Сия Вера апостольская, сия Вера отеческая, сия Вера православная, сия Вера вселенную утверди!

Последование

Соборнаго исповедания

Православния Святаго

Въ Неделю первую Святаго Великаго

Поста.

26/10 ноября 2008 г.

Начало Великого Поста.

По прочтении часов стоящу Архиерею на обычном месте в облачении исходят от олтаря Архимандрити, Игумени, Иереи и Диакони: иереи же износят икону Спасителеву и Богородичну, и полагают среди церкве на аналогии. (Аще же несть Архиереа – творится чин Последования молебного пения «О обращении заблудших», изданнаго отдельной брошюрой).

Протодиакон начинает: Благослови, Владыко.

Архиерей: Благословен Бог наш, всегда, ныне и присно и во веки веков.

Лик: Аминь. И поют: Царю Небесный:

Чтец: Трисвятое: Отче наш. Иерей: Яко Твое есть Царство…Чтец: Аминь. Господи помилуй (12). Слава, и ныне. Придите поклонимся… (трижды) и псалом 74: Исповемыся Тебе, Боже, исповемыся: Слава и ныне: Аллилуиа, аллилуиа, аллилуиа, слава Тебе, Боже: (трижды)

Таже диакон глаголет ектению мирную даже до: О плавающих, путешествующих: и абие прилагает сие:

О еже милостивым оком призрети на Святую Свою Церковь исоблюсти Ю невредиму и непреобориму от ересей и суеверий, и миром Своим оградити, Господу помолимся.

О еже утишити раздирание Ея, и силою Святаго Духа обратити всех отступльших к познанию истины, и сопричести к избранному Своему стаду, Господу помолимся.

О еже просветити мысли, неверием помраченным, светом Своего Богоразумия: верных же Своих укрепити и непоколебимых в правоверии соблюсти, Господу помолимся.

О избавитися нам: и дальше.

Заступи, спаси, помилуй:

Пресвятую, пречистую:

Архиерей возглас: Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков.

Лик: Аминь.

По сем: Глас 4-й, Бог Господь и явися нам, благословен грядый во Имя Господне.

Стих 1-й: Исповедайтеся Господеви, яко Благ, яко в век милость Его.

Стих 2-й: Обышедше обыдоша мя, и именем Господним противляхся им.

Стих 3-й: Не умру, но жив буду, и повем дела Господня.

Стих 4-й: Камень, егоже небрегоша зиждущии, сей бысть во главу угла: от Господа бысть сей, и есть дивен во очесех наших.

Таже тропари:

Благодарни суще недостойнии рабы Твои, Господи,/ о Твоих великих благодеяниях на нас бывших,/ славяще Тя хвалим, благословим, поем, и величаем Твое благоутробие,/ и рабски любовию поем Ти:// Благоутробне Спасе наш, слава Тебе.

Слава: глас 3.

Твоих благодеяний и даров туне,/ яко раби непотребни сподобльшеся, Владыко,/ к Тебе усердно притекающе,/ благодарение по силе приносим/ и Тебе, яко Благодетеля и Творца славяще, вопием:// слава Тебе, Боже Прещедрый.

И ныне: глас 4.

Якоже вышния тверди благолепие,/ и нижнюю споказал еси красоту святаго селения славы Твоея, Господи,/ утверди сие во век века,/ и приими наша в нем непрестанно приносимая Тебе моления, Богородицею,// всех Животе и Воскресение.

Протодиакон: Вонмем.

Архиерей: Мир всем.

Чтец: И духови твоему.

Протодиакон: Премудрость, вонмем.

Чтец: Прокимен, глас 4: Насаждени в дому Господни,// во дворех Бога нашего процветут.
Стих: Возвеселится праведник о Господе, и уповает на Него.

Апостол к Римляном, зачало 121 (глава 16, стихи: 16-20).
Евангелие от Матфея, зачало 75 (глава 18, стихи: 10-18).

По сем диакон ектению: Помилуй нас, Боже, по велицей милости Твоей, молимся Ти ся, услыши и помилуй.

