Канон святому пророку Науму

Канон святому пророку Науму

Припев: Святы́й прорóче Бóжий Наýме, моли́ Бо́га о нас.

Пе́снь 1.

Ирмо́с:Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Нау́ме, Бо́жиим пома́зався, богоприя́тне, Ду́хом и Сего́ благода́тию просве́щся, те́м, Боже́ственное прозре́ние ума́ твоего́ чту́ще, ублажа́ем тя́, всеизря́дне.

Свы́ше огласи́вши, проро́че, твою́ ду́шу, Ду́ха благода́ть проро́ческое де́йство досто́йно вдохне́ и богодохнове́нен язы́к тво́й устро́и, досточу́дне.

Орга́н яви́лся еси́, ударя́емь Ду́ха бряца́лом, ревни́теля Бо́га воспева́я и все́м веща́я Боже́ственнаго суда́ нелицеме́рие, достосла́вне.

Богоро́дичен:Преблагослове́нная Де́во Всечи́стая, ве́рою Тя́ и любо́вию, я́ко Бо́жию Ма́терь Честну́ю, пою́щия спаса́й от бе́д, реша́щи неукроти́мое свире́пство.

Пе́снь 3.

Ирмо́с:Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Прича́стием Животворя́щаго и Боже́ственнаго Ду́ха душе́ю бы́л еси́ богови́днейший: те́мже и да́льная я́ве все́м предвозвеща́ти Боже́ственным манове́нием ты́ предочи́стился еси́, богодохнове́нне.

Су́д на враги́ отмще́ния предзре́л еси́, блаже́нне богови́днейше, преоби́дящих нечести́вых Бо́жие долготерпе́ние, и ми́лость, и благосты́ню от неисце́льныя зло́бы.

Богоро́дичен:И́же дре́вле от небытия́ сотвори́вый вся́ческая, из Твоея́ святы́я утро́бы прохо́дит, Челове́к бы́в, Чи́стая, за человеколю́бие превели́кое Человеколю́бец, да челове́ки изба́вит.

12 3 Следующая ⇒