Стих: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Стих: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Словесы́ твои́ми,/ ме́рилом то́чным,/ богате́юще к стяжа́нию лу́чшаго,/ воспева́ем твое́ Боже́ственное,/ Богому́дре, превосхо́дство.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Град мона́шествующих/ свяще́нную твою́ па́мять,/ Никоди́ме, пра́зднует,/ уче́нии твои́ми/ непреста́нно просвеща́яся.

Сла́ва, Тро́ичен, глас и подо́бен то́йже:

Усты́ благочести́выми/ пра́во богосло́вя Тя,/ Трисо́лнечное Божество́,/ Никоди́м Боже́ственный/ сла́вы Твоея́ сподо́бися.

И ны́не, Богоро́дичен:

Пе́сньми сладча́йшими/ песносло́вя Тя, Де́во,/ Никоди́м Боже́ственный/ духо́вно Ти вопия́ше:/ ра́дуйся, Де́во Чи́стая.

Ны́не отпуща́еши: трисвято́е. Отпусти́тельный тропа́рь из вели́кия вече́рни. И отпу́ст.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н.

На Го́споди, воззва́х: стихи́ры на 6, глас 4. Подо́бен: Я́ко до́бля:

Благода́ти селе́ние, истолкова́теля богодухнове́ннаго,/ Святы́м Ду́хом води́маго,/ сла́ву Бо́жию неизрече́нную/ и жития́ невеще́ственныя да́ры,/ богодухнове́нную трубу́, возвеща́ющую в ми́ре сло́во благода́ти,/ воспои́м досто́йно богоглаго́ливаго Никоди́ма.

Просвети́вый Ду́хом Боже́ственным се́рдце, Никоди́ме,/ уче́ний мо́ре Це́ркви из уст твои́х источи́л еси́,/ и ея́ ни́вы оби́льно ороси́л еси́/ сло́вом да́нныя ти, о́тче, благода́ти,/ я́коже глаго́лет Дави́д,/ и ра́дуеши со́нмы благочести́вых му́дростию твое́ю.

Я́коже свети́ло новосве́тлое, воспева́ем тя,/ озаря́ющаго Це́рковь Боже́ственными словесы́ твои́ми,/ я́коже благоче́стия учи́теля,/ я́ко уста́ богому́драя доброде́телей чудоде́йственных,/ я́коже пропове́дника жития́ лу́чшаго/ и кифа́ру¹ пе́сней сладча́йших,/ соверша́юще всесвяту́ю па́мять твою́, Никоди́ме.

И́ны стихи́ры, глас 8. Подо́бен: О, пресла́внаго чудесе́:

Благода́ть оби́льная Ду́ха Пресвята́го, му́дре,/ в ду́шу твою́ всели́вшаяся,/ сию́ предочи́стивши доброде́телей воздая́нии,/ сосу́д Боже́ственный тя соде́ла/ и глаго́л богодухнове́ннейший./ О, всему́драя твоя́ поуче́ния, Никоди́ме,/ и́миже при́сно вси науча́емся/ к жи́зни лу́чшей.

То́ки уче́ний источи́л еси́,/ я́коже исто́чник слове́сный,/ па́че ме́да услажда́ющия ве́рных сердца́, Никоди́ме,/ зна́нии и дея́нии яви́ся/ сокро́вищница вся́кия му́дрости/ и казна́ Боже́ственных облиста́ний,/ подава́я исправле́ние всем,/ благоче́стно уче́нию твоему́, о́тче, после́дующим.

Сла́ва, глас 4:

Днесь нам возсия́, я́ко свети́ло у́треннее,/ преподо́бнаго учи́теля па́мять, Никоди́ма небомы́сленнаго,/ Це́рковь озаря́ющи./ Прииди́те у́бо, слове́с его́ ревни́телие,/ в ду́се и и́стине пра́зднуим, к нему́ вопию́ще:/ ра́дуйся, доброде́тельным житие́м/ селе́ние Свята́го Ду́ха ум соде́лавый,/ ра́дуйся, сокро́вищнице богодухнове́нная,/ в не́йже многоразли́чныя му́дрости сокро́вища неистощи́мая,/ ра́дуйся, На́ксии Боже́ственная о́трасле,/ святоиме́нное Горы́ украше́ние/ и всея́ Це́ркве наста́вниче Богому́дрый./ Предста́тельствуй, мо́лимся, о́тче, о душа́х на́ших.

И ны́не, Богоро́дичен: Кто Тебе́ не ублажи́т:

Вход. Проки́мен дне и чте́ния три преподо́бническая (зри день 5-й).