По: Еще молимся о Православном Епископстве гонимыя Церкви Российския: присовокупляются сия:

Не хотяй смерти грешных, но ожидаяй обращения и покаяния, обрати всех отступльших, к Святей Твоей Церкви, молимтися, милосердный Господи, услыши и помилуй.

Устроивый мiр сей в славу Твою, сотвори да и противящияся Твоему слову обратятся, и вкупе со всеми верными истинною верою, и благочестием Тебе Бога нашего прославят, молимтися, всемилосердный Творче, услыши и помилуй.

Давый заповедь Твою нам, еже любити Тебе Бога нашего и ближняго своего, сотвори, да ненависти, вражды, обиды, мздоимства, клятвопреступства, и протчая беззакония прекратятся, истинная же любовь да царствует в сердцах наших, молимтися, Спасителю наш, услыши и милостивно помилуй.

Архиерей, возгласно: Услыши ны, Боже Спасителю наш, упование всех концев земли, и сущих в мори далече: и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем Отцу, и Сыну, и Святому Духу, ныне и присно, и во веки веков.

Лик: Аминь.

Протодиакон: Господу помолимся.

Лик: Господи помилуй.

И Архиерей глаголет молитву:

Всевышний Боже, Владыко и Содетелю всея твари, наполняяй вся величеством Твоим, и содержай силою Твоею! Тебе вседаровитому Господу нашему мы недостойнии благодарение приносим, яко не отвращаешися нас беззаконий ради наших: но паче предваряеши ны щедротами Твоими. Ты ко избавлению нашему послал еси единороднаго Твоего Сына, и благовестил безмерное Твое к роду человеческому снизхождение: яко хотением хощеши, и ожидаеши, еже обратитися нам к Тебе, и спасенными быти: Ты снизходя к слабости и немощи нашего естества, укрепляеши нас всесильною Святаго Твоего Духа благодатию, утешаеши спасительною верою, и совершенною надеждою вечных благ, и руководствуя избранных Твоих в горний Сион, соблюдаеши яко зеницу ока. Исповедуем, Господи, великое Твое и безприкладное человеколюбие и милосердие. Но видя многих поползновения, прилежно Тя, всеблагий Господи, молим: призри на Церковь Твою, и виждь: яко Твое спасителное благовестие аще и радостно прияхом, но терние суеты и страстей творит оное в некиих малоплодно, в некиих же и безплодно, и по умножению беззаконий овии ересьми, овии расколом противяся евангельской Твоей истине, отступают от достояния Твоего, отревают Твою благодать, и повергают себя суду Твоего Пресвятаго Слова. Премилосердный и всесильный, не до конца гневаяйся Господи, буди милостив, молит Тя Твоя Церковь, представляя Тебе Начальника и Совершителя спасения нашего, Иисуса Христа. Буди милостив им, укрепи их в правоверии силою Твоею, просвети им разумныя очи светом Твоим Божественным, да уразумеют Твою истину, умягчи их ожесточение, отверзи слухи, да познают глас Твой и обратятся к Тебе Спасителю нашему. Исправи, Господи, оных развращение и жизнь несогласную христианскому благочестию: сотвори, да вси свято и непорочно поживем: и тако спасительная вера укоренится, плодоносна в сердцах наших пребудет. Не отврати лица Твоего от нас, Господи, воздаждь нам радость спасения Твоего, подаждь, Господи, и пастырем Церкви Твоея святую ревность, и попечение об их спасении, и обращении заблуждающих, духом евангельским раствори: да тако вси руководими достигнем, идеже совершение веры, исполнение надежды, и истинная любовь: и тамо с лики чистейших небесных Сил прославим Тебе Господа нашего, Отца, и Сына, и Святаго Духа, во веки веков, аминь.

По сем протодиакон, взяв благословение от Архиерея, и став на уготованном месте, возглашает, косно и низким гласом:

Кто Бог велий яко Бог наш,// Ты еси Бог творяй чудеса Един.

