Поется Трисвятое.. Апостол дня. Ко Евреям, Зачало 319. Апостол мученице. К Коринфяном, Зачало 181

Поется Трисвятое.

Прокимен праздника, глас 3: Госпо́дь просвеще́ние мое́/ и Спаси́тель мой, кого́ убою́ся? Стих: Госпо́дь Защи́титель живота́ моего́, от кого́ устрашу́ся?

Мученице Татиане, глас 4: Дивен Бог во святых Своих,/ Бог Израилев.

Апостол дня. Ко Евреям, Зачало 319

Бра́тие, а́ще бы пе́рвый зако́н непоро́чен был, не бы второ́му иска́лося ме́сто. Укоря́я бо их глаго́лет: се дни́е гряду́т, глаго́лет Госпо́дь, и совершу́ на дом Изра́илев и на дом Иу́дов заве́т нов, не по заве́ту, его́же сотвори́х отце́м их в день, во́ньже е́мшу ми их за ру́ку, извести́ их от земли́ Еги́петския, зане́ ти́и не пребы́ша в заве́те Мое́м, и Аз неради́х о них, глаго́лет Госпо́дь. Я́ко сей заве́т, его́же завеща́ю дому́ Изра́илеву по о́нех днех, глаго́лет Госпо́дь, дая́ зако́ны Моя́ в мы́сли их, и на сердца́х их напишу́ их, и бу́ду им Бог, и ти́и бу́дут Мне лю́дие. И не и́мать научи́ти ко́ждо и́скренняго своего́ и ко́ждо бра́та своего́, глаго́ля: позна́й Го́спода, я́ко вси уве́дят Мя от ма́ла да́же и до вели́ка их, зане́ ми́лостив бу́ду непра́вдам их и грехо́в их и беззако́ний их не и́мам помяну́ти ктому́. Внегда́ же глаго́лет нов, обветши́ пе́рваго, а обветша́ющее и состаре́ющееся близ есть истле́ния.

Апостол мученице. К Коринфяном, Зачало 181

Бра́тие, поспе́шствующе мо́лим, не вотще́ благода́ть Бо́жию прия́ти вам. Глаго́лет бо: во вре́мя прия́тно послу́шах тебе́, и в день спасе́ния помого́х ти. Се ны́не вре́мя благоприя́тно, се ны́не день спасе́ния. Ни еди́но ни в че́мже даю́ще претыка́ние, да служе́ние безпоро́чно бу́дет, но во всем представля́юще себе́ я́коже Бо́жия слуги́, в терпе́нии мно́зе, в ско́рбех, в беда́х, в теснота́х, в ра́нах, в темни́цах, в нестрое́ниих, в труде́х, во бде́ниих, в поще́ниих, во очище́нии, в ра́зуме, в долготерпе́нии, в бла́гости, в Ду́се Свя́те, в любви́ нелицеме́рне, в словеси́ и́стины, в си́ле Бо́жией, ору́жии пра́вды десны́ми и шу́ими, сла́вою и безче́стием, гажде́нием и благохвале́нием, я́ко лестцы́, и и́стинни, я́ко незна́еми, и познава́еми, я́ко умира́юще, и се жи́ви есмы́, я́ко наказу́еми, а не умерщвля́еми, я́ко скорбя́ще, при́сно же ра́дующеся, я́ко ни́щи, а мно́гих богатя́ще, я́ко ничто́же иму́ще, а вся содержа́ще.

Аллилуиарий праздника, глас 4-й: Глас Госпо́день на вода́х, Бог сла́вы возгреме́, Госпо́дь на вода́х мно́гих.

Стих: Глас Госпо́день на вода́х, Бог сла́вы возгреме́, Госпо́дь на вода́х мно́гих.

Аллилуиарий мученице, глас 1: Терпя потерпех Господа, и внят ми и услыша молитву мою.

⇐ Предыдущая 123 Следующая ⇒