Сельков Иван Михайлович «Миян Чуклöм (Чуклöм вöлöстьлы 400 во тыригкежлö)» гижöдысь юкöнъяс

Сельков Иван Михайлович «Миян Чуклöм (Чуклöм вöлöстьлы 400 во тыригкежлö)» гижöдысь юкöнъяс

Кыдзи паныдалiс Чуклöм война йылысь юöр, казьтылö Иван Кириллович Сельков, Важ Чуклӧмысь 83 арӧса олысь:«1941вося тулыс ёнакодь нюжалiс. Кöдзыд зэръяс да ва муяс вöсна сулалiсны кöдза уджъяс. Но юньын пуксисны зэв шоныд лунъяс, да юнь шöрнас нин гöра-кöдза помасис. Зэв мичаа петiсны медводдза кöдзаяс. Кутiм лача бур урожай вылö. Вöлi нин дасьтысям петны силосуйтчыны. Юнь 22-öд лунö ме дорö зэв водз котöрöн локтiс сиктсöветса секретар Сажин Феодосий Михайлович Важ Чуклöмысь. Сiйö висьталiс меным, мый радио пыр юöртiсны война заводитчöм йылысь, да водзö котöртiс сельсöветса Чоййылö. Ме мöдöдi нарошнöйясöс ылi бригадаясö Понöльмылькйö, Важпущупö да Подечшорö висьтавны бригадиръяслы война пансьöм йылысь, да мед вайöдöны йöзсö правленье дiнö собрание вылö. Кык-ö-куим час мысти локтiс морт сизимдас кымын. Шöйöвошöм, зумыш чужöмаöсь, ставныс лöня сёрнитiсны война да водзö олöм йылысь. Лун куим бöрын ме да колкозса бригадиръяс-Сергей Öльöксан, Падей Мишка, Ёгор, Павел да Васька Öньö мунiм война вылö. Ме кындзи на пиысь бöрсö некод эз лок».