И паки возглашает сие вышшим гласом: Кто Бог велий яко Бог наш:

Таже и третие сие возглашает, вышшим и светлейшим гласом: Кто Бог велий яко Бог наш:

Таже глаголет сия:

Православия день празднующе, православнии людие, наипаче прославим Виновника всех благ Бога, иже Сый благословен во веки. Сей Бог наш, промышляя и утверждая возлюбленное Свое достояние, святую Церковь, праотцев, преступлением отпадших, утешая неложным Своим словом, еще в Раи основание Ей положи: Сей Бог наш, руководствуя ко оному спасительному обетованию, не несвидетельствована Себе остави, но хотящее быти спасение провозвестил первее чрез праотцев и пророков, живописал различными образы: Сей Бог наш многочастне и многообразне древле глаголавый отцем во пророцех, в последок дний сих глагола нам в Сыне, Имже и веки сотвори, Иже возвести Отчее о нас благоволение, откры таинства небесная, увери силою Святаго Духа о Истине благовестия, посла Апостолы во весь Мир проповедати Евангелие Царствия, утверди оное различными силами и чудесы. Сему спасительному Откровению последующе, сего Благовестия держащеся, -

Веруем во Единаго Бога Отца Вседержителя, Творца небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, Иже от Отца рожденнаго прежде всех век: Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы, и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа, животворящаго, Иже от Отца исходящаго, Иже со Отцем и Сыном споклоняема и сславима, глаголавшаго пророки. Во едину Святую, Соборную и Апостольскую Церковь. Исповедуем едино крещение во оставление грехов. Чаем воскресения мертвых. И жизни будущаго века. Аминь.

Таже, косно и ясным гласом возглашает:

Сия Вера апостольская, сия Вера отеческая, сия Вера православная, сия Вера вселенную утверди!

Сия яко благословения отеческая к нам, сыновом, ревнующим тех благочестию, преходят, такожде и анафемы на досадителей отцов и презирателей владычних заповедей падают. Посему сообща вси, яко благочестия полнота, тем анафему, юже сами на ся возложиша, возлагаем тако:

Вся, яже на святыя патриархи Германа, Тарасия, Никифора и Мефодия, Игнатия, Фотия, Стефана, Антония и Николая писанная или реченная — анафема 3.

Вся, яже паче церковнаго предания и учения и установления святых и приснопамятных отец новоположенная и развращенная или по сем содеянная — анафема 3.

Приемлющим пришествие во плоти Бога Слова, зрети же на тое на иконе не хотящим, и сего ради являющих себя приемлющими глаголы, делом же спасения отрицающимися — анафема 3.

Пребывающим во иконоборческой ереси, паче же в христоборном отступлении и не хотящим ни моисейским законом, ни апостольским учением, ниже святых отец учениями от прелести своея обратитися ко спасению своему, но единожды себя самех к иудеям и язычникам приложжшим, ибо яко они на Первообраз хулят, так и сии чрез образ Его на Самого Изображаемаго хулу возносят; нераскаянно прелестию таковою одержимым яко члены согнившия и общаго телесе церковнаго отсекающии себе — анафема 3.

Разумеющим речения Божественного писания противу идолов яко противу честных икон Христа Бога нашего и святых Его — анафема 3.

Тем, иже разумно имут общение с теми, иже хулят и отвергают святые иконы — анафема 3.

Глаголющим христиан иконам поклоняющихся яко богам (сиречь протестантам, баптистам, адвентистам, пятидесятникам, лжеименным «свидетелям Господа», евангелистам, харизматам и иным) — анафема 3.

Аще кто не покланяется Господу нашему Иисусу Христу в иконе описанному по человечеству — анафема 3.

Злочестиво вводящим в православную и кафолическую Церковь учения еллинская о душах человеческих, о небеси и земле и иных творениих — анафема 3.

Предпочитающим безумную внешних философов глаголемую премудрость, и переселения душ человеческих в ину тварь приемлющим, или яко подобно безсловесным животным сии погибают, и сего ради Воскресение и Суд и конечное воздаяние отметающим — анафема 3.

