Радости нам вечныя и жизни нетленныя Ходатаица явилася еси, Богородительнице, приносяще за ны руце к Сыну Твоему и Спасу всех, всяку слезу от лица земнаго отъемшему и неизследную милосердия Своего бездну Тобою миру показавшему.. Святителя Николая, предст

Радости нам вечныя и жизни нетленныя Ходатаица явилася еси, Богородительнице, приносяще за ны руце к Сыну Твоему и Спасу всех, всяку слезу от лица земнаго отъемшему и неизследную милосердия Своего бездну Тобою миру показавшему.

Пресвятая Богородице, спаси нас.

Святителя Николая, предстояща образу Твоему, благоговейный муж узрети сподобися и благоволения Твоего глаголы от Тебе, Царице, услыша, яже верным быша во утверждение и о людех промышления Твоего во свидетельство.

Слава: Свиток нов Тебе Исаия, Дево, предвидев, на немже написася живое слово Отчее, Егоже моли, Чистая, Всеблаженная, в книзе мне живых написатися и многих зол моих растерзати свиток покаяния предобрыми образы.

И ныне: Из глубины бездны греховныя к Тебе руце простираю и сквернии устне мои к молению отверзаю, подножию же ног Твоих, Владычице, припадаю и, рыдающи, вопию Ти: молися, Заступнице, Сыну Твоему, прощение улучити ми и милость в День судный.

Господи, помилуй (трижды). Слава, и ныне:

Кондак, глас 1-й

Честное жилище бывшее неизреченнаго естества Божественнаго выше слова и паче ума и грешным еси Споручница, подаваеши благодать и исцеление, яко Мати всех Царствующаго: моли Сына Твоего получити нам милость в День судный.

Икос

Светоноснаго явления и преславнаго Твоея иконы, Споручницы грешных прославления, чудес же многих пучины и мира многоцелебнаго излияния витийствующих уста не возмогают исповедати достойно; мы же, грешнии и смиреннии, что возглаголем Ти, Богоневестная Дево? Токмо: помилуй нас. Едину бо Тя жизни нашея стяжахом Хранительницу и Надежду крепку спасения. Темже молим Тя, о Благосердная: Споручница нам покаяния явися и ходатайствуй к Сыну Твоему: да будущих истязаний избавимся и милостива Его обрящем в День судный.

Песнь 7

Ирмос: Богопротивное веление беззаконнующаго мучителя высок пламень вознесло есть. Христос же простре Богочестивым отроком росу духовную, Сый благословен и препрославлен.

Пресвятая Богородице, спаси нас.

В нощи, и во дни, и во всяких обстояниих спасение твердо имамы Тя, Богородице, христианом покров и прибежище, выну бо руце ко Господу простерши, росою молитв Твоих, якоже отроки благочестивыя, охранявши от напастей верныя, зовущия: благословенна еси, Мати Дево, и препрославлена.

Пресвятая Богородице, спаси нас.

Не терпя муж благочестивый зрети неизреченнаго от образа Твоего осияния, на землю ниц паде, моляся; мы же, грешнии, благодатную икону сию зряще, любовно вопием Ти: благословенна буди, Споручнице спасения нашего, и препрославлена во веки.

Слава: Серафим древле, клещами угль носяй горящий, во уста коснуся Исаии, попаляя грехи его. Ты же, клеща светозарная сущи, Богородице, Угль Божественный носившая, Христа Иисуса, прикоснися Его милосердию, да опалив грехи наша и беззакония лютая.

И ныне: Не отвержи мене от лица Твоего, Всенепорочная, егда к Пречистому образу Твоему воззрю, стеняще о гресех тяжких, но милостива буди ми Заступница к Сыну, милосердием бо преклоняется и спасение грешников соделывает ходатайством Твоим.

Песнь 8

Ирмос: В пещь огненную ко отроком еврейским снизшедшаго и пламень в pоcy преложшаго Бога пойте, дела, яко Господа и превозносите во вся веки.

Пресвятая Богородице, спаси нас.

В пещь огненную страстей мира снизшедшую и пламень греховный в росу покаяния спасительнаго преложшую Богородицу, прекрасный лик весело сплетши, пойте, дела, яко Заступницу мира Деву Чистую, и превозносите во вся веки.

Пресвятая Богородице, спаси нас.

Света Небеснаго в нощи многообразными играньми славят всечестную икону Твою, Владычице, Горнии Чини и Тебе, Богоневестную Матерь, ублажают радостно. Юже, яко Световодительницу из тьмы греховныя, людие, превозносите во вся веки.

Слава: От древле до ныне Саму Матерь Царя Христа Утешительницу тверду в напастех имущи, в скорбех же и печалех присное избавление, в бедах помощь и в покаянии Споручницу, благословите, сынове человечестии, пойте Сию и превозносите во вся веки.

И ныне: Даждь рабом Твоим, Всеблагая Царице, прошения спасительная в храме сем, в немже источник преславных чудес показала еси, токи мира источая от святаго образа Твоего, имиже страсти душ и телес врачуеши неизреченным милосердием Твоим.

Песнь 9

Ирмос: Безначальна Родителя Сын, Бог и Господь, воплощся от Девы, нам явися, омраченныя просветити, собрати расточенная. Тем Всепетую Богородицу величаем.

Пресвятая Богородице, спаси нас.

Не возмогает слово человеческое, ниже язык всяк похвалити Тя достойно, но Ты, Пресвятая, благодать неоскудную от Господа приимшая и грешным Споручница свыше преднареченная, вретище прегрешений наших расторгни и омраченныя просвети ны, веселием же добродетелей препоясующи, не остави нас заступлением Твоим, да Тя, Всепетую Богородицу, величаем.

Пресвятая Богородице, спаси нас.

Светом невещественнаго светолития сияя, образ Твой, Отроковице Непорочная, омраченныя грехми просвещает и расточенная вся под кров спасительный храма Твоего собирает, тем, веселящеся, Тя, Всепетую Богородицу, величаем.

Слава: Якоже Давид праотец древле пред сенным ковчегом взыграше радостно, сице и мы Царице Неба пришедшей песньми взыграем немолчными, славяще образа Ея многоцелебнаго всечестное прославление.

И ныне: Срадуемся днесь и свеселимся неизреченному Божию дарованию – дивному образу Приснодевы, радость бо вечную от Него источает нам, напастей и печалей свобождая. Темже благодарственныя песни воспеваем веселия Ходатаице и верно любовию вси яко Богоматерь величаем.

⇐ Предыдущая 1 2 34