Кано́н Богоро́дице со ирмосо́м на 6 и свята́го два кано́на на 8.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Блаже́н муж, боя́йся Го́спода,/ в за́поведех Его́ восхо́щет зело́. Вся́кое дыха́ние: Евангелие от Матфе́я, зача́ло 43.

По 50-м псалме́ стихи́ра, глас 6:

Це́ркве новоявле́нная заря́/ и мона́шествующих богови́дный учи́тель,/ Никоди́м Богоприи́мный,/ лу́чший соверши́в путь доброде́тели,/ к Небе́сным селе́нием возше́л есть,/ честну́ю же его́ па́мять пра́зднующим/ оте́ческая благослове́ния подае́т/ и всем испра́шивает ве́лию ми́лость.

Кано́н Богоро́дице со ирмосо́м на 6 и свята́го два кано́на на 8.

Кано́н Богоро́дице, еге́же краегране́сие: Ра́дуйся, ра́дости на́шея вина́, Де́во. Мона́ха Гера́сима. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Ми́лостей сокро́вище и неистощи́мое мо́ре, Госпоже́,/ ка́плю позна́ния и мне одожди́,/ да со Ангелом, ра́дуйся, вопию́ Ти трубо́ю пе́сненною.

Кля́твы упраздне́ние, ра́дуйся, Богоневе́стная Госпоже́,/ ми́ра искупле́ние, ра́дуйся, Всенепоро́чная,/ источи́вшая Жизнь ве́чную и ад умертви́вшая Рождество́м Твои́м, ра́дуйся.

Ра́дуйся, Пречи́стая, оте́ческия си́лы пала́то,/ ра́дуйся, хра́ме нескве́рный Сотво́ршаго вся́ческая,/ ра́дуйся, черто́же пресве́тлый Сла́вы Боже́ственнаго воплоще́ния.

Ра́дуйся, Неискусобра́чная,/ Жезл прозя́бшая, всея́ тва́ри Насади́теля,/ ра́дуйся, виногра́де, израсти́вый Ро́ждие кра́сное,/ вино́ источа́ющее ра́зума.

Кано́н пе́рвый свята́го, его́же краегране́сие: Свята́го Никоди́ма воспева́ю. Творе́ние мона́ха Гера́сима. Глас и ирмо́с то́йже.

Песнь 1

Тро́ице Единосу́щная, о́тче, Сы́не, Ду́ше Святы́й,/ прему́дрость пода́ждь ми, да воспою́ све́тло/ просла́вльшаго словесы́, и уче́нии, и де́лы Тя, Го́споди, свята́го Никоди́ма.

Ум Небе́сный, мирохрани́тельница Ду́ха,/ Боже́ственный Никоди́м всех зове́т нас ле́тную па́мять его́ соверши́ти./ Прии́дем у́бо вси, сего́ чту́ще.

Умертви́в по́мысл пло́ти твое́й, Никоди́ме,/ ху́ждшее, о́тче, покори́л еси́ лу́чшему по́двигом любому́дрия Боже́ственнаго/ и яви́лся еси́ благода́ти сосу́д многоце́нный.

Богоро́дичен: Си́лу, и утвержде́ние, и просвеще́ние стяжа́в Твои́м, Госпоже́, благоволе́нием,/ Боже́ственный Никоди́м, богодухнове́н и весь богоно́сен,/ после́дним в ле́тех яви́ся на Афо́не.

⇐ Предыдущая 1 2 3 456 7 8 9 10 Следующая ⇒