Суетная учения еллинских философов приемлющим и не ради научения токмо им научающимся, но и мнением их яко истинным верующим — анафема 3.

Глаголющим, яко в конечное и общее Воскресение со иными телесы человецы востанут и осудятся, а не с нимиже в настоящей жизни скончашася, аки сим истлевшим и погибшим— анафема 3.

Приемлющим суетные глаголы, яко предбытие есть душ и яко конец есть мучению, или возстановление паки твари и вещей человеческих, и таковыми словесы Царство небесное совершенно упраздняющим, и не верующим, яко Царствие Христово вечное есть и неразрушимое, такожде и мучения во аде бесконечные— анафема 3.

Арию, первому на Бога хулу воздвигшему и ересиарху — анафема 3.

Павлу Самосатскому и Феодотиону, безумному Несторию, зломудрому Евтиху и Савеллию — анафема 3.

Не покланяющимся кресту Господа и Бога и Спаса нашего Иисуса Христа яко спасению и славе всего мiра, вконец разрушившему и погубившему хитрости и оружия врага и искупившему творение от идолов, но глаголющим его токмо тиранническое оружие быти — анафема 3.

Верующим, яко на всяк день приносимая священниками жертва токмо Богу Отцу приносится, а не всей Святей Троице, яко противовещателем священным и божественным отцем Василию же и Златоусту и прочим богоносным отцем — анафема 3.

Мудрствующим, яко в воплощении Бога Слова тело Господне бысть единосущно Богу и мнящим, яко обожение воспринятаго Христом человечества бысть пременение человеческаго естества в Божество — анафема 3.

Уничижающым святые Вселенские Соборы и презирающым священные и божественные каноны Святых Отцев наших, ихже Церковь Божия приемлет и ведется ими к истинному богопочтению — анафема 3.

Не следующым обычаем Церкве, иже уставлены быша на Седми Вселенских Соборех, такожде и Святей Пасце и месяцеслову, иже они правильно уставиша и предаша нам на последование, но желающым последовать новоявленной пасхалии и новому месяцеслову безбожных папских астрономов; и, противясь оным обычаем [Церкви], желающым ниспровергнуть и развеять догматы и обычаи Церкве, ихже мы от Отец прияхом - анафема 3.

Исповедующим свет Преображения Господня тварным — анафема 3.

Гонителем Христовы Церкве, нечестивым отступником, подъявшим руки на священнослужителей Божиих, поправшим святыни, разрушившим храмы Божии, истязующим братию нашу и осквернившим отечество наше, и преемствующим им яко властителем — анафема 3.

Теософом еретиком, дерзающим глаголати и пребезумне учити, яко Господь наш Иисус Христос не единожды на землю сниде и воплотися, но множицею вополощащеся, такожде и отрицающым, яко истинная Премудрость Отчая несть Сын Его Единородный и вопреки Божественному Писанию и учению святых Отец ищущим иныя премудрости — анафема 3.

Масоном, оккультистом, спиритом, чародеем и всем, иже не Единому Богу веруют, но бесов почитают, и не Богу смиренно жизнь свою предают, но чародейным бесов призыванием грядущее ведети тщатся — анафема 3.

Безумно утверждающим обновленческую ересь сергианства, учащым, яко земное бытие Церкви Божией может основано быти на отрицании истины Христовой, и утверждающым, яко служение богоборческим властем и верность их безбожным повелением, попирающе священныя каноны, святоотеческое предание и божественныя догматы и разрушающе все христианство, спасает Церковь Христову; и почитающым антихриста и слуг его и предтеч его и всех присных его яко законную власть от Бога; и богохульствующым противу новых Исповедников и Мучеников российских — анафема.

Вселукавому Сергию Нижегородскому, безбожным властем предавшемуся и от них главой нечестивого сборища поставленному и ради личнаго благополучия венца мученическаго отрекшемуся, и рекшаго себя быти патриарха Московскаго и Всероссийскаго, и всем того последователем — анафема.

