых Твои́х рук, Ще́дре, созда́ние?

⇐ Предыдущая 1 2 3 4 567 8 9 Следующая ⇒