Ответ на сии вопросы [344 и 345].

Вопрос, 343.

Такоже и о печати сквернаго антихриста блаженный Ипполит предвозвещает: "и даст им знамение на руце десней и на челе, да никто же честный и животворящии крест сотворит десною своею рукою на челе, но связана рука его будет. и оттоле власти не имать знаменати своя уды, но прелестнику приложится, и тому единому послужит. печати же его, иже на челе и на десней руце, есть число 666". Вы убо сию печать, еже на челе и на десней руце, какую быти сказуете? и связание руки какое быти разумеете? явите с показанием от святаго писания.

Ответ, 343.

Понеже сей твой вопрос содержит два истязания. Первое: каковая есть антихристова печать. Второе: и что связание руки, от получения антихристовой печати.

И тако мы, по чину твоего вопрошения, и отвещание творити начинаем о печати антихристовой.

Первое: Аще, по блаженному Ипполиту, папе Римскому, во всем уподобится льстец Сыну Божию. Но во святей Божией церкви печать Христова (сия же и знамением нарицается) не единообразна суть. Но яко многоразличныя вещи и действа печатию нарицаются.

1: Нарицается крест Христов печатию. И сим ограждающиися, чрез двоеперстное сложение печатлеются. Еже и разньствоватися сим будут Христовы служители от антихристовых, якоже о сем нижеследующия свидетельства явят. Святый Иоанн Богослов во Апокалипсии пишет [глава 7]: "Сущее. И видех (рече) инаго ангела, восходяща от востока солнца, имущаго печать Бога живаго. и возва гласом велиим к четырем ангелом, имже дано бысть повредить землю и море, глаголя: не вредите землю, ниже море, ни древеса, дондеже запечатлеем рабы Бога нашего на челех их. От толкования: Сие зде блаженному указуется превышайшей святей силе, повелевающей казнителем святым ангелом ничто же соделати согрешившим, прежде даже познают истины служителей, запечатлением разделенных бывших. сие же аще и частне древле бысть веровавшим Христу, разорения Иоеросалима избегшым: но (убо якоже речеся) во время пришествия антихристова, наипаче будет печати животворящаго креста, отделяюще от неверных верныя, непосрамленне и дерзновенне знамение Христово пред нечестивыми носящыя". До зде Апокалипсис.

Сия же словеса апокалипсическия согласне древним, и от новых Стефан Рязанский взем от древних, протолкуя о положении печати Христовой на челе и на всех удех, сице глаголет [книга Камень веры, о кресте, часть 230, глава 2, лист 195]: "Андрей святый Кесарийский с прочими многими, словеса оная апокалипсическая толкует о знамении креста святаго, имже мы по древнему церкве православныя обычаю благочестне знаменуемся. и глаголет: яко во время антихристово сие знамение будет различия людей Христовых от антихристовых. Сия есть печать, о нейже Жених небесный к невесте своей глаголет [Песнь песней, глава 8]: положиши мя яко печать на сердцы твоем, и яко печать на мышцы твоей. Сия словеса Амвросий святый толкуя в книзе о Исааце, печать на сердце, печать на мышцах. на челе убо, яко да всегда его исповедуем. на сердце, яко да всегда его любим. на мышцах же, яко да всегда благая делаем. знамение на челе, яко на месте стыдения: да не стыдимся исповедати распятаго Христа, иже не стыдится братию нас нарицати. знамение на сердце, яко на месте любления: да возлюбим Его, возлюбившаго нас всем сердцем. знамение на мышцах, да поработаем Ему Господу нашему, и тяжесть крестную понесем на раменах наших. Сия наша есть печать, еюже от июдей и от язык разньствуем. сие наше есть знамение, от лобнаго места на лбы нашя пренесенное знамение во благо". До зде Стефан.

Сице рече Стефан (и не хотя наше возпроповеда) по древнему церкве православныя обычаю благочестне знаменуемся. Его же истолкование яве показа, яко печать сия есть символ самого Христа. Его же два перста сложа, два естества исповедающе, на себе крест воображаем. Тем же и глаголет о себе Христос: "положиши Мя".