Висьтасьӧ Иван Кириллович Сельков:«Чуклӧмысь медводдза партия, 57 мортӧс, нуисны война вылӧ 1941 вося июнь 26 лунӧ. Некымын лун мысти Коми АССР-ысь став мобилизуйтӧм йӧзкӧд миянӧс вайисны Грязовецк карӧ. Лун-мӧд бӧрын миянлы сеталісны винтовкаяс вит патронӧн. Июль нёльӧд лунӧ кык эшелонӧн нуисны Эстонияӧ. Нарваӧ воӧм бӧрын войнас мунім километр ветымын кымын да воим 125 стрелковӧй дивизияса полевӧй штабӧ, коді, вӧлӧм, отступайтӧ нин. Найӧ сулаліснывӧрса ыджыд кушинын, куим стрӧйбаын, Нарва юсяньыс километраджын ылнаын кымын. Миянысь котыртісны штабнӧй рота. Куим лун чӧж Нарва ю пӧлӧныс ми перъялім окопъяс да траншеяяс, сідз шусяна оборонительнӧй рубеж. А енэжӧдыс тшӧкыда лэбалісны немечлӧн самолёт-разведчикъяс. Уськӧдны найӧс винтовкаӧн эз удайтчывлы. Нёльӧд суткинас асывсяньыс заводитчис штаб да расположение кузя артиллерияӧн лыйлӧм. Регыд штаблӧн куимнан стрӧйбаыс кутіс сотчыны. Фашистъяс локтісны миян вылӧ, а луншӧр гӧгӧрын босьтісны миянӧс кытшӧ быд боксянь. Ротаса командир тшӧктіс миянлы бӧрыньтчыны Нарва пӧлӧныс юсӧ вуджанінӧдз, кӧні вӧлі нюжӧдӧма канатнӧй гез. Тайӧ гезъяс кутчысьӧмӧн ми долженӧсь вӧлі вуджны-варччыны ю вомӧныс. Но фашистъяс казялісны вуджанінтӧ да заводитісны лыйлыны вуджысьяс кузя. Рота джынйыс пӧгибнитіс сэні. Мӧдар берегас заводитім перйыны окопъяс, но и сэні вӧлісны нин фашистъясыд, кодъяс «в упор» кутісны миянӧс лыйлыны. Командир авӧстіс котӧртны неылын сулалысь вӧрӧ. Сэтчӧ чукӧртчим нин сӧмын кызь кымын морт сё ветымынысь. Тані вӧлісны на ловйӧн кольӧм чуклӧмса: ме, Пётр да Дмитрий Раевскийяс (Степан Петыр да Карпӧ Агни Митрей), Сельков Иван Васильевич (Петыр Василь Иван),Зиновьев Иван Алексеевич (Ӧльӧш Иван), Сажин Григорий Николаевич (Миколай Гриша) да Волся сиктысь Сенькин Михаил Иванович. Водзӧ вӧр кузяыс нин кутісны лыйлыны фашистъясыс да матыстчыны вӧр дорӧ. Ротаса командир шуис, мый ми полнӧй кытшын нин да тшӧктіс неыджыд чукӧръясӧн разӧдчыны, водзӧ писькӧдчыны, коді кыдзи кужас, асыввывлань. Та бӧрын ми сійӧс эг нин аддзылӧй. Ыджыд чукӧрӧн ветлӧдлыны вӧлі полана, да кык лун бӧрын ми торйӧдчим, колим Сенькин Михаилкӧд. Ми гӧгӧрвоим, мый фронтыс кытӧнкӧ ылын асыввывланьын, вӧръясын вошласигтыр, луннас ӧти вӧрын, войнас вуджавлім мӧд вӧрӧ, июльпомса ӧти асылӧ петім нёль-ӧ-вит овмӧса неыджыд хуторӧ. Ёна нин тшыгйӧсь пырим вӧрдорса медматысса керкаӧ. Кӧзяиныс, быттьӧ миянӧс жалитігтыр, пызан вылас вайис кутшӧмсюрӧ сёян-юан. Ӧдзӧс дорас сувтӧдім ӧтик патрона винтовка да сӧмын на пуксим пызан саяс, кыдзи вежӧссьыс чургӧдӧм автоматъясӧн уськӧдчисны миян вылӧ кык немеч. Тадз веськалім ми пленӧ. Нуисны миянӧс километра дас кымын подӧн да вайисны ыджыд хуторӧ, кӧні чукӧртӧмаӧсь нин вӧлі 150 кымын пленӧ шедӧм красноармеечьясӧс. Кык лун мысти пода колоннаясӧн вайисны Тарту карӧ, а сэсся- Ригаӧ. Сэні видзисны миянӧс дзонь во аэропорт стрӧитӧм вылын. Во бӧрын миянӧс нуисны Восточнӧй Пруссияӧ видз-му овмӧс уджъяс вылӧ ӧти бауэр дорӧ. Уджъяс помасьӧм бӧрын нуисны Западнӧй Германияӧ, Гревен концлагерӧ, кӧні уджӧдісны торфоразработкаяс вылын. Кыдзи миянӧс уджӧдлісны, видзисны да вердлісны висьтала, мый война вылӧ мунігӧн ме вӧлі 80 килограмм, а тані лои скелетӧн, косьми да веситі 36 килограмм. Сідз кӧнкӧ кытчӧкӧ уси да кувси, но 1945 вося апрельӧ Гревен концлагерса йӧзӧс мездісны англичана. Германия капитуляция бӧрын миянӧс сетісны роч военнӧй властьяслы. Восточнӧй Пруссияын кутшӧмкӧ воинскӧй частьлӧн особӧй отделын ми прӧйдитім прӧверка. Миянӧс признайтісны мыжтӧмъясӧн да сетісны демобилизуйтчӧм вылӧ удостоверение. А сэсся друг пасьтӧдісны армейскӧй обмундированиеӧ да пыртісны Минскӧдз вӧв обозъяс нуӧдӧм вылӧ командаӧ. Минсксянь бӧр вайӧдісны Ригаӧ да сюйисны трудармияӧ, карьерысь перйыны гипс, кӧні уджалім 1947 вося апрельӧдз. Сійӧ жӧ тӧлысьнас демобилизуйтісны да вои гортӧдз».

