Канон, глас 6.

Канон Богородице параклисис, со ирмосом на 6, и святому канон на 8.

Канон, глас 6.

Песнь 1.

Ирмос: Яко по суху пешешествовав Израиль по бездне стопами, гонителя фараона видя потопляема, Богу победную песнь поим, вопияше.

Господи отверзи мои недостойнеи устне, и очисти мя Духом Твоим Святым, воспети достойно память блаженнаго Мелетия, ныне со ангелы молящагося Тебе, избавити нас от всякаго лютаго обстояния.

Пастыря Кронштадтскаго чадо возлюбленне, того молитвами присно укрепляем, с ним же вкупе не престай молитися о нас, творящих пресветлую память твою.

Измлада духом к Богу пламенея, отринул еси вся мира сего красная, и стопам отца духовнаго последуя, яко столп Православия в земли Российстей просиял еси, мудре.

Богородичен: Всеблагая Владычице, Яже Преблагаго Бога плотию рождши, озлобленное страстьми мое сердце очисти, да верою и любовию величаю Тя.

Катавасиа по Уставу.

Песнь 3.

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.

Молитвами твоими, преподобне, предстоя Богу со святыми, за Державу нашу молися, от ига иноплеменных избавити и победу на супостаты даровати.

В годину люту богоотступления исповедничеством и странничеством подвизался еси, гонения даже до смерти нивочтоже вменив, люди Божия в вере Православней утвердил еси, моли спастися нам.

В темнице раны узника омывый, и струпы сего молитвою исцеливый, помози и мне омытися слезми покаяния, и исцелитися принятием Святых Таин.

Богородичен: Услыша Ева праматерь: в печалех родиши чада. Ты же, Чистая Дево, услышавши: Господь с Тобою, радуйся: радованным гласом печаль праматере потребила еси.

Седален, глас 4:

Гонения мучителей крепкою верою препобедив, исповеданием ко спасению притек, столп Православия явился еси, преподобне Мелетие: моли Христа Бога даровати нам велию милость. [Дважды. ]

Слава, и ныне, Богородичен:

Егда предстану пред лицем Создателя моего в день праведнаго суда Его, тогда, Владычице, предстани ми и муки избави мя вечныя, да не сниду во ад, но да спасуся Твоим, Пресвятая Богородице, заступлением.

Песнь 4.

Ирмос: Христос моя сила, Бог и Господь, честная Церковь боголепно поет взывающи, от смысла чиста о Господе празднующи.

Днесь светло празднует земле Брянская память твою, исповедниче, и молит тя: испроси у Господа Державе нашей мир и душам нашим велию милость.

Дар верности и любве к Помазанникам Господним от пастыря Кронштадтскаго унаследовав, люди Божия в сих утверждал еси, и нас утверди молитвами твоими, блаженне.

Никакоже преклонился еси под едино ярмо с неверными, безбожие власти дерзновенно обличая, и верныя чада Церкве Христовы пастырски окормляя.

Богородичен: Радуйся, Владычице Дево, Церквам красото, благочестивым людем державо и похвало: непрестанно молися Христу Богу, да сохранит нас от бед молитвами Твоими.

Песнь 5.

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

От казни лютыя молитвами праведнаго Иоанна избавлен быв, и разслабленную матерь начальника темницы молитвою воздвигнув, и наша разслабленная житейскими попечении сердца укрепи, с верою к тебе притекающих.

Да внидут ныне христоименитии людие на место упокоения твоего, к честным мощем твоим, преподобне Мелетие, припадающе, и да просят от тебе исцеления, здравия и спасения, Христа величающе.

Во время казни молящу ти ся Богу, преподобне, враг хотяше погубити тя, но по вере и уповании твоем велие чудо совершися, егда смертоносное оружие не повредиша ти: воистинну дивнаго молитвенника и чудотворца всем Владыка тя показа.

Богородичен: Бога, Егоже родила еси, Пречистая Марие, моли, рабом Твоим подати прегрешений оставление.

Песнь 6.

Ирмос: Житейское море воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиве.

Снегосветлою ризою Духа одеялся еси, блаженне: темже яко солнце ликом просиял еси пред ученики твоими, показуя светлость жития твоего: моли Единаго Человеколюбца убелити души наша покаянием.

Велия твоя скорби и труды почитаем, преподобне Мелетие, яже в темнице и в гонении претерпел еси, преходя из града во град, и сладость словес твоих, имиже многи в вере укрепил еси и научил еси воспевати Единосущную Троицу.

Явлением Кронштадтскаго Чудотворца о скончании жительства твоего извещенный, к вечным же обителем возшед, блаженне, идеже предстоя с лики ангельскими, моли и нам сподобитися мирныя христианския кончины, и невозбранно прейти воздушныя мытарства, да славим тя, Христа величающе.

Богородичен: Ныне к Тебе прибегаю, Пречистая, спаси мя молитвами Твоими и соблюди: елика бо хощеши, можеши, яко Мати Всемогущаго.

