Святы́я великому́ченицы Екатери́ны и свята́го великому́ченика Мерку́рия

Святы́я великому́ченицы Екатери́ны и свята́го великому́ченика Мерку́рия

На Го́споди, воззва́х: стихиры святы́я, глас 1. Подо́бен: Небе́сных чино́в:

Днесь красу́ется град Александри́я,/ пелены́ твоя́, му́ченице,/ в Боже́ственнем хра́ме твое́м име́я прему́дро./ Те́мже и мы благоче́стно пра́зднуем,/ Екатери́но, па́мять твою́ честну́ю:/ моли́ся о чту́щих тя.

Екатери́ны па́мять ны́не пра́зднуим:/ та бо и́стинно вся вра́жия си́лы/ и сло́вом же и де́лом низложи́ кре́пко/ и ри́торское противле́ние./ Но моли́твами ея́ изба́ви ны, Бо́же,/ от безбо́жных враг.

Ра́дуйся, всесла́вная му́ченице Екатери́но честна́я:/ Сина́йская бо гора́,/ в не́йже ви́де купину́ Моисе́й неопали́му,/ в той Христо́с Богоуго́дное те́ло твое́,/ ны́не преложи́в, храни́т/ да́же до вре́мене втора́го прише́ствия Своего́.

И́ны стихи́ры му́ченика, глас 4. Подобен: Я́ко до́бля:

Поборе́нием Ду́ха, страстоте́рпче Мерку́рие,/ одоле́в проти́внаго,/ я́ко во́ин непобеди́мый,/ ору́жием ве́ры тьмы разу́мных му́ринов посе́кл еси́/ и, соверши́в твой по́двиг зако́нно,/ со все́ми страда́льцы венча́лся еси́,/ великому́чениче преблаже́нне.

С Небесе́ тебе́ А́нгел,/ я́звы твоя́ исцеля́яй,/ по́слан бысть ма́нием Боже́ственнаго Ду́ха:/ отне́леже исцеле́в, достосла́вне,/ рожны́ пробода́емь, льсти́вно разжже́нными,/ терпе́л еси́, пове́шен и протяза́емь,/ и к ка́мени привяза́емь тя́жкому,/ и кровьми́ твои́ми, му́чениче, облива́емь всю́ду.

Царю́ во́инствуя земно́му, Мерку́рие,/ от него́же де́моном повелева́емь жре́ти,/ Богому́дре блаже́нне,/ му́ки претерпе́л еси́,/ и попале́ние о́гненное, и ну́ждную смерть,/ и восте́кл еси́ ко Христу́, венцено́сец,/ и сочета́лся еси́ му́чеников стадо́м,/ о ми́ре моля́ся.

Сла́ва, глас 2:

Ра́достно к торжеству́ Богому́дрыя му́ченицы Екатери́ны стеце́мся,/ о мучениколю́бцы!/ И ту́ю похвала́ми, я́ко цве́ты, увязе́м,/ ра́дуйся, вопию́ще ей,/ я́же лжи́вых ри́торов свирепоу́стие обличи́вши,/ я́ко ненаказа́ния испо́лненных,/ и ты́я к ве́ре Боже́ственней руково́дствовавши./ Ра́дуйся, я́же те́ло многоплете́нным му́кам вда́вши/ любве́ ра́ди Творца́ твоего́,/ и не низложи́вшися, я́ко отрокови́ца неги́блема./ Ра́дуйся, я́же го́рняя пребыва́лища, возме́здие боле́зней насле́довавши,/ и сла́вы ве́чныя наслажда́ешися./ Ея́же жела́юще, песнопе́вцы твои́,/ наде́жды да не отпаде́м.

И ны́не, глас 8:

По Рождестве́ Твое́м, Богоневе́сто Влады́чице,/ пришла́ еси́ в храм Госпо́день/ воспита́тися во свята́я святы́х,/ я́ко освяще́нна;/ тогда́ и Гаврии́л по́слан бысть к Тебе́, Всенепоро́чней,/ пи́щу Тебе́ принося́:/ Небе́сная вся удиви́шася,/ зря́ще Ду́ха Свята́го, в Тя все́льшася./ Те́мже, Пречи́стая и нескве́рная,/ я́же на небеси́ и на земли́ сла́вима,/ Ма́ти Бо́жия, спаси́ род наш.

На литии́ стихи́ры, глас 1:

Я́ко на тве́рдем ка́мени/ испове́дания Христо́ва,/ водружена́ бы́вши, Екатери́но всехва́льная,/ гони́теля льсти́ваго во мра́це погрузи́ла еси́/ и вене́ц побе́ды досто́йный восприя́ла еси́.

С Вы́шними чи́нми сочета́лася еси́, сла́вная,/ мир оста́вльши и Христа́ возжеле́вши,/ Екатери́но всечестна́я,/ проси́ нам ве́лия ми́лости.

Глас 2:

Я́ко алава́стр ми́ра,/ кровь твою́ принесла́ еси́ Жениху́ твоему́, Христу́,/ Екатери́но му́ченице, страстоно́сице непобеди́мая,/ возме́здие же прия́ла еси́,/ вене́ц нетле́нный от Него́, досточу́дная./ Те́мже и началозло́бнаго врага́/ кра́сными твои́ми нога́ми попра́ла еси́,/ призыва́нием спасе́ннаго И́мене Иису́са Христа́,/ сего́ ра́ди и в Небе́сных черто́зех водвори́лася еси́,/ я́ко де́ва и му́ченица Христо́ва многострада́льная.

Глас 4:

Сла́вим Твое́ мно́гое, Христе́, благоутро́бие,/ и бла́гость на нас бы́вшую,/ я́ко и жены́ разру́шиша лесть идолобе́сия/ си́лою Креста́ Твоего́, Человеколю́бче,/ мучи́теля не убоя́шася, попра́ша льсти́ваго,/ возмого́ша же в след Тебе́ идти́/ и в во́ню ми́ра Твоего́ потеко́ша,/ моля́щеся о ду́шах на́ших.

Сла́ва, глас 6:

Одесну́ю Спа́са предста́ де́ва,/ и страстоно́сица, и му́ченица Екатери́на,/ оде́яна в непобеди́мое доброде́телей,/ и приукра́шена ма́слом чистоты́ и кро́вию страда́ния,/ и вопию́щи к Нему́ в ра́дости,/ свещу́ свою́ иму́щи:/ в во́ню ми́ра Твоего́ теко́х, Христе́ Бо́же,/ я́ко уязвля́юся Твое́ю любо́вию аз,/ не отлучи́ мене́, Женише́ Небе́сный./ Тоя́ моли́твами,/ посли́ нам, всеси́льне Спа́се, ми́лости Твоя́.

На стихо́вне пра́здника, глас 1. Подо́бен: Небе́сных чино́в:

Прииди́те, празднолю́бцы вси,/ пе́сньми почти́м еди́ну Богоро́дицу/ Чи́стую и Де́ву:/ вво́дится бо в храм Бо́жий,/ в нем жи́ти ны́не све́тло,/ святе́йший вои́стинну Христо́в храм,/ и ра́дости вся́кия Хода́таица.

12 3 4 5 6 7 8 9 10 Следующая ⇒