Павел Бажов. Селдох тупайи

Павел Бажов

Селдох тупайи

И куртан, и воошан пирась ики ус, Кока Ваняя нэмиса.

Лув хот юкан нэмалты хоят хасьмал антом. Номасан ёхатса матты куняр няврэмии энмалты утыя. Ванна улты мохилал инсясыллы – моса уйтлат, мохилал си ясталат:

– Молхашак, Глдинкайн, симась воош ул, Потопаев Киршка имел пилан антома истан. Уншак эвилал рупитты усайт. Айшак эвиел хут тал ловат – нэмалты хоята ант мосмал. Нанг лувел янгха па уйи.

– Эви па ма холта тулэм. Пох ки ус, лулн, ямшак. Воой велты па сорни щалдяк каншты уталтасэм. Манэм нётты питас моса. Эвии па хотсат велпаслаты уталталэм?

Синганся, еша нумасас, нумасас па ястал:

– Киршка хоты ма яма уйтсэм, имел па. Шенгк ям хоятнган устан – каркамнган па апрангнган. Эван лын хорасан ки, уты рахал, муйл атом. Улэм лувел. Моса ма хосяем ант ил?

Мохилалан си алдьсила:

– Си эвии атма, атма тайла па хотатан. Киршкайнган улам хот нуша хоята маса. Си юкана эвии энмалты па лапатты парса. Нуша мохэт хоты, ин эвии тумпина няврэмел ар – янг молтаскем. Ситат лэтотна ант тарамлайт, холна па там эвиилапаттыя – молтас унгал. Аньхэлан лдикан эталтала. Лэты пулдал ёхи ант лэпал. Ай кепа, исипа моштантыйл. Хотсат ситы ултыя верытла. Ал ил. Яма вохи па муя ант манал.

Яна си, – Кока Ваня, – ёхлы нюхмас. – Яма вохлэм ки.

Емхаталан ёхтас лув, эвиел улты хота, нуша хоятлал хося. Вантлаллы – айл-унал – тэланг хот. Куур пунгалан эвии омасал, лув пунглалан кати. Эвии ай ловангнгии, урты катиел па ай ловангнгии, поням па таал лов карал кеша хасьмал. Вантты тахайл антом. Хойн симась воой ула. Эвии кател восьхиллы. Кател па ситы сыянга муркитал па хот ловатан сясял. Кока Ваня моштантыйс па инсясял:

– Нын хосяйн Киршкайн мийммие ул? Хотанг нэнгал унгал верас:

– Ул си, ул си. Сит шимал па, ахолся холна, понямал па лов карал кеша хасям кати мосятмал. Воштаты ант верытлэв. Няврэмлам холыя напрыя куншсайт. Лапатты мосал холна.

Кока Ваня си ястал:

Няврэмлан, илампа, шаль ош ант уйтлат. Ай эвиен ант си куншла, ванты, хоты катиел яма муркийл.

Сялта куняр эвии инсяслаллы:

– Я, хоты, мийммии, ма хосяем манлан ултыя? Эвиел ястал:

Нанг па, акайи, холся ма нэмем уйтлэн? Муя манэм Мийммая айллэн?

Ал, ситы, – акайл ёхлы нюхмас, –лув сиралан ситы тыйс. Ант нумассам, ант моштатсам, амуй сиран тохи хойсям!

– Нанг па хой питлан? – эвиелан инсясла.

– Ма, – ястал, – воой велты сира уллам. Лунган ма хиш ислам па сорни кев сэмат каншлам. Тал порайн па сэр унт оош, морт унт оош нюхатлылам па веккеша шиялаты куртаслам.

– Нанг лувел веллэн?

– Ма хосяем ултыя манлан ки, ма нангэн си монсь монсьлэм. Эвии си монсь хулатты шенгк лытты питса. Вантталан, пирась икел иси ям хоят ныла. лув си нюхмас:

– Манлам. Туп там катием, Мурёнкаем, иси уйи. Ванты, муй хорпи ям кати.

