Чүрек Судуру»

«Чүрек Судуру»

1) Эрте-бурун үелерден Тангыт (Энеткет, Санскрит) дылда:

«Бхагавати-Праджня-Парамита-Хридая» - деп,

Делгереӊгей, ханы мерген угаан чүрээ –

Тиилелгени чаяап чоруур Бурган-Ие.

2) Бодалда чок сөс-биле-даа сөглеттинмес,

Каптагайда үзүктелбээн, төрүттүнмээн,

Тодарады боду билген чечен-мерген,

Үш үеде Тиилекчиге мөгеер мен.

3) Буддаларныӊ, Бойдуларныӊ баарын орта,

Үш ал-бодум тейлеп алгаш, мөргүп ор мен.

Бир-ле катап мындыг төөгү дыӊнап чордум:

«Раджрагриха девискээри Дастар Даанга

4) Ыдык Лама Башкыларныӊ бөлүглели

Дээди Бойду-Садыларныӊ ниитилели

Чыглы берген черин орта, ол үеде

Бхагавати даяан кылып саадап орган.

5) Чаӊгыс угже кичээнгейин мөөӊнеп алгаш,

Ханы көстүг билиглерин хынай берген.

Чанын орта Бойду-Сады Махасатва

Арябала-Авалокитешваразы

6) Боттандырыг ханызынче кире бергеш,

«Беш чыындылар тускай боттуг чүүлден куруг

Болур!» дээрзин тодарадып, бадыткааштыӊ,

Эчис Сарыг Шажын билиин танып орган.

7) Будданыӊ күжү-биле Шаарий оглу,

Бойду-Сады Махасатва Арябала

Авалокитешварадан айтыра бээр

«Ызыгуурлуг бай өг-бүле ажы-төлү

8) Кандыг-ла бир оглу азы кызы дижик,

Күзээр болза Парамита судурунуӊ

Ханы утка-шынарынга чедер дизе

Ону канчаар боттандырар ужурлугул?»

9) Шаариниӊ оглунга кээп Бойду-Сады

Махасатва-Авалокитешваразы,

Айтырыынга шак мынчалдыр харыылап-тыр:

«Шаарий оглу! Ханы мерген угаан-билиин

10) Боттандырар үзели шын, ызыгуурлуг

Өг-бүлениӊ оглу азы кызы дижик.

Беш Чыындылар бот-тускайлаӊ чүүлден куруг

Болур дээрзин ылавылааш, билип алзын.

11) 1- Овур-хевир дээрге-ле куруг шынар.

Куруг шынар дээрге-ле овур-хевир.

Куруг чүүлден аӊгыланган хевир-даа чок.

Дүрзүлерден аӊгыланган куруг чүүл чок.

12) 2- Алыс барып миниишкиннер куруг болур,

3- Шак ол ышкаш ылгаашкыннар куруг болур.

4- Тургузуптар хөделиглер куруг болур.

5- Медерелдиг угаан-сарыыл куруг болур.

13) Шаарий оглу, шак мынчалдыр Сарыг-Шажын

Чырыткылыг оруктары хостуг болур.

Аразында ылгалы бээр чүзү-даа чок,

Тывылбас-даа, шак ол ышкаш эзилбес-даа.

14) Хирлиг эвес, шак ол ышкаш арыг эвес.

Чидириг чок, шак ол ышкаш орулга чок.

Ынчангаштыӊ Шаарий оглу эчизинде

Бодундан чок чүүлдерде 1-хевир шуут чок,

15) 2-Миниишкин чок,3-ылгаашкын чок,4-хөделиг чок,

5-Шак ол ышкаш бот-тускайлаӊ медерел чок.

1-Карактар чок, 2-кулактар чок, 3-думчук-даа чок,

4-Тускай дыл чок, 5-мага-бот чок, 6-угаан-даа чок.

16) 1-Овур-даа чок, 2-шимээн-даа чок,3-чытталыг чок,

4-Амдан-даа чок, 5-дегжиишкин чок, 6-эртемнер чок.

Көөрүнден эгелээштиӊ угаанга дээр,

Алды янзы медерелдиң кайызы-даа чок.

17) 1-Мугулай чок, мугулайныӊ чидери чок.

2-Кырыышкын чок, шак ол ышкаш өлүм-даа чок.

Кырыышкын-биле өлүм ийиниӊ соскаалы чок.