О чем и святый Кирил в поучении 12 пишет: "не стыдимся (рече) исповедати Распятаго, на челе со дерзновение персты назнаменовати креста печати". А святый Петр Дамаскин во своей книзе пишет: "яко два перста (их же на крестное воображение слагаем) являют распятаго Господа нашего Исуса Христа во двою естеству". До зде святых учителей о печати христиан истинных. О ней же Ипполит пишет: яко антихрист во дни своя повелит не Христа, но Его печати отрицатися правоверным. А о печати антихристовой той же Ипполит пишет тако: "даде Господь верующым в Него знамение честный крест, подобне и той даст свое знамение". И святый Ефрем глаголет: "начертает змий свое знамение за крест Спасов". Явственно же в Велицем Катихисисе сказуется: яко кия не возносят узаконеннаго воображения крестнаго десницею на чело и на прочия уды, и тамо от тех и антихристовой печати приятие есть. О чем во главе 23 сице пишет: "иже не приемлют на себе Христова крестнаго знамения, сиречь десницею своею узаконеннаго воображения не возносят на чело главы своея и на живот, тако же на правое плече и на левое. аще убо реченнаго сего Христова крестнаго знамения не приемлют, то уже яве есть, еже имать прияти на чело свое и на десную руку антихристову печать, по реченному: идеже бывает света лишение, ту бывает тме пришествие". До зде Катихисис.

Пишет же в книзе польскаго наречия, именуемей Мессия правдиваго, о печати Христовой истинной, и о антихристовой ложной, сице: "яко Христос Мессия правдивыи, дал всем православным христианом пятно свое крест святыи, жебы его христиане при себе имели, и оным чело свое и члонки и инши жегнали, и его шановали. бо мы христиана правдиваго по тым познаваем, есть ли шанует крест святыи, и его при себе мает, и оным ся жегнает. а кто креста святаго не шанует, и оным ся не жегнает, и при себе не ховает, той не есть христианин, але есть альбо поганин, альбо жид, альбо геретик. так антихрист людем пятно свое будет давати, жебы на тое пятно глядучи, кождыи познавал, иже то суть слуги антихристовы". И паки в той же книзе пишет: "егда жид в божнице еллинской ночевал, и услышавши приход бесов, знаменал себе крестным знамением. тогда диявол, ощутивши его, возопи: горе горе, сосуд празден, но запечатлен". До зде из Мессии правдиваго.

Темже от вышепредложенных показася, яко и сия есть печать Христова, еже крест начертовати на всех удех тела двоперстным сложением, по древнему преданию, с проображением символа Божества и человечества: убо и антихристова печать, такоже во изображении будет являтися. Аще и не в подобном и неподобная, обаче, не по вашему мнению, чювственное начертание некое имети будет. А еже како новороссийская ныне церковь прияла в своем знаменовании, противном древлецерковному, изображати антихристову печать, зде за удолжением слова не вмещаем: но о сем глаголати имамы в 345-м, и прочих по нем ответех.

2: Нарицается печать и крещение Христово, о чем учители церковнии, якоже во святых книгах, тако и во историях засвидетельствуют: В Благовестнике, от Луки в зач. 79, на листу 165; От Иоанна, в зач. 36, на листу 170; в Лествице, на листу 84; Григорий Богослов, в слове 2, на святое Просвещение; в житии Варлаама и Иоасафа, ноября в 19, в поучении ко Иоасафу; в житии священномученика Феодора епископа Киринейскаго [Минея чет., Пролог]; в Потребнике, в чине крещения, в молитве пред крещением; в Минеи служеб., генваря 2 день; в Трипеснце на павечерн., песнь 8, стих 1. Во всех сих местех крещение Христово печатию нарицается. Убо и антихрист, хотящий Сыну Божию уподобитися, подобне будет иметь у себе такоже крещение, яже и печатию его нарещися имать.

