Статии, поемии во всякой скорби о обстоянии, в нихже обретаемся, и ко Господу о гресех воздыхающе умильно глаголем сицевыя стихи, похвалы субботния подражающия, творение Григория чтеца. Статия первая.

Статии, поемии во всякой скорби о обстоянии, в нихже обретаемся, и ко Господу о гресех воздыхающе умильно глаголем сицевыя стихи, похвалы субботния подражающия, творение Григория чтеца

Статия первая.

Благослове́н еси́, Го́споди, научи́ мя оправда́нием Твои́м.

^1. Блаже́ни непоро́чнии в путь, ходя́щии в зако́не Госпо́дни.

Жизнь во гро́бе положи́лся еси́, Христе́, мене ради грешнаго, и ангела моего хранителя делы безместными прогневавша.

^2. Блаже́ни испыта́ющии свиде́ния Его́, всем се́рдцем взы́щут Его́.

Животе́, ка́ко скорби понести могу, аще не обрящу Тя близ суща? Какия делы сотворю, еже очистити совесть свою? Пою Твое великое ко мне долготерпение.

^3. Не де́лающии бо беззако́ния в путе́х Его́ ходи́ша.

Велича́ем Тя, Иису́се Царю́, и чтем распятие Твое, еже за ны претерпел еси телесне, да нас свободиши мучительства адова.

^4. Ты запове́дал еси́ за́поведи Твоя́ сохрани́ти зело́.

Ме́ры земли́ положи́вый, Господи, положи пределы гордыни моея, Иисусе Царю, хранение устом моим даруй.

^5. Дабы́ испра́вилися путие́ мои́, сохрани́ти оправда́ния Твоя́.

Иису́се Христе́ мой, Царю́ всех, прииди обрящи мене, яко овча заблудшее, и на рамо возьми, прегрешений прощение даруя.

^6. Тогда́ не постыжу́ся, внегда́ призре́ти ми на вся за́поведи Твоя́.

Влады́ка всех во гробе положися, да от муки вечныя свободит создание свое, аз же путей Его не сохраних, сего ради стражду люте.

^7. Испове́мся Тебе́ в пра́вости се́рдца, внегда́ научи́ти ми ся судьба́м пра́вды Твоея́.

Животе́, во гро́бе положи́лся еси́, Христе́, и сме́ртию Твое́ю смерть погуби́л еси́, даруя верующим в Тя вечную жизнь.

^8. Оправда́ния Твоя́ сохраню́, не оста́ви мене́ до зела́.

Со злоде́и я́ко злоде́й, Христе́, вмени́лся еси́, оправда́я мя от злодейства древняго запинателя.

^9. В чесо́м испра́вит юне́йший путь свой? Внегда́ сохрани́ти словеса́ Твоя́.

Кра́сный добро́тою па́че всех челове́к, возроди доброту души моея, юже страстьми моими погубих.

^10. Всем се́рдцем мои́м взыска́х Тебе́, не отри́ни мене́ от за́поведей Твои́х.

Ад не терпяше схождения Твоего, Спасе, аз же не могу взирати на Твою милость. Кто ущедрит мя?

^11. В се́рдце моем скрых словеса Твоя́, я́ко да не согрешу Тебе́.

Иису́се, сла́дкий мой, и спаси́тельный Све́те, како во гресех суща мя не оставляеши? О несказа́ннаго и неизрече́ннаго терпе́ния!

^12. Благослове́н еси́, Го́споди, научи́ мя оправда́нием Твои́м.

Недоумева́ет и естество́ у́мное, и мно́жество безпло́тное, Христе́, та́инства несказа́ннаго и неизрече́ннаго Твоего́ человеколюбия.

^13. Устна́ма мои́ма возвести́х вся судьбы́ уст Твои́х.

О чуде́с стра́нных! О веще́й но́вых! Дыха́ния моего́ Пода́тель мене ради распинается, о несказанней моей славе промышляя.

^14. На пути́ свиде́ний Твои́х наслади́хся, я́ко о вся́ком бога́тстве.

И во дни, Владыко, Ти зову, и в нощи глас пущаю: не отрини мене погибающа!

^15. В за́поведех Твои́х поглумлю́ся, и уразуме́ю пути́ Твоя́.

И́стинный небесе́ и земли́ Царю́, а́ще и всегда распинаю тя грехами моими, Ты же не отвращаешися мене, Иису́се.

^16. Во оправда́ниих Твои́х поучуся, не забуду словес Твои́х.

Тебе́ всех Царя ангельская воинства непрестанно величают, аз же точию един прогневляю и посрамляю имя Твое от крещения ми дарова́нное.

^17. Возда́ждь рабу́ Твоему́, живи́ мя, и сохраню́ словеса́ Твоя́.

Зе́млю содержа́й дла́нию, скорби моя носит, ослабу печали моей даруя.