Тами хоты муй потар, – Кока Ваня ёхлы ястас, – улэман, улэман. Тамась сыйнг турпи кати ант ки улэман, хотсат улламан. Балдалдайка нарсъюх юкана улты питал. Хотанг нэнгал си потар иса хуллаллы. Шенгк аматал – куняр эвии Кока Ваняйн уты сир эвалт. Сора, сора Мийммии туты отат акатты питас. Еша паллыйл, моса пирась ики эвиел ант уллы. Катиел исимет иси вер моштал, кур хоса нэрасман, муркийл: «Тунг-нга сира моштатсан. Тунг-нга сира».

Мантсатан Кока Ваня кунярыел пилан ёхи. Кока Вань ики ун лованг ики, кул тушанг ики. Эвиел па айии, айии, нёлал лдопсах похлдыи. Курт хулды хуват шушлатан, понямал па лов карал кеша хасям кати лэнгкан лын юпанан наварал.

Ситы си яха улты питсат – Кока Ваня, куняр Мийммии па понямал па лов карал кеша хасям катии – Мурёнка. Ситы си уллат, Лэтот шитылылат, тасянга ант ювантылат, ал ант уллат – рупитлат. Кока Ваня алангсахат рупитты янгхас, Мийммии ёлан лат па соламат кавартас, катян нампар воой велас. Етан иса яха ёхатлат – ям па каш.

Пирась ики шенгк яма монсьты хошас. Мийммии па лув монсьлал саманга хулантас. Мурёнкайн па муркийс:

«Тунг-нга сира монсьлан. Тунг-нга сира».

Монсьтал юпийн, Мийммии иса инсясал:

– Сэр унт, морт унт оош эвалт потартса. Лув муй хорпи?

Кока Ваня мет олангна ант кашасяс монсьтыя, юухат кашасяс:

Сэр унт, морт унт оош па оошат хорпи ант ул. Лув ям пелак ёш тупайл селох тупа. Хотаси тупайл мува такан хатчаллы –сита тынанг кев оваммал, тынанг кев тыйл. И пуш пурмал и тынанг кев тыйл, кат пуш – кат тынанг кев, хота ар пуш курал такан хатчал – сита тынанг кев пайт опсатлат.

Ант ки, лулн, потартас, ямшак ус. Эвиелан куман ант мала, иса инсясла сэр унт, морт унт оош эвалт.

– Акайи, лув уун, ловатанг?

Кока Ваня ясанг сиран, палатал пал куранг пасан палат. Курлал-ёшлал васиет, охиел кеные.

– Акайи, лув онгат тайл?

– Онгат хоты, – ун ики нюхмас, – вантылангал онгат тайл. Ал оошат кат ёхартанг онгтат тайлат. Сэр унт, морт унт оошэн вет ёхартанг онгатнган тайл.

– Акайи, лув па хойтэт лэл?

–Лув ванши па юх лыптат лэл. Тал порайн пайт эвалт торн шуклэл.

– Акайи, тахты пунал па муй хорпи?

– Лунган, – ястал, – урты пунанг, Мурёнкаен хорпи, талан – хопша, евр сох пун хорпи.

– Акайи, лув эпланг?

Кока Ваня холна еша ликасяс:

Холся атом эпал ул. Ёшан тайты оошат сит эпал тайлат. Сэр унт, морт унт оошлув унт эпалан авлат.

Сусан Кока Ваня велпаслаты сонтамас. Вантты мосас маты пелдакан сяхратан оошал аршак. Мийммиел па лув пилалан манты уратал:

– Ма па нанг пилэнан янгхлам. Моса малувел хувалта вантлэм.

Кока Ваня си ястал:

– Хувлта си воой ант моштала. Ал унт оошат сусан онгтыет тайлат. Сэрак ант моштала хой камн ёхартанг онгат тайл. Талан сит хоты, па вер. Ал унт оошат талан онгат ант тайлат, сэр унт, морт унт оошиен – Селдох тупайен, – веккеша онгтанг, куш лунган, куш талан. Си порайн лувел хув таха эвалт шиялаты рахал.