Кондак, глас 2:

Мира красная и суетная отринув, преподобне, подвигом исповедничества и странничества в миру подвизался еси: гонения даже до смерти претерпел еси, многих утвердил еси в вере истинней: сего ради и Христос тебе, отче Мелетие, прослави, и даром исцелений и чудес обогати. Темже вопием ти: радуйся, Мелетие, преподобне отче наш.

Икос:

Оставив род и други, суету мира сего отринув, стопам Кронштадтскаго пастыря последовал еси: во дни гонения мужественне подвизався, исповедником ликостояния сподобился еси. Темже яко адамант тверд в вере пребыв, подаждь и нам, преподобне, в вере утверждение, сице глаголющим: радуйся, Мелетие блаженне, яко столп Православия в земли Российстей просиявый: радуйся, от юности Христа всем сердцем возлюбивый. Радуйся, многи скорби и гонения от богоборцев претерпевый: радуйся, даже до смерти от Христа не отступивый. Радуйся, за веру гонимых укрепление: радуйся, источниче исцелений. Радуйся, иноком славо и радование: радуйся, земли Российския похвало: радуйся, Мелетие, преподобне отче наш.

Песнь 7.

Ирмос: Росодательну убо пещь содела ангел преподобным отроком, халдеи же опаляющее веление Божие мучителя увеща вопити: благословен еси, Боже отец наших.

Десница Господня от юности чудно храняше тя, преподобне, впадша в кладезь ледяной воды, и неврежденна пребывша, мы же Сохраньшему тя взываем: отец наших Боже, благословен еси.

Егда под лед реки с поклажею провалился еси, тогда со дна речнаго возопил ко Господу с верою и упованием, и дланию Всевышнего изъятый, вопиял: отец наших Боже, благословен еси.

Многи гонения и странствия претерпев, водворился еси в веси Локоти Брянския земли, идеже яко в затворе пребывая, духовная чада пети наставлял еси: отец наших Боже, благословен еси.

Богородичен: Богородице Дево, рождшая Слово паче слова, Зиждителя Твоего, Того моли с преподобным Серафимом, помиловати души наша.

Песнь 8.

Ирмос: Из пламене преподобным росу источил еси и праведнаго жертву водою попалил еси: вся бо твориши, Христе, токмо еже хотети, Тя превозносим во вся веки.

Молитвами твоими пречудную икону Владычицы нам испросивый, яко второе солнце сияющу и токи чудес непрестанно источающу, с Нею же умоли Господа, да воскресит Русь Святую покаянием, дарует нам Царя-Победителя и спасет всех поющих: Господа пойте дела, и превозносите Его во веки.

По преставлении твоем, блаженне, многи чудеса и исцеления на могиле твоей совершаеши, миро обильно источаеши, люди Божия в вере укрепляеши, вопиющия: отроцы благословите, священницы воспойте, людие превозносите Господа во веки.

Благословим Отца и Сына и Святаго Духа, Господа.

Благодатию Божественнаго Духа исполнен сый, преподобне Мелетие, грядущая яко настоящая созерцая, верным чадом сия прорекл еси. Нам же, творящим святую память твою, молитвами твоими испроси грехов прощение, вопиющим: отроцы благословите, священницы воспойте, людие превозносите Господа во веки.

И ныне, Богородичен:

Спасения Ходатаица нам явилася еси, Богородице, рождшая Спаса и Владыку всех: темже молим Тя, спасения сподоби всех песнословящих Тя верно во вся веки.

Песнь 9.

Ирмос: Бога человеком невозможно видети, на Негоже не смеют чини ангельстии взирати: Тобою же, Всечистая, явися человеком Слово воплощено: Егоже величающе, с небесными вои Тя ублажаем.

Недостойными усты воспеваемое тебе малое моление наше, преподобне, не презри, но приими: и всех прославляющих тя освяти, бед и напастей и вечныя муки избави, да тя присно воспеваем.

Узы, темницу и скитания в годину гонений доблественне претерпев, столп Веры Православныя явился еси и к сиянию невечернему востекл еси: моли спастися нам.

Крепкою верою Христос Бог тя препояса, якоже древлия мученицы, и укрепи претерпети гонения даже до смерти, исповедниче. Темже ныне молим тя: моли Человеколюбца Бога, да избавит всех нас от вражиих нахождений и искушений, и спасет души наша.

Богородичен: Ты еси крепость наша, Ты еси похвала и радование, хранительница наша, заступление, прибежище и предстательница непобедимая: Пречистая Богородице, спаси рабы Твоя.

Светилен.
Подобен: Жены, услышите:

Приидите, вси вернии, священными песньми восхвалим крепкаго в вере исповедника Мелетия, новаго светильника Российския земли, святым причастника и теплаго молитвенника к Богу о чтущих святую память его.

Слава, и ныне, Богородичен:

По Бозе упование имуще на Тя, Пречистая Богородице, молим Ти ся: Рождшагося из Тебе умоли даровати мир вселенней и велию милость.