Чинопоследование для поминовения усопших мирянами

Приложение

к Распоряжению по Кузбасской митрополии

об организации богослужебной жизни приходов в день Радоницы.

Чинопоследование для поминовения усопших мирянами

Кузбасской митрополии

Во имя Отца, и Сына, и Святаго Духа. Аминь.

Христос воскресе из мертвых, смертию смерть поправ, и сущим во гробех живот даровав(трижды).

Тропари, глас 4-й:

Со духи праведных скончавшихся, души раб Твоих, Спасе, упокой, сохраняя их во блаженной жизни, яже у Тебе, Человеколюбче.

В покоищи Твоем, Господи, идеже вси святии Твои упокоеваются, упокой и души раб Твоих, яко Един еси Человеколюбец.

Слава Отцу и Сыну и Святому Духу.

Ты еси Бог, сошедый во ад, и узы окованных разрешивый, Сам и души раб Твоих упокой.

И ныне и присно и во веки веков. Аминь.

Едина Чистая и непорочная Дево, Бога без семени рождшая, моли спастися душам их.

Кондак, глас 8-й:

Со святыми упокой, Христе, души раб Твоих, идеже несть болезнь, ни печаль, ни воздыхание, но жизнь безконечная.

Воскресение Христово видевше, поклонимся святому Господу Иисусу, Единому Безгрешному. Кресту Твоему покланяемся, Христе, и святое воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите вси вернии, поклонимся святому Христову воскресению: се бо прииде Крестом радость всему миру. Всегда благословяще Господа, поем воскресение Его: распятие бо претерпев, смертию смерть разруши.

Господу помолимся.

Господи, помилуй.

Помяни, Господи Боже наш, в вере и надежди живота вечнаго преставльшихся рабов Твоих (имена), и яко Благ и Человеколюбец, отпущаяй грехи, и потребляяй неправды, ослаби, остави и прости вся вольная их согрешения и невольная, избави их вечныя муки и огня геенскаго, и даруй им причастие и наслаждение вечных Твоих благих, уготованных любящым Тя: аще бо и согрешиша, но не отступиша от Тебе, и несумненно во Отца и Сына и Святаго Духа, Бога Тя в Троице славимаго, вероваша, и Единицу в Троице и Троицу во Единстве, православно даже до последняго своего издыхания исповедаша.

Темже милостив тем буди, и веру, яже в Тя вместо дел вмени, и со святыми Твоими яко Щедр упокой: несть бо человека, иже поживет и не согрешит. Но Ты Един еси кроме всякаго греха, и правда Твоя, правда во веки, и Ты еси Един Бог милостей и щедрот, и человеколюбия, и Тебе славу возсылаем Отцу, и Сыну, и Святому Духу, ныне и присно, и во веки веков. Аминь.

Слава Отцу и Сыну и Святому Духу, и ныне и присно и во веки веков. Аминь.

Господи, помилуй (трижды), благослови.

Молитвами святых отец наших, Господи Иисусе Христе, Боже наш, помилуй нас. Аминь.

Во блаженном успении вечный покой подаждь, Господи, усопшим рабом Твоим (имена), и сотвори им вечную память.

Вечная память (трижды).

Души их во благих водворится, и память его в род и род.