НОМИНАЦИЯ «ПОЭЗИЯ» (на крымскотатарском языке)

Эдип Эмирнинъ терджиме-и алы /Муэллиф Али Акчурин/(с. Воинка Красноперекопского района, Республика Крым, Россия)

НОМИНАЦИЯ «ПОЭЗИЯ» (на крымскотатарском языке)

Подноминация «ЛЮБОВЬ»

1. Садедиль

Шеэр козьлерини ача, менде къалмады меджал.

Чал сачларым артты, сыджакъ джаным сувуды бир парча.

Сыр ача тена аралыкълар ве бош копюр.

Къонъур тюслю олур бу юрт, сен сейирге буюр.

Оюн-айын олмаз, бу шеэр джиддийнинъ сою.

Къою къара, не истесе япа, сиз исе тоюнъ.

Чюнки ачькозьленмек севесиз де, сен де севин достум.

Баягъы осьтюн, менден устюн, барсын ойле олсун.

Сув, отьмекчюн къарардан къайгъыра

Ферасетим. Акъылгъа загар, яра дай пара

Раатсызлата, сарошлата губ шарап

Мен ичмесем де, сарош дай юрерим иш арап.

Ич бир иншаат, мени къанаатлендирмез

Чюнки омрюм беклемеген бир кетишат.

Бунуньки бу иншам нефретиме шаат.

Ишан, фикиримде бир шан олса да, нуткъум перишан.

Адым джанлы нишан, мен кетсем, индемез бу дюнья.

Демек, дюнья кетсе, меним къасеветим зая.

Бу алынма - таянч, амма онъа ишанч.

Эп эксиле, унутмакъ - эм зеэр, эм де илядж.

Лякин битер бу оюн, бу омюр.

О бетер олур, беклер бизни керчек юрт.

Унутмам буны, тюркюм битсе, укюм сюрер сюкют.

Лякин берекетли арекетлернен Пекине умют.

Дюн мен сют ичкен эдим, ярын къабримде къурт

Имени кемиреджек, яхут мешур сур мевджут олгъан

Эр шейге огют берер, бу эски хабер

Бунынънен битер бу оюн, бу омюр битер.

Алдат мени алдат, риджа этем алдат!

Сойле ки, мени къуртараджакъ низам ве иджат.

Джан санъа берейим, эй хайын бир къыз,

Ырсызлыгъыны гизле ве биль, къалмазсынъ янъгъыз.

Агъыз ачырткъансыз, артыкъ гонъюлюм къансыз.

Къалды из менден сонъ, онынъ ады да къаргъыш.

Къарлы бир къыш яваш кельмекте,

Мен сес эшитем:"Балам, кель мектепке".

Багъышланъыз бабам, огълунъыз нелер япа?

Бахт олгъан ерде, инатланып веба тапа.

Ве башкъалар куле, ве башкъашлар ура.

Сиз исе дува этесиз ки, шифалансын яра.

Не гузель темаша, эр кес шаннен талаша!

Бир бинъ рубледен сатыл да сен, ашынъны аша.

Шарт олгъан бир шей къалды, фикиринъ олса къалын.

Балынъ татлы олмаз, фикирлер фияты палы.

Битер бу оюн, бу омюр.

О бетер олур, беклер бизни керчек юрт.

Унутмам буны, тюркюм битсе, укюм сюрер сюкют.

Лякин берекетли арекетлернен Пекине умют.

Дюн мен сют ичкен эдим, ярын къабримде къурт

Имени кемиреджек, яхут мешур сур мевджут олгъан

Эр шейге огют берер, бу эски хабер

Бунынънен битер бу оюн, бу омюр битер.

Акъмесджит, 2014 с.

2. Биз иле

Эр бир кунюм,

берильген эр бир сёзюм.

Бутюн омрюм умют иле толсун.

Кучьлю буюк арзум,

Оны кимсе ёкъ этмез.

Бахтлы олсун

Миллетимден эр кес.

Буюк айлем болюнмесин

Ве юртумда сербест еллер эссин.

Юреклер темиз олса

Дюньяда эр бир инсан

Унутмаз недир инсаф

Бу несиль гуя алев

Къаранлыкъ кельсе биле

Келеджек кунь биз иле

Илянлар ялан

Бирликте бир къуввет бар

Де:"Виджданлар олса, тюшер дивар"

Мави коклер биле

Бу эдждадымнынъ ери

Ве аилем мындан къайтмаз кери

Бизге ярдым этер тасиль

Азиз юртны севе бу яш несиль

Бир айлемиз

Бир миллетмиз

Бир ёлнен де кетеджемиз

Бираз беклемек керек олса

Бизлерге сабырны огретир эзан

Инанам...

Акъмесджит, 2015 с.

3. Акъкъыны элял эт

Кельмесейди бу эфкярлы ильк кузь авасы,

Яз куньлерде севгинъ къалды, эм тынды сесинъ.

Алтын олып ерни саргъан япракъ ортюси,

Кедерлеринъни йымшатсын, нечюн корьмейсинъ?

Сарарып солды орманлар, багъчалар сусты,

Фуртуна эли эгленмей, тынч денъиз асты.

Атешли эллеринъ нерде, нерде леблеринъ.

Ольдюрсенъ мени, беклетме, балдыр зеэринъ.

Билем энди ки, бу севги хата.

Меним сонъки сёзюм:"Веда"! "Эльвида"!

Сенинъ ичюн севги бир эглендже,

Айыбынъны сакълар гедже. О кечер!

Янъы яр ве янъы айрет, янъы гъайрет иле,

Янъы гъае келе, ама айны фертлерден ибарет,

Сенинъ даиренъ. Барем унут, не демек акъарет.

Къудрет бите... Бирер нур багъышлап, тюше арарет.

Арткъа бакъмаздан кет, шикяет бетер этер,

Вазиетни. Екюнлене омрюмде даа бир перде.

Багъчаларда сыкъ корюшкен эдик, не языкъ. Артыкъ

Акъшамларымызны айдынлатмаз янъгъыз ышыкъ.

Ашыкъ олгъан эдим, энди бильдим, фикринъ янълыш!

Къыш кельсе де, озюме айтмам: "Онъа алыш"...

Севги алыш-вериш, не берсенъ, ону аладжанъ.

Севги келирми, мени корип, дуймасанъ эеджан?

Зорнен ачкъан гуль къокъумаз, башкъа сёзлер арткъач.

Билем, сени бахт ве част беклей, амма бу месадж

Косьтерди ки, сенде ёкътыр тадж, адалетни иссет.

Сагъ ол, бар ол. Акъкъыны элял эт.

Бу омюрде севги бир ёлджу,

Амма не ичюн?

Мен бир озюм. Корюнмей юзюнъ,

Бош умют ольсюн.

Акъмесджит, 2013 с.