Висьтасьӧ Иван Степанович Сажин (Дядёв Степан Иван), Керӧс сиктса 74 арӧса олысь: «Миянӧс Чуклӧмысь дас вит мортӧс, на лыдысь пӧчинокъясысь Ӧсип Ӧльӧкӧс, Прокор Микальӧс (Сажинъяс) босьтлісны армияӧ действительнӧй военнӧй служба вылӧ 1939 воын, войнаӧдзыс на. Первой служба муніс Башкирияын, а сэсся вуджӧдісны воинскӧй частьсӧ Арменияӧ, Кировокан карӧ, кӧні 1941 вося июнь 22-ӧд лунӧ объявитісны война заводитчӧм йывсьыд. Дзик пыр миянӧс нуисны турецкӧй граница вылӧ стрӧитны оборонительнӧй рубежъяс. Вӧлі зэв сьӧкыд сэні перйыны окопъяс да джуджыд траншеяяс. Кык тӧлысь мысти миянӧс десантӧн шыбитісны Крымӧ, коді вӧлі нин фашистъяс улын. Десант эз удайтчы. А менӧ ранитіс веськыд кокті петӧм пуляӧн. Кык тӧлысь куйлі Кисловодск карса госпитальын. Регыд мысти миянӧс госпитальнас вуджӧдісны Грузияӧ, Гори карӧ. И сэтчӧс ранитчӧмаясысь котыртісны запаснӧй полк. 1942 вося августын миян запаснӧй полк участвуйтіс зэв чорыд да ыджыд тышъясын Новороссийск кар понда. Менӧ бара ранитіс плеш бокӧ, мый вӧсна вошті синмӧс. Бакуса госпитальын некымын тӧлысь бурдӧдчӧм бӧрын, ранитчӧмаясысь чукӧртӧм полкӧн, менӧ син пӧлаӧн нин, нуисны Иранӧ, Решт карӧ, а бӧрасджык зэв мича Мурзанабат карӧ. Сэні неылын миянсянь сідзжӧ сулаліс американскӧй войсковӧй часть. Ми тшӧкыда паныдасьлім американечьяскӧд. Сэк кадсянь ме тӧда «окей» да «гуд» кывъяс. Тайӧ чолӧмалан кывъяснас ми здоровайтчылім, а сёрнитлім жестъясӧн. Помнита антигитлеровскӧй коалицияӧ пырысь государствояслӧн юрнуӧдысьяслысь 1943 вося ноябрын Тегеранын паныдасьӧмсӧ. Тегеранса конференция дырйиыс миян и американскӧй войска вӧлі полнӧй боевӧй готовностьын. Миянӧдз локтіс конференция вылын примитӧм кывкӧртӧд: восьтыны Европаын мӧд фронт. А тайӧ висьталіс сы йылысь, мый регыд локтас войналы пом. Но регыдӧн тайӧ эз на артмы.

Демобилизуйтчи Иранын 1945 вося октябрын да тӧлысь мысти вои гортӧдз».

Висьтасьö Сельков Василий Арсентьевич, 74 арöса Важ Чуклöмса олысь:«Миянöс мобилизуйтісны война заводитчöмсяньыс тöлысь мысти. 1941 вося июль 25-öд лунö Комиысь мобилизуйтöм кыксё гöгöр мортöс вайисны Великöй Устюгö. Сэні миянöс босьтісны велöдны младшöй командиръяс вылö Пуховичскöй пехотнöй училищеö да велöдісны сэні нёль тöлысь чöж. Училище помалöм бöрын миянöс вайисны Московскöй область пасьта нюжалысь Центральнöй фронт вылö. И веськалі ме 26 стрелковöй дивизияса 77 гвардейскöй стрелковöй полкö. Бöрынджык полкыслы присвоитісны Кутузовлысь ним, а дивизиялы Суворовлысь.

1942 вося февраль 2-öд лунö Московскöй областьса Попадино сикт дорын менö ранитіс шöяö, сэсся некымын тöлысь куйлі госпитальын. 1943 вося декабрын Витебскöй областьса Городок кардорса бойясын бара ранитчи шуйга кокö да бара некымын тöлысь чöж бурдöдчи больничаын. Госпиталь бöрын ме участвуйті Витебскöй область фашистъясысь мездöмын. А сэсся пырим Польшаö.