^18. Откры́й о́чи мои́, и уразуме́ю чудеса́ от зако́на Твоего́.

Из истле́ния мя возведи, Слове, страстьми своими поползшагося и от гноища мя воззови, исцеление души моей даруя.

^19. Пришле́ц аз семь на земли́, не скрый от мене́ за́поведи Твоя́.

Я́коже све́та свети́льник, да будут мне словеса Твоя спасительная, Спасе, ихже многажды оставляше.

^20. Возлюби́, душа́ моя́, возжела́ти судьбы́ Твоя́ на вся́кое вре́мя.

У́мных веселия исполняется во́инств мно́жество о грешнице кающемся, мене же ради окаяннаго плачет и сетует.

^21. Запрети́л еси́ го́рдым, про́кляти уклоня́ющиися от за́поведей Твои́х.

Умерщвле́н во́лею жизнодателю Иису́се мой, оживляеши умерщвле́на мя преступле́нием го́рьким.

^22. Отыми́ от мене́ поно́с и уничиже́ние, я́ко свиде́ний Твои́х взыска́х.

Изменя́шеся вся тварь стра́стию Твое́ю, мене бо ради падшаго воплотился еси, да возставиши падшаго зле.

^23. И́бо седо́ша кня́зи, и на мя клевета́ху, раб же Твой глумля́шеся во оправда́ниих Твои́х.

Живота́ подателя Тя вем, Спасе, возводяща чада к своему наследию, и плачу дел моих.

^24. И́бо свиде́ния Твоя́ поуче́ние мое́ есть, и сове́ти мои́ оправда́ния Твоя́.

Во гро́бе положи́лся еси́, Христе́, обновляя человечество, и не отрини мене Твоего благоутробия, Щедре.

^25. Прильпе́ земли́ душа́ моя́, живи́ мя по словеси́ Твоему́.

На зе́млю сшел еси́, Владыко, и поношение приял еси нас ради падших, но скоро возстави, Спасе, создание Твое.

^26. Пути́ моя́ возвести́х и услы́шал мя еси́, научи́ мя оправда́нием Твои́м.

Сотрясаюся стра́хом, Сло́ве, притекаяй к Тебе, блудодеяния моя поминая, и горце вопию: ослаби!

^27. Путь оправда́ний Твои́х вразуми́ ми, и поглумлю́ся в чудесе́х Твои́х.

Я́ко челове́к Ти припадаю, согреших, Спасе, согреших, но не остави мя силою Твоею.

^28. Воздрема́ душа́ моя́ от уны́ния, утверди́ мя в словесе́х Твои́х.

Слезото́чная рыда́ния от души ти приношаю, Слове, очистиши ли мя да паче снега убелюся?

^29. Путь непра́вды отста́ви от мене́, и зако́ном Твои́м поми́луй мя.

Я́коже пшени́чное зе́рно в земли вера моя, впаде и умре, но Твоею живительною силою клас нов возрасти.

^30. Путь и́стины изво́лих, и судьбы́ Твоя́ не забы́х.

Под земле́ю скры́лся еси́ от мене, я́ко со́лнце ны́не, и но́щию сме́ртною покрове́н есмь, но возсия́й светле́йше, Спа́се, и просвети мя.

^31. Прилепи́хся свиде́нием Твои́м, Го́споди, не посрами́ мене́.

Я́коже со́лнечный круг луна́, Спа́се, сокрыва́ет, такожде и грехи моя от мене Твой светлый лик сокрыша.

^32. Путь за́поведей Твои́х теко́х, егда́ разшири́л еси́ се́рдце мое́.

Живо́т даруй ми, Боже, согрешившу Ти, со слезами от сердца вопию: не остави мя погибнути.

^33. Законоположи́ мне, Го́споди, путь оправда́ний Твои́х, и взыщу́ и вы́ну.

Умерщвле́на мя страстьми исцели, Спасе, якоже раба сотника, и скоро от одра греховнаго возстави.

^34. Вразуми́ мя и испыта́ю зако́н Твой, и сохраню́ и́ всем се́рдцем мои́м.

У́мнии Тя чи́ни, воспевают, аз же языком злая глаголяй, преогорчеваю, но помилуй мя, Спа́се.

^35. Наста́ви мя на стезю́ за́поведей Твои́х, я́ко ту́ю восхоте́х.

Снем Тя, Сло́ве, от дре́ва ме́ртва Иосиф, положи во гробе своем, возводяща мя от тли греховныя.

^36. Приклони́ се́рдце мое́ во свиде́ния Твоя́, а не в лихои́мство.

А́нгельская, Спа́се, ра́дость да будет, даруй ми слезы покаяния и исправление жития.

^37. Отврати́ о́чи мои́, е́же не ви́дети суеты́, в пути́ Твое́м живи́ мя.