Нападающым на Церковь Христову и учащым, яко она разделися на ветви, яже разнятся своим учением и жизнию, и утверждающым Церковь не сущу видимо быти, но от ветвей, расколов и иноверий соединитися имать во едино тело; и тем, иже не различают истиннаго священства и таинств Церкви от еретических, но учат, яко крещение и евхаристия еретиков довлеют для спасения— анафема.

Экуменическия ереси начальником и ересиархом новым, Мелетию Константинопольскому, Хризостому Афинскому, Никодиму Ленинградскому, Афинагору и Димитрию Константинопольским и всем единомудренным с сими, открытою главою исповедующым ересь экуменизма вкупе с прочими ересьми Лютора и Кальвина и дерзко возстающым на благочестие, оклеветующым и похуляющым святых Отец наших и святыя Соборы, и тако и каноном церковным насмеявшимся — анафема.

Исповедающим словом, сердцем и умом, в рукописании же и на иконах плотское Бога Слова пришествие — вечная память 3.

Ведущим, яко в одной и той же ипостаси Христове пребывают два различаемых естества, в одном Христе созданное и несозданное, видимое и невидимое, страстное и безстрастное, описанное и неописанное, и приписывающим божественному существу несозданное, невидимое, безстрастное и неописанное, человеческому же естеству — созданное, видимое, страстное и описанное, и исповедующим сие словом и в иконах — вечная память 3.

Освящающим словом уста и слух, и проповедающим, яко и честными иконами такожде освящаются очи зрящих, и ум воздвигается к боговидению, якоже и божественными храмы, и священными сосуды, и иными вещьми — вечная память 3.

Ведущим, яко жезл и скрижали, ковчег и светильник и трапеза и кадильница предызображаше Пресвятую Деву Марию Богородицу, но сии лишь образы Ея быша, Сама же Она не бысть сия, но бысть Дева и пребывает по Богорождестве Дева; и сего ради пишущим Ю на иконах паче яко Отроковицу, или в образех ветхаго завета — вечная память 3.

Ведущим, яко Сам Бог образами и знаменьми являл Себе пророком в видениих, и верующим, якоже пророческий лик видев научи, и изложенное чрез апостолов и отцов писанное и неписанное предание держащим и сего ради изображающим святая и чтущим — вечная память 3.

Разумеющим Моисея глаголющаго: внемлите себе, яко в день, воньже глагола Господь Бог в Хориве на горе, глас глаголов вы услышасте, подобия же не видесте; и ведущим отвещевати праве: аще видехом что, поистине же видехом, якоже громов сын нас научи, еже бе исперва еже слышахом, еже узрехом, еже видехом очима нашима и руки наша осязаша о словеси животне, и та свидетельствуем, и паки якоже и инии Слова ученицы: и ядохом с Ним и пихом не прежде страсти токмо, но и по страсти и воскресении; и тако разделяти от Бога данные предписание Закона и благодати учение — в том невидимое, в сей же видимое и осязаемое, и сего ради виденная же и осязанная иконописующим и покланяющимся — вечная память 3.

Посему проповедников благочестия братски и отцежелательне в славу и честь благочестия, о нем же подвизашася, воспроповедуем и глаголем: Герману, Тарасию, Никифору и Мефодию яко воистину святителем Божиим и Православия поборником и учителем — вечная память 3.

Игнатию, Фотию, Стефану, Антонию и Николаю, святейшим и православным патриархом — вечная память 3.

Исповедующим, яко Тело Господне причастися божественного достоинства и величества и бысть покланяемо единем поклонением в восприявшем оное Боге Слове, и единочестно, единославно, животворно, равнославно Богу Отцу и единопрестольно Всесвятому Духу — вечная память 3.

Приемлющым и неизменно хранящим Символ веры — вечная память 3.

Исповедающим Бога триипостаснаго, всесильнаго, несозданнаго не токмо по существу и ипостасям, но и по действу, и глаголющим, яко Божественное действо происходит от Божественнаго существа, происходит же нераздельно — вечная память 3.

Евфимию, Феофилу и Емилиану приснопамятным исповедником и архиепископом — вечная память 3.