3: Нарицается печать хиротония. Беседы апостольския, лист 1995.

4: Нарицается печать миропомазание. Матфей Иеросалимский, состав г, глава 12.

5: Нарицается печать покаяние. Лествица, лист 84.

6: Нарицается же ся печатию, или запечатлением, вера православно кафолическая. Якоже о сем святая церковь воспевающи глаголет [Кондак в неделю святых отец по пасце]: "апостольское проповедание и отец учение, церкви единою верою запечатле", и проч.

И иныя убо вещи деятельныя и видительныя, знаменающия печать, за множество оставляем.

Темже, якоже в церкви святей Христова печать многоразлична, и в многоразличных вещех и действиих духовных заключаема суть: тако убо и антихристова печать многообразна же и различна, и в различных вещех и действиях духовных нечювственне начертаема изобразуется. Якоже в толковании Апокалипсиса, и содержания ради жития нечестиваго и словеснаго и детельнаго исповедания, глаголется начертание антихристово на руце и на челе прияти. О чем в древлеписменном, инаго толкования на глав. 13, сице пишет: "аще кто озвершемуся тому антихристу повинется, и нечестиваго жития содержит, того образующее. или словом, или делом того исповесть бога, сие бо сказует на руце и на челе даемое начертание". И белорусских малых Апокалипсисах: "знак (рече) на руке и на челе, словом и учениом повиновенье". Златоуст же сказует, запечатление, яко ничесому же остати прочее. Маргарит, слово 3 на июдеи.

Второе: Какоже связана имать быти рука десная от печати антихристовой, и не имать власти знаменати уды своя честным крестом, на сие тако отсловствуем:

Понеже всякому есть ведомо, что всяк правоверный християнин приимет от Бога знамение честнаго креста от святаго крещения, якоже о сем пишет в слове о крестном знамении, во Псалтыри Иосифовских печатей. Чти тамо в надписании червленых слов. И крещением напечатлевается на души и на серце крещаемаго знамение Христово [Катихисис Бол., глава 61], которое не истреблено и неизменно пребывает. Но на небеси и на земли неотъемлемо есть.

Такоже и противный Христу антихрист, подобяся Сыну Божию, дает своим прельщенным свое знамение во своем крещении. Им же и напечатлевает на души и на сердце начертание зверино, которое не истреблено же и неизменно пребывает, на небеси и на земли неотъемлемо имать быти.

Аще ли же, по Златоусту, и по инем учителем церковным [Златоуст, Беседы апост., на Матф. нравоуч. 54. и Беседы апост. лист 1995. Пролог, март 13. Иосиф Фессал. в нед. 3-ю поста и Феодор Студит. Симеон Селун., глава 62. Кирил., лист 275], крещение крестом подобает восприяти, печать рукоположения крестом. Без того бо, рече, ни крещение, ни литургия не бывает, ни иная кая духовная вещь. Якоже тако и бысть, яже во Христовой церкви вся крестом Христовым совершахуся. Подобне и во антихристовой церкви знамением (аки крестом Христовым) крещение и вся тайны, и вся духовныя вещи совершаются, без того же (антихристова) знамения отнюд не бывают. А якоже, по святому Ефрему [слово 105], крещение святое знамением християньским нарицается, убо и антихристово крещение знамением антихристовым нарещися может. И якоже приимшии знамение Христово от святаго крещения, яко чада Христовой церкви, и наследницы царства небеснаго, область имут честным крестом знаменати своя уды: и тако уклоньшеся с пути противнаго, убегают и от лица лука. Якоже царственный пророк Давыд провозглашает: "дал еси боящымся Тебе знамение, еже убежати от лица лука". Приемшии же знамение антихристово от крещения, яко чада погибели, и наследницы вечных мук, область имут антихристовым знамением своя уды знаменати. И тако уклоньшеся пути праваго, шествуют путем противным, и не могут того пути убежати. Яко знамение сквернаго богоборца от крещения приемше и обносят, и удобь ведоми, и знаеми тому (по Ипполиту) бывают. И за еже яко не прияша сии крестом Христовым крещения святаго, совершаемаго во Христовой церкви, того ради не имут области и знаменати своя уды знамением Христа Спасителя, и связаны суть руце тех таинственне. Над сими бо область имеет диявол, по реченному во Апокалипсисе: иже не имут печати Божия на челех своих, сиречь невернии не крестишася во имя Отца, и Сына, и Святаго Духа, и не знаменани знамением честнаго креста, над сими область имеет диявол". И паки: "Еже бо умнии прузи уязвляют человеки подобно скорпиям: являет, яко на концы лукавых деянии, сокровена есть душевредная смерть. Ей же подлежат незнаменани божественною печатию на челех, и просвещением животворящаго креста, чрез Духа Святаго не облистаеми тако, яко по Владычнему словеси, ниже возсия свет их пред человеки, в славе божественнаго имене".

