В 17-й день. Святыя му́ченицы Софи́и и трех ей дще́рей: Ве́ры, Наде́жди и Любве́

В 17-й день

Святыя му́ченицы Софи́и и трех ей дще́рей: Ве́ры, Наде́жди и Любве́

Ве́чер

На Го́споди, воззва́х: стихи́ры пра́здника, 3, глас 1. Подо́бен: Небе́сных чино́в:

Крест возно́сится, и де́мони прогоня́ются,/ разбо́йник Еде́ма у́бо врата́ отверза́ет,/ смерть умерщвля́ется и ны́не пуста́ яви́ся,/ Христо́с велича́ется./ Тем весели́теся, вси земноро́днии,/ кля́тва разруши́ся.

Прииди́те, боголюби́вии вси,/ Крест честны́й возноси́мый ви́дяще,/ возвели́чим ку́пно и сла́ву дади́м/ Еди́ному Изба́вителю и Бо́гу, взыва́юще:/ Распны́йся на Дре́ве кре́стнем,// не пре́зри моля́щихся нас.

Го́ресть дре́вле ослажда́я, Моисе́й/ изба́ви Изра́иля,/ о́бразом Крест пропису́я;/ мы же, сего́ вси боже́ственно, ве́рнии,/ та́инственно вообража́юще в сердца́х на́ших всегда́,// спаса́емся держа́вою его́.

И́ны стихи́ры му́чениц, глас 4. Подо́бен: Дал еси́ зна́мение:

Де́вы отрокови́цы,/ естества́ зако́ном связу́емы/ и я́ве укрепля́емы любо́вию Созда́теля,/ у́зу пре́лести разруши́ша ве́рою,/ и некре́пкаго врага́,/ вмужи́вшеся, нога́ми сотро́ша,/ и побе́ды венце́м/ светови́дно украси́шася,// и в неве́стник всели́шася у́мный, ра́дующеся.

Ве́ра всехва́льная,/ и Любо́вь сла́вная,/ и Наде́жда богому́драя,/ доброде́телей тезоимени́тыя/ светле́йших показа́вшеся,/ страда́льчески лука́ваго низложи́ша,/ прама́терь кова́рно прельсти́вшаго,/ рая́ селе́ния, обожи́вшеся, прия́ша,/ о всех моля́щеся.

О огни́ неради́ша,/ и о многообра́зных му́ках,/ и о сме́рти, всечестны́я:/ Жениха́ бо добро́ту/ красне́йшаго ве́рою и́щуще,/ разли́чными ра́нами украси́вшеся,/ Тому́ счета́шася Софи́ины о́трасли,/ Ве́ра, Наде́жда и Любо́вь же:// и́хже ра́ди, Го́споди, от лю́тых свободи́ ны.

Сла́ва, и ны́не, пра́здника, глас 1. Самогла́сен:

Насажде́нное в кра́ниеве ме́сте Дре́во су́щаго живота́,/ на не́мже соде́ла спасе́ние Преве́чный Царь посреде́ земли́,/ возноси́мо днесь, освяща́ет ми́ра концы́,/ и обновля́ется Воскресе́ния дом./ Ра́дуются А́нгели на Небеса́,/ и веселя́тся челове́цы на земли́,/ Дави́дски вопию́ще и глаго́люще:/ возноси́те Го́спода Бо́га на́шего/ и покланя́йтеся подно́жию но́г Его́,/ я́ко свя́то есть,/ подая́й ми́ру ве́лию ми́лость.

На стихо́вне стихи́ры, глас 2. Подо́бен: До́ме Евфра́фов:

Водо́ю боготво́рною/ и Кро́вию Твое́ю, Сло́ве,/ све́тло Це́рковь украша́ется,/ я́ко неве́ста,/ Креста́ сла́ву пою́ще.

Стих: Возноси́те Го́спода Бо́га на́шего/ и покланя́йтеся подно́жию но́гу Его́, я́ко свя́то есть.

Копие́ со Кресто́м,/ гво́зди и ина́я,/ и́миже живоно́сное/ Христо́во пригвозди́ся Те́ло,/ вознося́ще, поклони́мся.

Стих: Бог же, Царь наш пре́жде ве́ка,/ соде́ла спасе́ние посреде́ земли́.

Егда́ Амали́ка/ Моисе́й побежда́ше,/ на высоту́ ру́це име́я/ крестоявле́нно,/ образова́ше Христо́ву Страсть пречи́стую.

Сла́ва, и ны́не, глас 1:

Прообразу́я Крест Твой, Христе́,/ патриа́рх Иа́ков, вну́ком благослове́ние да́руя,/ на глава́х премене́ны ру́ки сотвори́./ Его́же, Спа́се, мы днесь вознося́ще, взыва́ем:/ да́руй христолюби́вому во́инству побе́ды,/ я́ко Константи́ну одоле́ние.

Тропа́рь пра́здника: Спаси́, Го́споди, лю́ди Твоя́:

12 3 4 5 6 7 8 9 10 Следующая ⇒