Эвиел си яснга хулмас. Мийммие ёлан хасяс, Кока Ваня па унта манас. Ветлэм хатал кеман Кока Ваня ёхи ёхтас па Мийммаяла потартал:

– Там пуш, Хатл пала хунгхилыты пелдак сяхратан унт оош ар. Тала ил, тохи манлам велпаслаты.

– Хотсат, – Мийммии инсясял, – нанг талан унтан хоолты питлан?

– Сита, – ёхлы нюхмас акайл, – ма тал хотыи тайлам, торан сэварты харат лдеп. Ям хотыи, кур тайл, ишнийн верман. Сита ям.

Мийммии па инсясял:

– Акайи, Селох тупаен моса иси си пелакан сяхар тайл?

– Хойн вантса. Моса лув иси сита.

Мийммии па си ястал:

– Акайи, нанг манэм иси уйи! Ма тал хотэнан улты питлам. Сялта моса Селдох тупайи вана ёхатал – ма лувел вантлэм.

Пирась ики оланган ант кашасяс:

– Хоты исан! Хоты исан! Хотсат ай эвии тал кутан унт хуват шушилымал! Лохан мосал хошты, нанг па ант хошлан янгхтыя. Лонся лонглан холна. Хотсат, синганся, ма нанг пилэнан нэрыты питлам? Сялта иськийн моса пэвлайн!

Мийммии па си ястал:

– Акайи, уйи манэм. Ма лохан янгхтыя еша хошлам. Кока Ваня оланг сыс сикуш ант лытсаллы, ант лытсаллы эвиел тутлытыя. Юухат нумасал: «Мося тутлылэм. И пуш янгхал – кимет пуш па ант манал».

Кашасяс ун ики:

– Лукашал, янгхламан. Ситы ястатламан, унтан ант холлаты, кумлы ёхлы ант уратты».

Кутпанг кутпала талал си ёхтас. Каткан унта манты актасьты питсатан. Кока Ваня ёшан таллыты ухлал хушсаллы. Кат хир арат соорам нянь понас, пошкан пормасат па па лувел мосты отат. Мийммии иси лувел мосты пормасат охшам ёварыя потсаллы. Сяшкан щелдмат ус, аканьлал ернасан ёнттыя. Сохам пув понас интап пилан па ван кел шупии ус. «Моса, – нумасал, – там кел шупийн Селдох тупайи каталлэм? » Мийммии кател хайты сикуш ант лангхалас, па муй вертыя. Кател восьхиллы па потартал:

– Мин, Мурёнка, акайем пилан унта велпаслаты манламан, нанг па ёлан хася, нампарвоой вела. Туп мин Селдох тупайи шиялалэман, мохты ёхи илман. Селдох тупайи вантам сирэм иса нангэн потарлэм.

Кател лув пелайл вантал па муркийл: «Тунг-нга сира верлан. Тунг-нга сира».

Кока Ваня Мийммиел пилан шушмастан. Ванан улты мохилал вантэлан:

– Ошлы амуй питас, пирась ики! Симась ай эвии велпаслытыя, тал кутан, си туллы!

Туп, туп Кока Ваня Мийммиел пилан воош кимла питсатан, ампат сый хулсатан. Си ловатан хортты питсат, си ловатан щалдыты питсат, исимет каман сэр унт воой, морт унт воой шияласат. Ёхлы ангкармастан –сит нэш воош хулды кутап хуват Мурёнкайн нёхапал, ампат пилан кутармал. Мурёнкайн там пора унты нёхаянга па путаянга ис. Ампиетан ерты ант верытла, палман тайла. Мийммийнсикуш каталты учиса па ёхи тутыя. Па холся ула! Мурёнка унта ёхтас, унши юха нох хунгхас. Мана па катлы! Мийммийн сикуш вохилыса, ант верытса вана вохтыя. Муй вертыя? Еллы шушмастан. Вантатан – Мурёнкайн ситашак пунгалнашак нёхамтал. Ситы си велпаслаты хотэла ёхатсят. Ситы си хулмат велпаслаты хотэлан улты питсат. Мийммиел ястал:

– Тамиты хоты кашангшак ултыя.