И от сих двою предложении ясное от писаний свидетельство, что есть печать, или знамение антихристово, или что суть связание десницы от получения оной. И прочее о последующих приятию оной, в пред идый, известити имамы.

Вопрос, 344.

И оная печать, заключающая число 666, убо ли ныне всюду распространися в куплях и продаяниях, понеже он (си есть антихрист) всюду распространити потщися?

Вопрос, 345.

И аще уже оная распространися, и на челе и на десней руце (заключающая число 666) дадеся, то кая сия? и от кого оная произыде? и кому дадеся? и в чем распространися? о всем сем тонкочастне Господа ради известите.

Ответ на сии вопросы [344 и 345].

В сих убо твоих сугубых вопросех пятогубное предлагается вопрошение.

1-е: Кая сия печать антихристова?

2-е: О кого оная произыде?

3-е: Кому дадеся?

4-е: В чем распространися?

5-е: Всюду ли распространися?

И тако по чину твоих истязаний, аще последнее и из перваго взято, в кратчайших беседах сице ответствуем.

Первое: Понеже мы везде должны поминати блаженнаго Ипполита. Ибо той, с ним же и преподобный Ефрем, антихристово действотворение на подобие Христово быти извествуют, якоже в варивших ответех многажды о сем упомянухом. Убо в вышшем ответе довольно от свидетельств священнаго писания подтвердихом, яко Христова печать многоразлична и в многоразличных действиях и вещех заключаема. Яко се глаголется печать крест Христов: глаголется крещение и прочия церковныя таины: глаголется же и вера православнокафолическая печатию. И якоже в деятельных, тако и в видительных печать Христова суть заключаема. Сице убо и печать антихристова в подобообразных вещех и действиях имать заключатися и рапространятися во всех его действиях и вещех, якоже о сем ниже в 4-м показании известится.

Второе: От кого же сия произыде тобою истязуемся. На сия 1-е отвещаем.

Блаженный Иоанн Богослов, во Откровении своем, во главе 16, о излиянии фияла от 1-го агела сице пишет: "яко 1 ангел излия фиял свой на землю, и бысть гной зол на человецех, имущих начертание зверино, и кланяющихся образу его". А в толковании того стиха протолкуется: "яко сие бысть во время первыя печати, егда июдеи твердовыи ослепоша, на них же бысть начертание зверя, сиречь дух антихристов". И в белорусском малом Апокалипсисе: "гной зол, затверденье сердца жидовския. альбо першее оскорбление церкве, за Христа и за апостол". Божественный же Златоуст в 3-м слове о июдеех глаголет, что есть запечатлетися? яко ничесому же остати прочее. До зде Златоуст.