3-Човулаӊ чок, тывылдырар үндезин чок.

18) 4-Кежилиг чок, кежилдирер оруктар чок.

5-Мерген-угаан бойдузу боор чедиишкин чок.

Чедиишкин чок хире байдал база-ла чок.

Ынчангаштыӊ Шаарий оглу, мындыг болур.

19) Дээди Бойду-Садыларны алыр болза,

Чедип алыр чүү-даа чокта делегейге,

Мерген угаан Парамита Өөредиинге

Даянгаштыӊ чаӊгыс черге доктаай бээрлер.

20) Оларларныӊ угаанынга шаптыктаптар

Муӊгашталган моондак чок болганындан,

Дидим болгаш коргуушкун чок болганындан,

Дедирленир байдалдардан чайлап алгаш,

21) Ол-ла олчаан Чыргалаӊны чедип аарлар.

Шак ол ышкаш үш үеде саадап чоруур

Чырыткылыг Буддалар дөгерези,

Ханы Праджня өөредиинге даянгаштыӊ,

22) Аӊаа саадап чоруурундан эӊ-не бедик

Деӊнелге чок Оттуушкунну чедип алган.

Ынчангаштыӊ сактып ап көр, Шаарий оглу,

Ханы Праджня тариназы кайгамчыктыг.

23) Энежиг чок Дээди билиг тариназы

Оон бедик чүү-даа чогун бадыткапкаш,

Бүгү хинчек-човулаӊны оожургатты.

Меге чүүл чок ёзулуг шын болганындан

24) Мерген угаан ханы Праджня-Парамита

Тариназы шак-ла мынчаар номчуттунар:

«Дадията Ом-Гаде-Гаде-Парам-Гаде-

Парасам-Гаде-Бодхие-Суу-Хаа» (3,7,21,108 к)

25) Шаарий оглу, шак мынчалдыр Бойду-Сады,

Махасатва овурлары чыглып алгаш,

Ханы Праджня-Парамита билиглерин

Шиӊгээдип ап, билип чоруур ужурлуг бис!»

Ооӊ соонда Бхагавана - Будда Башкы,

Даамчырал-Саматхиден үнүп келгеш,

Арьябала-Авалокитешвара деп

Махасатва Бойду-Садыны мактай берген:

26) Эки-дир, оо, онза-дыр, оо, тулган-дыр, оо,

Ызыгуурлуг өг-бүлениӊ эне оглу,

Ындыг харын, шак-ла ындыг болур болгай.

Айтып берген аайыӊ-биле ындыг болур!

27) Шак ынчалдыр ханы Праджня-Парамита

Өөредиин боттандырар ужурлуг бис!

Ынчан шупту Татхагаттар өөрүй бергеш,

Сорук кирип, сеткилинден амыраарлар.

28) Кажан Будда Бхагавана бо сөстерни

Дастар Даанга илередип доозуптарга,

Шаарий оглу, шак ол ышкаш Бойду-Сады,

Махасатва-Авалокитешвара ийи

29) Кайызы-даа мага ханып өөрүй бээрлер.

Дастар даанга чыглы берген Бурганнары,

Деӊгерлери, Азарлары, Кижилери,

Чыдынгүүрлер ону дыӊнааш, сеткил ханып,

30) Будда Башкы Бхагаванныӊ сөзүн мактап,

Делегейже алдаржыдып тарап турган.

Мооӊ-биле делгем Мерген-Угаан чүрээ

Тиилелгени чаяап чоруур иевис дег,

«Бхагавати-Праджня-Парамита-Хридая» - деп

Улуг-Хөлге судур ному доосту берди.

«Сарыг-Шажын сайзыралынга» ай санында, бодунуң хире-шаа-биле өргүл кылырда, Тыва судурларның үндезилекчизи болур Ооржак Шолбан Башкының агар саны бо, 900:8(923)267-75-66. Бир болза, СБЕРБАНК, РСХБ картазының дугаарын айтырып ап болур силер. Өргүл кылыксавас кижиге, өргүл чоргузары албан эвес. Буян-Кежикти кижилерниң боттары чыып ап чоруурга, боттарынга эки болур!

«Тыва Судурларның» үндезилекчизи;

Лопсаң Карчен Башкы (Ооржак Эмей-оол Оглу Шолбан).

Чурттап чоруур Хүрээзи: Самагалдай суур, ул.Дружба-64.