Возне́слся еси́ на дре́ве, Спасе, понесе наша болезни неисцельныя, даруя нам живот и воскресение.

^38. Поста́ви рабу́ Твоему́ сло́во Твое́ в страх Твой.

Я́коже скимен обитаю в тайных души моея, не смея приходити или приближитися Тебе, Господи, но яко от сна, от страстей моих возстави мя.

^39. Отыми́ поноше́ние мое́, е́же непщева́х, я́ко судьбы́ Твоя́ бла́ги.

В ре́бра прободе́н был еси́, Господи, мене ради, аз же заповеди Твоя не сохраних, любве Твоея недостоин ныне обретаюся.

^40. Се возжела́х за́поведи Твоя́, в пра́вде Твое́й живи́ мя.

Та́йно у́бо родился еси, яко да спасеши мир, ныне же воздыхающа спаси мя, Спасе мира.

^41. И да прии́дет на мя ми́лость твоя́, Го́споди, спасе́ние Твое́ по словеси́ Твоему́.

Кто изрече́т долготерпение Владычне? Влады́чествуяй бо тва́рию, приходит ко мне и воздвигает яко от гноища убогаго.

^42. И отвеща́ю поноша́ющим ми сло́во, я́ко упова́х на словеса́ Твоя́.

Живота́ вечнаго наследник явлюся ли? Ужаса́юся и взываю: по велицей милости Твоей помилуеши ли мя?

^43. И не отыми́ от уст мои́х словесе́ и́стинна до зела́, я́ко на судьбы́ Твоя́ упова́х.

Копие́м льтиваго прободен есмь, и несть живота во мне, но прииди скоро, Господи, и воскреси во мне падший Твой образ.

^44. И сохраню́ зако́н Твой вы́ну в век, и в век ве́ка.

Распросте́р руце на дре́ве, призываеши все человечество во объятия Твоя, Иису́се, приимеши ли мя падшаго, Боже?.

^45. И хожда́х в широте́, я́ко за́поведи Твоя́ взыска́х.

Благообра́зный советник Тело Твое приим бездыханное, со учеником опрята, приимеши ли мя, Спасе, добродетелию мертва, плащаницею прощения покрывая?

^46. И глаго́лах о свиде́ниих Твои́х пред цари́, и не стыдя́хся.

Под покровом ночи греховныя ныне обретаюся и ужасаюся своего окаянства, но приими воздыхание мое, Спаси и просвети мя.

^47. И поуча́хся в за́поведех Твои́х, я́же возлюби́х зело́.

А́ще и разбойника помиловал еси и блудницу, помилуй и мене, Иису́се.

^48. И воздвиго́х ру́це мои́ к за́поведем Твои́м, я́же возлюби́х.

А́ще и Судией именуешися, но человеколюбия еси бездна, умертви моя согрешения, Спасе, и оправдай мя.

^48. И глумля́хся во оправда́ниих Твои́х.

О ра́дости о́ныя! О мно́гия сла́дости! Грешницы кающияся мир с Богом обретают.

^49. Помяни́ словеса́ Твоя́ рабу́ Твоему́, и́хже упова́ние дал ми еси́.

Покланя́юся стра́сти, воспева́ю погребе́ние, велича́ю Твою́ держа́ву, Человеколю́бче, и́миже свободи́хся страсте́й тлетво́рных.

^50. То мя уте́ши во смире́нии мое́м, я́ко сло́во Твое́ живи́ мя.

На Тя совети злии совещашася древле, аз ныне совещаюся преступити заповедь Твою, но от беззакония моего омый мя.

^51. Го́рдии законопреступова́ху до зела́, от зако́на же Твоего́ не уклони́хся.

А́гница Агнца зря́щи в заколе́нии мене ради, о́стрием пробода́ема рыда́ше, аз же во страстех сый хощу вопи́ти.

^52. Помяну́х судьбы́ Твоя́ от ве́ка, Го́споди, и уте́шихся.

А́ще и помилуеши мя, несмь достоин нарещися сын Твой, но яко единаго от наемник сотвори мя, Спасе.

^53. Печа́ль прия́т мя от гре́шник, оставля́ющих зако́н Твой.

Во́лею снизше́л еси́, Спа́се, на землю, да возставиши вся ко сла́ве О́тчей.

^54. Пе́та бя́ху мне оправда́ния Твоя́ на ме́сте прише́льствия моего́.

Тро́ицы Еди́наго во пло́ти, нас ра́ди поно́сную претерпе́вшаго смерть, умолим ныне не отвратити лице.

^55. Помяну́х в нощи́ и́мя Твое́, Го́споди, и сохрани́х зако́н Твой.

Я́ко от исто́чника воды живыя, от словес Твоих, не напоих душу, яже жаждет ныне.

^56. Сей бысть мне, я́ко оправда́ний Твои́х взыска́х.