Зри убо от кого первее начертание, или печать произыде уже, яко от июдеов, последовательне яко и от прочих еретиков, и от отступников (иже сии могут за антихриста рещися) уже произыде. Еже мы за долготу о излиянии всех фиалов, мимо грядем, точию о третием и пятом помянути к ключимому зде имамы. "И третий ангел (глаголет Иоанн Богослов) излия фиал свой на реки и на источники водныя, и быша кровь", и проч. Инаго толкования: "реки и источники водныя многажды писание наричет учение Господне, текущее от источника животнаго Господа нашего Исуса Христа. яко же сам рече: аще кто жаждет, да приидет ко Мне и пиет воду живу. апостол же учителей ложных наричет облаки безводныя сии же реки и источницы суть еретическая учения, плотская мудрствующе, и писание неправо сказующе: еже многажды сих и кровию наричет". Еще иное толкование: "еще же сим третием ангелом и излиянием фиалы его, являет смущение церкви Божией от ариан и прочих еретиков". "И пятыи ангел излия фиал свой на престол зверин, и бысть царство его омрачено. и жваху языки своя от болезни, и хулиша имя Бога небеснаго от болезни и язв своих, и не покаяшася от дел своих". Инаго толкования: "Являет же сим пятым ангелом, и излиянием фиалы его на престол зверин, сиречь на престол царства на востоце солнца Констянтинопольскаго, прежде наричемо Византии, воньже царь Констянтин от Рима престол свой пренес. егда же измаильтяне царство на востоце удержаша, в то время исполнися сие пророчество сего святаго евангелиста, иже глаголет: и пятыи ангел излия фиал свой, и бысть царство его омрачено, сиречь сквернаго Махмета и нечестивым неверием его". Вышше же вкупе о всех 7-ми ангел, и о разверзении печатей, и излиянии фиал, толкуется во втором толку, яко сие значит всех гонителей церкви Божией. До зде о фиалех.

Зри убо о сих, яко не на единех июдеех сие збудется, еже им начертание зверево прияти, но и на всех гонителей церкве Божия, еретиков и иных противников и отступников Божиих. И яко от всех сих печать антихристова широко распространися, и распространитися имать.

А еже како оная (печать антихристова) на число 666-е, по проречению блаженнаго Ипполита папы Римскаго [Соборник, лист 132], в здешних северных странах, в части Афетовой, распространися, о том яве познавается от сих великороссийския нынешния церкве действ и умствований. Ибо она, всеблагодатное двоперстное сложение, в нем же святии все добре веры таинство, самыя глаголем святыя и покланяемыя Троицы, и страшное Бога Слова вочеловечение, всеусердно исповедаху. Сие многобогатное обою таинств всесвятейшее исповедание, бывший Никон патриарх, злодерзестне с клятвословным поречением, и неисчетно презельным ругательством отвереже [Скрижаль, Соборн. свиток, Жезл, Предисловие в Служебнике, Предисловие Псалтырей]. И вместо того предаде знаменатися треми персты, в них же исповедание нововзаконенное изнесе, Троицу и воплощение в трех перстах истолкова, противно древлеправославной церкви, ратоборно со святыми богословцы предавшими вышеписанное перстов сложение, и в нем дву превеликих таинств исповедание. К сему же и на сем всеблагодатнем таинстве, дву естеств Бога Слова изображающем, оле дерзости, имя демонское написаша, и от черта сицевому великотаинственному изображению сказаша. Сие же ариевою пропастию, и волшебным знамением порекоша: и знаменающихся сицевым знамением, со дияволом осудиша [Розыск, глава 26. Обличение, лист 26. Увет, Обличение, Соборн. свиток, печати Иоакима патриарха. Соборн. деян. Предисловие Псалтырей].