Кока Ваня па ястал:

– Па хоты, мохты си кашангшак.

Катиян кур пунгалан, ил олмал, калдащ иты ларэмамал. Ситы сыянга муркийл: «Тунг-нга сира потарлан. Тунг-нга сира».

Си тал оош ар ус. Ал унт оош. Кока Ваня каашнг хатал итан-катанан мосятыйл, ёхи тутлыйл. Оош сох тэлыя акмас. Ар нёхи солыстан – ал ёш ухалан туты ант верытты арат. Мосал курта лоова янгхтыя па хууры хотась Мийммии кател пилан вотча хайтыя. Мийммии хоты утлас унтан улты, пирась икел хусьлаллы:

– Акайи, нанг лулн курта лоов вохты янгхсан. Сопаслам соланг нёхаен вооша туты мосал. Кока Ваня нох амтас:

– Муй хорпи нанг ошанг эвии, Дарья Григорьевна! Ун хоят иты нумаслан. Нанг, илампа, вотча хасьлан ки палты питлан?

– Хоты, муй эвалт палтыя! Хотэман холна верытал, евратан ант шукатла. Мурёнкаем па ма пилэман питал. Ант палтамалам. Нанг па сорашак ёхлы юва.

Кока Ваняйл манас. Мийммии ин Мурёнкайл пилан ёлан хасьсатан. Хатлалан хоты, Кока Ваня велпаслатал сыс, катнган уталсатан ёлан вотча омастыя. Патлдаты питас, палтапан ёхатты питса. Вантлаллы, Муренкайл олал – палты пела вер ант тайл, тыш ант тайл. Мийммии иси кашангашак ис. Ишни пунгла опсяс, кимлы ванты питас. Ванталан торн сэварты харат пелдак элты молты путы поталды ларытал ныла. Ванашак ларыяс па – унт ош улмал. Курыилал-ёшиилал васиет, охпушхиел кеныи, онгатнгалал вет нув тайлтан. Мийммии ким этмас ванттыя, сикуш вантыйс, вантыйс нэмалты антом. Лайласас, лайласас, ёхи лонгас па ястал:

– Илампа, ил воймтысайм. Улмисам, тангха. Муркайл муркийл: «Тунг-нга сира потарлан. Тунг-нга сира».

Мийммии кател пунгла олас па алангсахат унты ил войпса.

И хатал па хасяс. Кока Ваня ант ёхтас. Мийммии нопсал сикуш шакас па ант холлал. Мийммии Мурёнкайл восьхиллы па потартал:

– Катием, нанг, ал марэма! Халэват акаеман исипа ёхатал. Мурёнкайл мунты иты арыманшак муркийл: «Тунг-нга сира потарлан. Тунг-нга сира».

Мийммии ишнел пунгалан па еша опсас, хуусат пела еша вантас. Ил олты утчийс – хулталан хот пунглалан тупа сый сясял. Мийммии шенгк такан палтамас. Тупа сыйл кимет хот йирал пунглалансясьты питас, сялта ишни пелдка питас. Ишни пелдак эвалт хот оова ёхтас. Мет юухат хотлонгалан тупа сэкты сый сясьмас. Кен воой хотлонгла хухмал хорпи. Тыел-тохэл хотлонгал хуват нёхамтыйл.

Мийммии паси нумасал: «Моса ин молхатал сэр унт оошэм, морт унт оошэм ёхтас? »

Си ловат си ванты лытла, палты таха эвалт ант палал. Оовал пуншсаллы па – ин сэр унт оошиел, морт унт оошиел татаси воллы ваныенан лойл. Ёшал нох аламмал – ин пурмал, тум пурмал. Нох алмам ёшал селдох тупайнг, онгатнгалал вет нув тайлатан.

