Ин кано́н проро́ка, глас 8.

Ин кано́н проро́ка, глас 8.

Ирмо́с: Ты еси́ утвержде́ние/ притека́ющих к Тебе́, Го́споди,! Ты еси́ Свет омраче́нных,/ и пое́т Тя дух мой.

Язы́к твой трость Боже́ственнаго Ду́ха бысть,/ и́мже нам бу́дущих яви́л еси́ сбытие́.

Ты Преве́чнаго, плоть бы́вша, показа́л еси́ в Вифлее́ме,/ Кня́зя всех, и Спа́са, и Наста́вника.

Таи́нник изве́стен су́щим па́че ума́ нам был еси́,/ проро́ческими, сла́вне проро́че, просвеще́ньми озаря́емь.

Богоро́дичен: Гора́ явле́ннейша Ты была́ еси́, Пречи́стая,/ на ню́же возше́д, Госпо́дь яви́ся,/ к НЕ́йже ны́не прибега́ем.

Седа́лен, глас 1. Подо́бен: Гроб Твой, Спа́се:

Ду́хом, му́дре, просве́щся Святы́м,/ проре́кл еси́ я́ве бу́дущих ра́зум,/ уясни́в неудобопости́жная, о Михе́е пребога́те:/ изы́дет бо от Вифлее́ма Князь и Вождь,/ И́же упасе́т лю́ди Своя́, Христо́с,/ ты проре́кл еси́.

Сла́ва, и ны́не, предпра́зднства, глас 4. Подо́бен: Ско́ро предвари́:

Де́вы отрокови́цы, предвоспо́йте,/ ма́тери, похвали́те,/ и вси воспо́йте песнь происхо́дную, успе́ние Де́вы и Ма́тере Госпо́дни/ пе́сньми богокра́сными предсоверша́юще боже́ственне:/ преставля́ется бо сла́вно к Небе́сным.

Песнь 4.

Кано́н предпра́зднства, глас 5.

Ирмо́с:Боже́ственное Твое́ разуме́в истоща́ние прозорли́во,/Авваку́м, Христе́, со тре́петом вопия́ше Тебе́:/ во спасе́ние люде́й Твои́х,/ спасти́ пома́занныя Твоя́ прише́л еси́.

Небе́снии ли́цы веселя́тся и уготовля́ются Бо́жию Чи́стую Ма́терь прия́ти,/ Цари́цу все́ми тва́рьми благоче́стно госпо́дствующую.

Да уклоня́тся возду́шнии ду́си,/ да отсту́пит же са́мый мироде́ржец,/ да па́дает посра́млен, ви́дя возноша́ему Бо́жию Ма́терь.

Не ктому́ о́бразно в гада́ниих, свяще́нники ковче́г заве́та носи́м есть:/ святы́ми апо́столы вои́стинну Бо́жия Ма́ти носима есть.

Усну́вши в боже́ственное поко́ище,/ почи́ла еси́ в жи́зненных сокро́вищах немину́ющих,/ Голуби́це Соломо́ня, добра́ же, и кра́сна, и всечестна́.

⇐ Предыдущая 1 2 345 6 7 8 9 Следующая ⇒