А еже своим треперстным знамением на себе не крест Христа Спасителя, на нем же Его всеспасительная смерть содеяся, по святым богословцем воображати и таинства совершати, залогом веры умствуют: но некое четверторожие (сиречь четыре конца) изображающе, на себе печатлеют. Еже сице глаголюще [Предисловие Псалтырей. книга Жезл, лист 65. Камень, часть 2, глава 3, лист 253. Розыск]: "егда, рече, полагаем на главу, еже касается вышшии рог креста. егда же на чрево, нижний рог креста. тако же и на правое плече и на левое, еже знаменует оба конца". Сие же четвероконечие и в прочих своих тайнах: в крещении, миропомазании, в евхаристии и священстве, и иных, во освящении и в совершении, быти вероумствуют. Убо и сие их новопредание, елико святым богословцем, самый крест Христа Владыки на себе воображати научающих, противно [Ефрем, слово 102. Златоуст, в неделю 3 поста. Кирилова. Иосиф Фессал. Феодор]: еже исповедающим пречистаго Владыку страдавша не на виде некоем четвероконечия. толико и богогласнаго Исаии проречению на тредревесном, и по святых в четвертых имущем дщицу положенную, весьма несогласно: его же святая церковь воспевающи четверочастна, трисоставна, трисложна, и Троицы трисоставныя образ в себе носяща, исповедаше. Того святии учители, победоносное оружие на диявола, и на вся онаго противныя силы, похвалу же похвалам, и вышше всех похвал именоваху. Тем убо, яко образ живоначальныя Троицы носящим, всем тайнам: крещению, миропомазанию, и хиротонии, и иным всем вещем и действиям, освящатися и совершатися исповедаху. Сие убо видотворение на просфирах, уготованных к совершению пречистаго тела и животворящия крове, полагаху, и под сим пречестнейшим видотворением агньца закалаху. Ныне же оное всестрашное видотворение, от приносимыя просфиры на заклание агньца, вседерзостне отвергше, и с поречением впредь сему на просфирах полагатися отрекоша, глаголюще сице: "под сицевым воображением креста, не может быти истинное тело, и истинная кровь" [Соборный свиток, Присяга, Служебник новопечатный]. Вместо же того предаша просфоры печатати видом креста двочастнаго, с печатию четвероугольною, и надписанием Иисус. Исповедающих же согласно со святыми, тайнам совершатися трисоставным крестом Христовым, неисчетным клятвам и тяжчайшим анафемам предаша [Соборный свиток, Присяга, Соборн. деян. на Мартина еретика]. И прочая множайшая, паче же бесчисленная, нынешних никонопоследствующих учителей, на двоперстное сложение, и на трисоставный Христов крест, и на прочее церквосодержание, хуление и проклятие, за множество писати оставляем: изволяяй, да чтет 21 и 44 ответы. Иная же клятвохуления на древлепреданная содержания и таинства, в 353 ответе (о отрицании печати Творца неба и земли) изъявятся.

Темже явственно зде, збывшееся проречение Ипполита папы Римскаго, показуется на сих ратников Христовой печати и таинств церковных, сице глаголющее: "и даст тем льстец мало снеди, печати ради своея скверныя. и число печати его 666" [Соборник, лист 136].

Третие: А еже истязуеши, кому печать антихристова ныне дадеся? Отвещаем. Всем тем дадеся печать антихристова, кия имя отступническое на себе носят, и законом еретическим усердне последуют. Древлепреданное же самем Спасителем Исус Христом, и святыми апостолы, и учители церковными, со отвержением и клятве предают, яковии суть латыняне, люторцы и никонияне. Но и сии не не приемлют же печать сквернаго богоборца, иже от тех полученная тайнодействия, за святыя и правильныя почитают: якоже поповщина, в ней же и ты пребываеши: диаконовщина, старцовщина, нетовщина, ладожане: и прочии таковии, иже глаголются бегати от оных новопредания, а от тех тайны со усердием приемлюще, и с неприемлющими ратоборствуют. О сих бо явственне святый Ипполит глаголет [Соборник, лист 134]: "вси бо (рече) воеже бежати и скрытися тщатся, и нигде же возмогут убежати с пути сопротивнаго. но знамение его обносяще, удобь ведоми и знаеми тому явятся". И во Апокалипсисе о сих же глаголется [Апокалипс., глава 11, зач. 30 и 37]: "имя же пагубнаго на сердцах своих, яко честно начертавающе". Но о онех же в последующем ответе подобная возглаголется, ныне же грядем к показанию явленнейше рещи, в чем печать антихристова распространися.

