Песнь 5. Кондак, глас 8-й

Песнь 5

Ирмос: Вскую мя отринул еси от лица Твоего, Свете Незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.

Святителю отче наш Игнатие, моли Бога о нас.

Плачем и покаянием непрестанным душу твою снабдевая, отче Игнатие, делатель молитвы явился еси, сию от возраста младенческаго возлюбив, и в основание жизни духовныя положил еси.

Святителю отче наш Игнатие, моли Бога о нас.

Молитвою усердною житие твое от юности укрепляя, даже до кончины подвиг твой молитвенный ко Христу Богу соблюдал еси, имже о Бозе Спасе утверждаяся.

Слава: В возраст мужеский пришед, монахов начальник быв и многообразныя скорби испытуя, в молитве твердей и непрестанней многими слезами ослабу и отраду истинную почерпал еси, отче всеблаженне.

И ныне: Дево Пречистая, Мати Христа Бога, венец молитвы неусыпающия, о нас, грешных, мольбу Богу принеси и молением Твоим от напастей и скорбей нас избави.

Песнь 6

Ирмос: Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.

Святителю отче наш Игнатие, моли Бога о нас.

Явился еси учитель молитвы сердечныя, отче наш Игнатие, ясно наставляя, како должны есмы пред Лицем Христовым предстояти и молитву покаяния творити.

Святителю отче наш Игнатие, моли Бога о нас.

Подобает на молитве, поучал еси, отче, встати в лице прокаженных, слепых, глухих, хромых и тако ко Христу, от сердца сокрушеннаго, от нищеты духа нашего, молитву тщатися творити.

Слава: Егда тишина возвеет в сердце на молитве, поучал еси, отче, и мир ко всем, смирение, сострадание и любовь к человеком, тогда познаем, яко благодать Духа Свята сие содела.

И ныне: Мати Божия, Духа Святаго приятелище непостижимое, о смертных нас молися и молитву нашу к Богу управи.

Господи, помилуй (трижды). Слава, и ныне:

Кондак, глас 8-й

Аще и совершал еси стезю жития земнаго, святителю Игнатие, обаче непрестанно зрел еси законы бытия вечнаго, сему поучая ученики словесы многими, имже последовати и нам, святче, помолися.

Икос

Рекл еси, отче, в писаниих твоих, яко подобает имети страх Божий, дабы вступити в совершенство всех добродетелей, любовь Божию, тако Отцу Небесному уподобитися. Сему учению последовати и нам, святче, помолися.

Песнь 7

Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.

Святителю отче наш Игнатие, моли Бога о нас.

В зимнем обнажении ветвей древесных поучался еси, отче, тайне воскресения мертвых, якоже бо древо во время свое листвием покрывается, тако и кости человеческия оживут и, облекшеся плотию, в мир новый вступити имут.

Святителю отче наш Игнатие, моли Бога о нас.

Познал еси, отче, елико возможно, тайну кончины бытия человеческаго, тайну естества ангельскаго и души человеческия, и воздал еси благодарение Богу.

Слава: Единаго токмо Бога, Духа Истины, исповедал еси, Иже Един всесовершен есть, Емуже покланяющеся, тя, отче, величаем.

И ныне: Дево Марие, Мати Неизреченнаго Света, нас, грешных, от мысленных падений огради, Божественное же учение Церкве Святыя в сердцах наших укрепи.

Песнь 8

Ирмос: На горе святой прославльшася и в купине огнем Приснодевы Моисеови тайну явльшаго, Господа пойте и превозносите во вся веки.

Святителю отче наш Игнатие, моли Бога о нас.

Возлюбил еси, отче, служити братии словом Божиим, и бысть тебе служение сие в подвиг жития твоего, нам же в радование непреложное, вопиющим ти: не остави нас, отче, словом и молитвами твоими.

Святителю отче наш Игнатие, моли Бога о нас.

В служении Слову услышал еси в души твоей глас уверения во спасении, сего ради преискренне возлюбил еси ближних твоих и самое то Слово Божие.

Слава: Поучал еси ближних твоих, святителю, яко Спаситель наш есть Огнь Небесный, Иже и в словесех Его Евангельских действует.

И ныне: Мати Божия, Бога Слова рождшая, даждь слово рабом Твоим, еже сказати тайну всемилостиваго заступления Твоего, в тайне рождения Слова, Христа Бога, явльшуюся.

Песнь 9

Ирмос: Ужасеся о сем Небо, и земли удивишася концы, яко Бог явися человеком плотски и чрево Твое бысть пространнейшее Небес. Тем Тя, Богородицу, Ангелов и человек чиноначалия величают.

Святителю отче наш Игнатие, моли Бога о нас.

Многи труды и болезни подъяв в житии твоем, святителю всечестне, Кресту Христову, светло сияющу, поклонился еси и молитву твою ко Христу простерл еси.

Святителю отче наш Игнатие, моли Бога о нас.

Скорбьми обуреваемый, зрел еси в видении в келлии своей Странника, посетившаго тя. Откуду шествуеши? И где селение Твое? Почто доселе оставлял еси е? – сладце вопиял еси, отче, явльшемуся ти Христу.

Слава: В хождении пред Господем познал еси, отче, судьбы отечества твоего, таже и кончину твою ясно провидел еси, к Богу Слову, Христу возлюбленному, молитвенно устремлялся.

И ныне: Мати Божия, Сияние неизреченнаго Света, стопы наша к жизни вечней направи, прощающи вся злая, нами содеянная.

⇐ Предыдущая 1 23