Феофилакту, Петру, Михаилу, Иосифу блаженным митрополитом — вечная память 3.

Иоанну, Николаю и Георгию пребогатым исповедником и архиепископом и всем единомудрствовавшим им епископом — вечная память 3.

Феодору, всепреподобному игумену Студийскому, Исаакию чудотворцу и Иоанникию пророку — вечная память 3.

Симеону преподобному Столпнику, Илариону преподобному архимандриту и игумену Далматскому, Феофану преподобному игумену Великого Поля — вечная память 3.

Исповедавшым, яко не человецы спасают Церковь, и ничтоже пользует согласие со враги ея, но Церковь спасает человеков силою Христа Бога нашего, и тако противу поработителей Церкви Божией подвизавшымся — вечная память.

Тихону, святейшему патриарху Московскому и всея России исповеднику, славным мучеником и исповедником Петру Крутицкому, Кириллу Казанскому, Агафангелу Ярославскому, Иосифу Петроградскому, Виктору Глазовскому, Димитрию Гдовскому, Алексию Воронежскому, Нектарию Яранскому, Серафиму Угличскому и всем Новым Исповедником и Мучеником Церкве Российския, — вечная память.

Исповедующым по благочестивому мудрованию святых Отцев и Соборов, яко Церковь Христова едина чистая голубица, никогдаже разделися, но присно цела пребывает и неколебима, аще и мнози еретицы и раскольницы нападаху на ню, обаче со срамом от сея отпадоша, поколебати же никакоже возмогоша, и верующым во Едину, Святую, Соборную и Апостольскую Церковь, в ней же единей спасение обрести мощно есть, и исповедующым, яко вне Церкви Православныя несть спасения никомуждо, — вечная память.

Святейшым исповедником православия, противу новшествующих подвизавшымся, Хризостому епископу Флоринскому, Гликерию митрополиту Румынскому, Филарету митрополиту Нью-Йоркскому, новому исповеднику, противу ереси икуменизма добре подвизавшемуся, — вечная память.

Григорию Вашингтонскому, Леонтию Чилийскому, Аверкию Джорданвилльскому, Нектарию Сеатлийскому, Виталию Джерджиситскому и прочим иерархом Русския Зарубежныя Церкве, утверждавшим Православие — вечная память 3.

Всем же о Православии подвизавшымся словесы, писании, учении, страдании и богоугодным житием, яко защитником и пособником онаго, Христова Церковь восклицает:

Православным царем греческим Святому благоверному и равноапостольному царю Константину и матери его Елене,— вечная память 3.

Благоверному и равноапостольному великому князю Владимiру, благоверней велицей княгине Ольге, Ярославу, Георгию, Андрею Боголюбскому и прочим благоверным царем и великим князем, царицам и великим княгиням и всем от рода царей и великих князей российских преставльшимся — вечная память 3.

Герману, Тарасию, Никифору и Мефодию, приснопоминаемым патриархом Константинопольским, Александрийским, Антиохийским, Иерусалимским, о Православии подвизавшимся — вечная память 3.

Иову, Гермогену, Филарету, Иосифу, Иоакиму, Адриану, Тихону патриархом Всероссийским — вечная память 3.

Преосвященным митрополитам Антонию и Анастасию и прочим архиепископом, епископом и всем православным христианам Русския Зарубежныя Церкви, во православии скончавшимся — вечная память 3.

Пострадавшим и убиенным за православную веру и отечество князем, боляром, христоименитому воинству и всем православным христианом в истинней вере и благочестии и в надежди воскресения скончавшимся — вечная память 3.

Святая Троица прослави сих. Сих же страданьми за благочестие до смерти, и подвиги их и ученьми научитися и утвердитися Бога молящи и подобниками божественнаго их жития явитися до конца молящеся, да сподобимся и мы щедротами и благодатию великаго и перваго архиерея Христа истиннаго Бога нашего, молящеся Преславней Владычице нашей Богородице и Приснодеве Марии и боговидным ангелам и всем святым. Аминь.

