Кано́н святого великому́ченика Пантелеи́мона пе́рвый на 4, глас 2.

Кано́н святого великому́ченика Пантелеи́мона пе́рвый на 4, глас 2.

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Припе́в: Велича́й, душе́ моя́,/ в страстоте́рпцех пресве́тлаго свети́льника.

Преста́вился еси́, ра́дуяся, к жела́нию коне́чному,/ иде́же всели́вся, преблаже́нне, блаже́нный коне́ц прия́ти вои́стинну сподо́бился еси́,/ сый со Влады́кою твои́м во ве́ки безконе́чныя.

Припе́в: Велича́й, душе́ моя́,/ безсре́бреников похвалу́ и украше́ние.

Жела́ние получи́л еси́ и любве́ твоея́ исполне́ние,/ ка́плющей еще́ те́плей кро́ви, за Христа́ излия́вшейся,/ от Него́же, ра́дуяся, прия́л еси́ венцы́ по́двигов твои́х.

Припе́в: Велича́й, душе́ моя́,/ цели́теля неду́жных, по зва́нии всех ми́лующаго.

Льво́в уста́ и звере́й зия́ния, я́коже Дании́л дре́вле, ты обузда́л еси́,/ весть бо стыде́тися, му́чениче, доброде́тели и безслове́сное естество́./ Те́мже тя, пресла́вне, соше́дшеся, ублажа́ем.

Припе́в: Велича́й, душе́ моя́,/ цели́теля неду́жных, по зва́нии всех ми́лующаго.

Бога́тную бла́гость тебе́ Христо́с да́рует,/ сокро́вище исцеле́ний нам да́руя/ и всеми́лостива изволе́нием тя пода́в вся́кому скорбя́щему,/ и приста́нище ти́хое, и предста́теля, и защи́тителя.

Припе́в: Велича́й, душе́ моя́,/ Чи́стую Де́ву и Еди́ну Богоро́дицу.

Богоро́дичен: Я́ко руно́, Всенепоро́чная, до́ждь Небе́сный во утро́бе заче́нши,/ нам родила́ еси́ тишину́ Даю́щаго/ я́ко Бо́га Того́ пою́щим/ и Тя, Всепе́тую Богоро́дицу, пропове́дающим.

Ин кано́н великому́ченика Пантелеи́мона на 4. Глас 4.

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,/ Чи́стая Присноде́во.

⇐ Предыдущая 9 10 11 12 13 14 151617 18 Следующая ⇒