Мийммии ойя питас, ант уйтлаллы муй вертыя, ёш воой иты вохты питсаллы:

– Ме-ка! Ме-ка!

Сэр унт, морт унт оошалан няха пайтса, сялта керэмас па ел нёхамтас.

Мийммии ёхи лонгас па катела потартал:

– Вантсэм ма Селдох тупайи. Онатнгалал вантсам, селдох тупайл вантсам. Ант вантсэм туп хоты лув тупайл мува сэнгкал па хоты тынанг кев тыйлтал. Па ишан, илампа, эталталлы.

Мурёнкайл мунты иты арыманшак муркийл: «Тунг-нга сира потарлан. Тунг-нга сира».

Хулмет хатлал хасьты питас, Кока Ваняйл веккеша антом. Метшак марэматы питса. Сэм йингкал посыйл. Мурёнкайл пилан сикуш потарты учийс, каншэмаслы па катиел иси антом. Мийммии воллы палтамас. Хотал эвалт этас катиел канштыя. Атал этар, нови, хува ныла. Мийммии вантлаллы – катиел ванан торан сэврам харан омасял, лув ел пелдкалан сэр унт, морт унт оошиел лойл. Лойл па ёшал нох аламмал. Селдох тупайл тылась новина ал туп ворлыйл.

Муренка оошал пилан яха лойлатан, исимет потарлатан. Юухатшак торан сэврам хар тахайн наварты питсатан.

Сэр унт, морт унт оошал хухалал, хухалал, лоймтал па нутку тупайл мува сэкты. Мурёнкайл лув хосяйл вана манамтал, оошал па елшак хухалмал па нутку тупайл мува сэкты. Хув ситы лын торан верам харан хухатлыстан. Ант ныты питсайтан. Юухатшак па хотан пунгла ёхатсатан.

Сялта, сэр унт, морт унт оошиел хот лонгла нох навармас па сялта тупайл сэкты питсаллы па тутсултам иты тынанг кеват рыйты питсат. Урты, восты, хоймлдыпат па востылдыпат олдьпанг кеват ситы тыйлат.

Си кеман Кока Ваня ёхтас. Улты хотал моштаты ант верытлаллы. Ал ворлыйл, ситы ал лдямпийл, ар сыр олдьпанг тынанг кев пайн шошмами. Ситы си волдийл, ситы хорамал овал. Хот лонглалан сэр унт, морт унт оошал лойл па си селдох тупайл сэнгкал, си туп селдох тупайл пурантал. Тынанг кеват ситы си лдакки рыйлат.

Синганся Мурёнкайн сэр унт, морт унт оош пунгла нох навармас. Лув лдепал лоймтас, сыйнгат майкамтас па кател вантман кем си, оошан вантман кем си. Китантак оймласнган.

Кока Ваня мохты мил шупкем тынанг кев мила актамтас. Еша, лулн, па акатса па Мийммаялан ант эсалса, ястал:

– Акайи, ал кетмила! Халэват хатл новина вантлалламан.

Кока Ваняйн эвалмаса. Алангсахат си кулат лонсь питас па ин мунты тынанг кеват лдап питсайт. Сикуш лонсян хирыласлан па нэмолты ант мосятсатан. Елпи актам тынанг кевлан иси хува тарапсат.

Иса куш ям, туп катиян шалдь. Си юпийн Мурёнкайн вантыман антом, воойн иси сэма ант питылыйс. И пуш ёхтылыйс – мета, Турам эвалт муй вохла? Силта еллы, ин молха сэр унт оош, морт унт оош наврам торн верты харатан тынанг кеват мохэтан мосятыты питсайт. Ар пелдак тынанг кевал олдьпал востылдыптат хорпи. Хрезолдитата алдьсилайт. Ал вантылыслан?

Геннадий Кельчинна толдмащса