Православная Христова Церковь, торжественно воспоминающе подвизавшихся во благочестии и сие всем своим христоименитым чадом к подражанию представляюще, имать такожде долг восхваляти подвиги сих, иже ныне спасительною верою и добродетелию приуготовляюще себе к вечному блаженству, утверждают Православие.

Православному епископству гонимыя Церкве Российския — многая лета 3.

Православным Первоиерархом Святых Божиих Церквей, право правящым слово Истины, преосвященным Митрополитом, Архиепископом и Епископом и всему освященному причту, Многая лета (трижды).

Благоверным людем страждущия страны нашея Российския во всех тяжких обстояниях их подаждь Господи на безбожническия козни крепость, от глада, губительства и междуусобных браней, благочестия же во Отечестве нашем возставление и Многая лета (трижды).

Всем православным хриистианом право содержащым спасительную Веру, храмостроителем, благочестия ревнителем, и всем повинующымся Христовой Церкве, Многая лета (трижды).

Посем Архиерей глаголет молитву:

Святая Троице, сих прослави и утверди даже до конца в Правоверии: развратники же и хульники Православныя Веры и Христовы Церкве, и не повинующымся Оней обрати, и сотвори, да приидут в познание вечныя Твоея Истины, молитвами Пресвятыя Владычицы нашея Богородицы, и Приснодевы Марии, и всех Святых. Аминь.

И по молитве сей абие Архиерей глаголет:

Слава Тебе Богу, Благодателю нашему, во веки веков.

Лик: Аминь.

И поет следующую песнь святаго Амвросия: во время же пения тоя Архиерее, Архимапдрити, и все священное собрание целуют святыя иконы на аналогиах.

Тебе Бога хвалим: Тебе Господа исповедуем: Тебе превечнаго Отца вся земля величает: Тебе вси ангели, Тебе небеса и вся силы, Тебе херувими и серафими непрестанными гласы взывают: свят, свят, свят, Господь Бог Саваоф, полны суть небеса и земля величества славы Твоея. Тебе преславный апостольский лик: Тебе пророческое хвалебное число: Тебе хвалит пресветлое мученическое воинство, Тебе по всей вселенней исповедует Святая Церковь, Отца непостижимаго величества: покланяемаго Твоего истиннаго и единороднаго Сына: и Святаго Утешителя Духа. Ты Царю славы, Христе: Ты Отца присносущный Сын еси, Ты ко избавлению приемля человека, не возгнушался еси девическаго чрева, Ты одолев смерти жало, отверз еси верующим Царство Небесное, Ты одесную Бога седиши во славе Отчей, Судия приити веришися. Тебе убо просим: помози рабом Твоим: ихже честною Кровию искупил еси. Сподоби со святыми Твоими в вечной славе Твоей царствовати. Спаси люди Твоя, Господи, и благослови достояние Твое: исправи я, и вознеси их во веки: во вся дни благословим Тебе, и восхвалим имя Твое во век, и во век века. Сподоби, Господи, в день сей без греха сохранитися нам: помилуй нас, Господи, помилуй нас, буди милость Твоя, Господи, на нас, якоже уповахом на Тя. На Тя, Господи, уповахом, да не постыдимся во веки, аминь.

Во время пения весь освященный собор целует Святые иконы на аналоях.

Мы призываем всех благочестивых и православных христиан: стойте твердо в том, еже вы приясте, в онем же вы рождени бысте и на онем же вы вскормлени бысте, а егда время и обстояние призовут к тому, излейте самую кровь вашу, дабы сохранить и Веру, преданную нам от Отец наших и сохранить ваше исповедание. Остерегайтесь таковых людей и бдите, дабы Господь наш Иисус Христос споборал вам. Да будет благословение нашего смирения на всех вас. Аминь.

Таже бывает обычный отпуст. И абие начинается литургиа: аще же изволит Архиерей, последование сие бывает и пред окончанием литургии предписанным же образом.

«Сия Вера апостольская, сия Вера отеческая, сия Вера православная, сия Вера вселенную утверди».

(Последование въ Неделю Православия).