Судия́ я́ко суди́мь за мя распинается, аз же ни единыя заповеди Того сотворих и не оправдаюся.

^57. Часть моя́ еси́, Го́споди, рех сохрани́ти зако́н Твой.

Го́рдый человече, како во гресех иждиваеши время, како Спаса ныне предаеши Кресту?

^58. Помоли́хся Лицу́ Твоему́ всем се́рдцем мои́м, поми́луй мя по словеси́ Твоему́.

Руко́ю Твое́ю созда́вый мя, падшаго люте, но возстави и воззови во́лею Твое́ю.

^59. Помы́слих пути́ Твоя́, и возврати́х но́зе мои́ во свиде́ния Твоя́.

Послу́шав, Сло́ве, Отца́ Твоего́, да́же до а́да лю́таго соше́л еси́, мене же не послушавшаго повелений Твоих сможеши ли простити?

^60. Угото́вихся и не смути́хся, сохрани́ти за́поведи Твоя́.

Увы́ мне, Све́те ми́ра! Увы́ мне, све́те мой, Иису́се мой возжеле́нный! Вопию грешный и слезы пущаю.

^61. У́жа гре́шник обяза́шеся мне, и зако́на Твоего́ не забы́х.

Зави́стник быв брата моего поползся доле, но Ты мя, Спасе, возведи горе, зависти лютыя мя изымая.

^62. Полу́нощи воста́х испове́датися Тебе́ о судьба́х пра́вды Твоея́.

Прииду у́бо ли ко Христу, скверный убийца души своея, злой нрав исправлю ли, имже явился аз яко предатель Христов?

^63. Прича́стник аз есмь всем боя́щимся Тебе́, и храня́щим за́поведи Твоя́.

Я́ко человеколюби́в пред человеки являюся, но сердце мое любве не имать, юже даруй ми, Боже мой.

^64. Ми́лости Твоея́, Го́споди, испо́лнь земля́, оправда́нием Твои́м научи́ мя.

Небе́се и земли Творца прогневляю, о ближнем не радя, но коснися сердца моего, Спасе, презирая моя согрешения.

^65. Бла́гость сотвори́л еси́ с рабо́м Твои́м, Го́споди, по словеси́ Твоему́.

А́ще и славы человеческия ищу, и Твоея славы достойнаго не творю, но помилуй и укрепи нозе мои ходити во Твоих повелениих.

^66. Бла́гости и наказа́нию, и ра́зуму научи́ мя, я́ко за́поведем Твои́м ве́ровах.

О Бо́жий Сло́ве! О ра́досте моя́! Ка́ко претерплю́ гнев Твой праведный? Ны́не терза́юся душею, каяся.

^67. Пре́жде да́же не смири́ти ми ся, аз прегреши́х, сего́ ра́ди сло́во Твое́ сохрани́х.

Кто даст ми во́ду и слез исто́чники, взываю, да воспла́чу горькагог моего падения?

^68. Благ еси́ Ты, Го́споди, и бла́гостию Твое́ю научи́ мя оправда́нием Твои́м.

О го́ры и хо́лми, сродницы и знаемии! Воспла́читеся, и вся рыда́йте со мно́ю, ибо зле погибаем!

^69. Умно́жися на мя непра́вда го́рдых, аз же всем се́рдцем мои́м испыта́ю за́поведи Твоя́.

Когда́ уви́жду Тя, Спа́се, безле́тнаго Све́та, ра́дость и сла́дость се́рдца моего́? Из глубины души го́рько вопию.

^70. Усыри́ся я́ко млеко́ се́рдце их, аз же зако́ну Твоему́ поучи́хся.

А́ще и я́ко ка́мень, Спа́се, краесеко́мый, Ты прия́л еси́ сече́ние, источая ми воду живую, яко Источник сый жизни.

^71. Бла́го мне, я́ко смири́л мя еси́, я́ко да научу́ся оправда́нием Твои́м.

Я́ко от исто́чника еди́наго сугу́бою реко́ю ре́бром Твои́м излива́ющим напая́ющеся, безсме́ртную приобрета́ем жизнь.

^72. Благ мне зако́н уст Твои́х, па́че ты́сящ зла́та и сребра́.

Во́лею яви́лся еси́, Сло́ве, на кресте распят, но верующия в Тя и милости Твоей прибегающия, Спа́се мой, воздвиза́еши.

Слава: Воспева́ем, Сло́ве, Тебе́, всех Бо́га, со Отце́м и Святы́м Твои́м Ду́хом, и сла́вим Боже́ственное Твое́ человеколюбие.

И ныне, Богородичен: Блажи́м Тя, Богоро́дице Чи́стая, и почита́ем милосердие необыменно Сы́на Твоего́ и Бо́га на́шего верно.

И паки первый припев:

12 3 Следующая ⇒