Четвертое: Возлюбленный ученик Христов, во Апокалипсисе, во главе 37, пишет сице: "Даст начертание на десней руце их и на челех их, да никто же возможет купити ни продати, разве кто иматть начертание, или имя зверя, или число имене его". Толкование, ниже: "Начертание пагубнаго имене отступник на вся наложити потщится. на десницах, да добрых дел отсечен детели. на челех же, да научит в лести и тме прельщенныя дерзати. но не приимут его знаменании на лицах божественным светом. и число зверя распространити везде начнет, в куплях же и продаяниях", и прочая. Зде убо куплю и продаяние Богослов не внешнюю и чювственную назнаменовал, но духовную. Якоже и в толковании, что есть начертание на десных руках и на челех, явствуется. Не бо протолковася, по вашему мнению, чювственное некое пятно имети, покаряющимся антихристовым уставом, но отсечение добрых дел, и дерзостное во антихристовой прелести утверждение. И не чрез едино сие сказуется антихристовой печати восприятие, но чрез многия действа и вещи. И не едина сия глаголется быти, но многообразна. Якоже о различии печати антихристовой в 333 ответе глаголахом. Сице и о купле и о продаянии не о внешней и чювственной разумей, но духовное и мысленное. Еже бы купити, о сем Исаия глаголет: "и елицы не имате сребра, шедше без цены купите". О продаянии же: "сребро Мое даждь торжником, глаголет Господь. и купити, си есть научитися. давати же или продавати: учити". Темже и святый Богослов назнаменует, еже не о чювственной и внешней, но о духовной. Кая есть внешняя зде купля или продаяние? Аще от внешних глагол сей надлежит, то слыши вещающа апостола. "Писмо убивает, а Дух живит". Ибо купля деяти предана от Христа пастырем, получившим власть от хиротонии. Якоже вещает богогласный Лука [зач. 95]: "и призва десять раб, даде им десять мнас, глаголя: куплю дейте, дондеже прииду". На которое толкование творит святый Феофилакт [Благовестник, зач. 95, лист 206]: "рабом же своим десять мнас вда, раби же имже церкви поручи". И нижше: "Тем убо рабом раздавает десять мнас, дары реку, и комуждо даются на пользу". Посему тем куплю деяти, сиречь учити, и наставляти, или таинства раздавати дается. Прочее убо, якоже божественнейший вещает Ипполит, по всему убо хощет уподобитися льстец Сыну Божию: "и яко посла Христос апостолы, и той подобне послет ложныя апостолы. и яко Христос предаде строити пречистыя тайны наследником своим, и той подобне соберет". И паки: "И дарует тем (прельстившимся) льстец малы снеди, печати ради своея скверныя". Посему яве есть, яко купля и продаяние, еже учити и учитися, и восприятие тайнодействии. Темже и глаголет Андрей Кесарийский: "да не приимшым сие, от оскудения нужных насильная смерть приидет".

Пятое: Всюду ли печать антихристова распространися вопрошаеши? На что и отвещаем вкратце. Но где ныне царство антихристово не распространися: на западе ли? оное есть. На востоце ли? оное суть. На севере ли? И тамо по числу, еже о нем на 666-е, уже власть свою восприя. Что же рещи имам о юге, идеже Махометово царствие, идеже Персия и иныя государьства, не тому же ли ярму антихристову подклонишася. Убо и антихристову печать не чювственную, но мысленную, покаряющияся ему приемлют. Якоже премудрый Максим Грек, в толковании притчи о антихристе, глаголет: "О антихристове рожестве и явлении (весь) мир радуется: сиречь ожидающии его жидове, измаильтяне, и татарове, и вси имже подобни безвернии людие, мир нарицаемии". Глава 86. Прочее же о отступлении западных и северных стран, и о покорении антихристу, в 368-м ответе и в прочих рещи имамы.