Сла́ва Отцу́ и Сы́ну и Свято́му Ду́ху.

Сла́ва Отцу́ и Сы́ну и Свято́му Ду́ху.

Конда́к Беспло́тных, глас 2:

Архистрати́зи Бо́жии,/ служи́телие Боже́ственныя сла́вы,/ А́нгелов нача́льницы и челове́ков наста́вницы,/ поле́зное нам проси́те и ве́лию ми́лость,// я́ко Безпло́тных Архистрати́зи.

И ныне и присно и во веки веков. Аминь.

Конда́к хра́ма.

Проки́мен Беспло́тных, глaс 4:

Чтец: Проки́мен, глас четве́ртый:

Творя́й А́нгелы Своя́ ду́хи/ и слуги́ Своя́ пла́мень о́гненный.

Чтец: Благослови, душе моя́, Го́спода, Го́споди Бо́же мой, возвеличился еси́ зело.

Чте́ние Апо́стола:

Чтец: Ко Евре́ом посла́ния свята́го апо́стола Па́вла чте́ние.

(Беспло́тным: Евр., зач. 305, гл.2, стт.2-10):

Чтец: Бра́тие, а́ще глаго́ланное А́нгелы сло́во бысть изве́стно, и вся́ко преступле́ние и ослуша́ние пра́ведное прия́т мздовоздая́ние, ка́ко мы убежи́м, о толи́цем неради́вше спасе́нии, е́же зача́ло прие́мше глаго́латися от Го́спода, слы́шавшими в нас извести́ся, сосвиде́тельствующу Бо́гу зна́меньми же и чудесы́, и разли́чными си́лами, и Ду́ха Свята́го разделе́ньми, по Свое́й Ему́ во́ли? Не А́нгелом бо покори́ Бог вселе́нную гряду́щую, о не́йже глаго́лем. Засвиде́тельствова же не́где не́кто, глаго́ля: что есть челове́к, я́ко по́мниши его́? Или́ сын челове́ческий, я́ко посеща́еши и́? Ума́лил еси́ его́ ма́лым не́чим от А́нгел, сла́вою и че́стию венча́л еси́ его́ и поста́вил еси́ его́ над де́лы руку́ Твое́ю, вся покори́л еси́ под но́зе его́. Внегда́ же покори́ти ему́ вся́ческая, ничто́же оста́ви ему́ непокоре́но. Ны́не же не у ви́дим ему́ вся́ческая покоре́на. А ума́ленаго ма́лым чим от А́нгел ви́дим Иису́са, за прия́тие сме́рти сла́вою и че́стию венча́нна, я́ко да благода́тию Бо́жиею за всех вку́сит сме́рти. Подоба́ше бо ему́, Его́же ра́ди вся́ческая и И́мже вся́ческая, приве́дшу мно́ги сы́ны в сла́ву, нача́льника спасе́ния их страда́ньми соверши́ти

Чте́ние Ева́нгелия:(Беспло́тных: Лк., зач.51, гл.10, стт.16-21):

Ст.: Рече́ Госпо́дь Свои́м ученико́м: слу́шаяй вас, Мене́ слу́шает, и отмета́яйся вас, Мене́ отмета́ется, отмета́яйся же Мене́, отмета́ется Посла́вшаго Мя. Возврати́шася же се́дмьдесят с ра́достию, глаго́люще: Го́споди, и бе́си повину́ются нам о и́мени Твое́м. Рече́ же им: ви́дех сатану́ я́ко мо́лнию с небесе́ спа́дша. Се, даю́ вам власть наступа́ти на змию́ и на скорпи́ю и на всю си́лу вра́жию, и ничесо́же вас вреди́т. Оба́че о сем не ра́дуйтеся, я́ко ду́си вам повину́ются, ра́дуйтеся же, я́ко имена́ ва́ша напи́сана суть на небесе́х. В той час возра́довася ду́хом Иису́с и рече́: испове́даю Ти ся, О́тче, Го́споди небесе́ и земли́, я́ко утаи́л еси́ сия́ от прему́дрых и разу́мных, и откры́л еси́ та младе́нцем, ей, О́тче, я́ко та́ко бысть благоволе́ние пред Тобо́ю.

Многоле́тие:

Православное епископство Церкви Российския/ и господина нашего высокопреосвященнейшего митрополита Филарета/ Первоиерарха Православныя Российския Церкви/ и господина нашего Высокопреосвященнейшего Филарета,/ архиепископа Московского и Восточно-Российского/ настоятеля, братию и прихожан святаго храма сего/ и вся православныя христианы/ Господи, сохрани их на многая лета.

⇐ Предыдущая 15 16 17 18 19 20 21 22 2324