На лити́и стихи́ры самогла́сны. Глас 1:

Ра́дуйся о Го́споде, сла́вный Афо́не,/ избра́нный Богома́тере уде́ле,/ се бо, я́ко простры́йся до Небе́с столп све́та,/ в тебе́ явля́ется Богому́дрый Никоди́м,/ и́же му́дростию богоприя́тный и в доброде́телех богови́дный,/ жи́тельством бо непоро́чным/ и́же Го́рняго дыха́ния све́тлость насле́дова/ и, повсю́ду лучи́ дарова́ний испуска́я,/ на дела́ Све́та наставля́ет во умиле́нии Бо́гу вопию́щих:/ Го́споди, сла́ва Тебе́.

Глас 2: Подви́жнически пожи́в,/ ху́ждшее лу́чшему покори́л еси́,/ и с Бо́гом соедини́лся еси́, Никоди́ме,/ при́сно теку́щею моли́твою,/ и от блаже́ннаго сего́ сою́за/ Боже́ственному а́бие научи́лся еси́,/ и, по Па́влу Боже́ственному, глаго́лы неизрече́нныя слы́шал еси́/ и письмены́ изложи́л еси́,/ я́же трудо́м навы́кл еси́;/ сего́ ра́ди, я́ко свет Боже́ственный,/ словеса́ твоя́ от восто́к со́лнца до за́пад/ сия́ют к просвеще́нию вопию́щих:/ Го́споди, сла́ва Тебе́.

Глас 3: Любому́дрие источа́я,/ богосло́вия яви́лся еси́ орга́н/ и жития́ духо́внаго тайнопи́сец всеизря́днейший,/ я́коже бо сотвори́в, учи́ши,/ и сло́во кра́ткое, е́же у отце́в, я́коже глаго́лет Иса́ия,/ многообра́зно раскрыва́еши си́лою сло́ва де́йственнаго/ и богодарова́нныя му́дрости красото́ю, многому́дре Никоди́ме,/ Боже́ственная бо благода́ть усты́ твои́ми излия́ся/ и кни́жника тя всего́ неизрече́ннаго яви́/ во спасе́ние зову́щих:/ Го́споди, сла́ва Тебе́.

Глас 4: Я́ко кри́ны ве́шнии Ду́ха,/ арома́т жи́зни, от Еде́ма исходя́щий,/ источа́ют твоя́ богодухнове́нныя кни́ги, всеблаже́нне Никоди́ме,/ благоуха́ние бо Христо́во яви́ся чи́стым житие́м твои́м,/ и страсте́й злово́ние отгоня́еши многоцве́тием слове́с твои́х,/ я́коже бо сосу́ди арома́тов,/ уста́ твоя́ писа́нии наполня́ют нас оби́льно,/ позна́ние доброде́телей подаю́ще/ и Боже́ственных догма́тов акриви́ю² во спасе́ние зову́щих:/ Го́споди, сла́ва Тебе́.

Сла́ва, глас 4:

И́же в преподо́бных мудре́йшаго/ и в учи́телех преподо́бнаго, Никоди́ма вели́каго,/ благогове́йных мно́жества, по до́лгу да ублажи́м,/ освяти́вся бо по́двигом, уста́ Уте́шителя бысть,/ и в Це́ркви дави́дски испо́лненней Боже́ственную в та́йне му́дрость возгласи́,/ е́юже правосла́вных ду́ши воспита́/ Го́рняя разуме́ти и иска́ти,/ на еретико́в же со́нмища возгреме́,/ по всей бо земли́ изы́де глас его́/ во сла́ву Христа́ Бо́га и Спа́са душ на́ших.

И ны́не, Богоро́дичен:

От вся́ких бед рабы́ Твоя́ сохрани́,/ Благослове́нная Богоро́дице,/ да Тя просла́вим, упова́ние душ на́ших.

На стихо́вне стихи́ры, глас 5. Подо́бен: Ра́дуйся, подви́жников:

Ра́дуйся, мона́хов добро́то,/ о́строва На́ксии изря́дная о́трасле,/ Афо́на благоукраше́ние,/ све́тлое о́ко, язы́че сладча́йший/ и богоглаго́ливый о Ду́се Боже́ственнем,/ глаго́ля и напису́я поуче́ния,/ Небе́сных веща́ний непристу́пных смысл всем изъясня́я/ и ум отверза́я созерца́ний неизглаго́ланных/ в широту́ позна́ния лу́чшаго,/ Никоди́ме о́тче,/ сокро́вищнице одушевле́нная разуме́ния богода́ннаго.

⇐ Предыдущая 123 4 5 6 7 8 9 10 Следующая ⇒