Кано́н честно́му и животворя́щему Кресту́, и святы́м му́чеником. Гла́с 4.

Пе́снь 6

Кано́н честно́му и животворя́щему Кресту́, и святы́м му́чеником. Гла́с 4.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Вся́кия вы́ше че́сти пребо́льший сы́й, обезче́ститися претерпе́л еси́, я́ко да мя́ зле́ обезче́стившагося почти́ши, и Кресто́м спасе́ши, Человеколю́бче.

На дре́во возноси́м и ме́ртв у́бо бы́л еси́, Го́споди, умертви́теля же сотвори́в ме́ртва души́ моея́, и вся́каго испо́лнена студа́: и ны́не, Тво́рче мо́й, пою́ Твою́ си́лу.

Му́ченичен: Уя́звен бы́сть уязви́вый ва́с вселука́вый, неисце́льными му́ками, и нога́ми ва́шими, му́ченицы, низложи́ся, и зри́м е́сть от все́х наруга́ем.

Му́ченичен: Исцеле́ния источа́ет му́ченических моще́й пра́х лежа́щий во гро́бе, и я́коже пра́х бе́сы разруша́ет, и разли́чныя исцеля́ет челове́ков боле́зни.

Богоро́дичен: Гвоздьми́ Тя законопресту́пных собо́р пригвозди́ на Кресте́, и печа́ли ны́не ору́жием Мое́ се́рдце растерза́ю, о Сы́не Мо́й! Де́ва вопия́ше слезя́щи.

Други́й кано́н пресвяте́й Богоро́дице. Гла́с 4.

Ирмо́с то́йже.

Сме́рти потреби́тель бы́сть Рождество́ Твое́, Де́во, умира́ющым же живо́т и избавле́ние. Сего́ ра́ди молю́ Тя: ду́шу мою́ умерщвле́нную воскреси́.

Простри́ мне́ по́мощи ру́ку, Человеколю́бче, в пучи́не жите́йстей обурева́ему, мольба́ми Ма́тере Твоея́, и вы́шних неизче́тных си́л.

Село́ е́же Боже́ственный возраста́вшее кла́с, осла́бленную ду́шу мою́, и гла́дом Боже́ственных дея́ний иста́емую не пре́зри, но напита́й Сы́на Твоего́ Боже́ственною благода́тию.

Успи́ стра́стная двиза́ния телесе́ и взыгра́ния моя́ плотска́я уму́ повини́ я́коже жребя́, успи́вши Чи́стая, сно́м Твои́х моли́тв.

⇐ Предыдущая 2 3 4 5 678 9 10 11 Следующая ⇒