1944 вося июльын участвуйті Березино ю, а сы бöрын Неман ю форсируйтöмын. Сійö жö вося октябрын пырим Восточнöй Пруссияö. 1945 во заводитчöмсянь сьöкыд тышъясöн мездім Вилау, Аулавень каръяс да фашистса крепость Пиллау. А 1945 вося апрельын босьтім Кенигсберг кар». Сельков Василий Арсентьевичлöн военнöй билетас пасйöма куим медаль «За отвагу» да «За боевые заслуги».

Висьтасьö Селькова Евдокия Ивановна, Важ Чуклöмса 73 арöса олысь: «1942 вося ноябрын Чуклöмысь миянöс, нёль нылöс, мобилизуйтісны война вылö: Сажина Александра Ивановнаöс (Иван Степан Иван Саньö), Сажина Александра Михайловнаöс (Микуль Саньö), Зиновьева Парасковья Ефимовнаöс (Петыр Ефим Парö) да менö. А ставсö Коми АССР-ысь босьтлісны сэки 200 гöгöр нылöс. Вежон мысти Сыктывкарсянь миянöс нуисны Архангельскö. Сэні вöлім дзонь тöлысь карантин вылын. А сэсся нуисны Северодвинск карö Карельскöй фронт вылö да пыртісны 160-öд отдельнöй зенитно-артиллерийскöй дивизионö (ОЗАД) да пуктісны разведчик-наблюдательясö. Öти батареяö веськалім дас коми ныв. Миян отделениеса командирöн сідзжö вöлі коми ныв, Костарева Клавдия Ивановна. Миян обязанностьöн вöлі сулавны вышка-пост вылын да кывзыны-видзöдны сынöд и море бöрся, став лоöмторъяс йывсьыс юöртны команднöй пунктö. Мурманскöй порт вöлі жугöдöма-кисьтöма фашистса авиацияöн, мый вöсна сійö эз примит суднояс да караванъяс, а Северодвинск карö воисны военнöй да мукöд грузъясöн öтка суднояс да караванъяс. Миян артдивизион видзис пырысь суднояссö фашистса авиациялöн уськöдчöмысь. Татшöм лоöмторъяс дырйи батареялы ковмыліс восьтыны заградительнöй би, уськöдлыны либö вöтлыны вöрöглысь самолётъяссö миян сынöдысь. 1943 вося апрельын миянöс вуджöдісны 318-öд ОЗАД-ö, Первой Белорусскöй фронтлöн Одер-Берлин направление вылö. Сэки фронтнас командуйтіс маршал Жуков. Быд лун и вой «к бою» обстановкаын видзим фронтлысь стратегическöй объектъяс. Отсалім миян войскалы мездыны вöрöг улысь Польша. Одер ю босьтöм бöрын сувтім 17 километр сайö Берлин карсянь. Асланым биöн тшöтш отсалім Берлин штурмуйтігöн. Тані ми и паныдалім 1945 вося май 8-öд лун. Наградитлісны менö «За боевые заслуги» медальöн да орденöн «Отечественная война 2 степени». Армияысь демобилизуйтлісны 1945 вося август тöлысьын».

Висьтасьö Сельков Василий Степанович, Важ Чуклöмса 74 арöса олысь: «Война вылö Чуклöмысь миянöс босьтісны 1942 вося апрель 18-öд лунö А.М. Сельковкöд (Öньö Öльöш Микаль Öльöксан), С.М. Зиновьевкöд (Митрöфан Степан), Василий Михайлович да Иван Алимпиевич Сажинъяскöд (Прокö Микаль Василь да Öлим Иван). Чукöртісны Комиысь став мобилизуйтöмаöс Айкатылаын да сысянь нуисны дзонь эшелон, некымын лунъясöдз сувталіг, пöшти тöлысь джын Ленинградскöй областьса Волховстройö. Сэні олім дзонь тöлысь окопъясын да рынышъясын, прöйдитім курс молодого бойца. А сэсся Ладога ты вомöн парокодöн вуджöдісны блокаднöй Ленинградö. Сэні Пулковскöй направлениеын и кутім воюйтны фашистъяслы паныд 237-öд артиллерийскöй полк составын. Батареяса командирыс, капитан, вöлі ленинградса, кодкöд ми олім öти землянкаын. 1942-öд вося ноябр 9-öд лунö менö ранитісны веськыд вискиö. Ранитчытöдз лунöн водзвыв друг юрö пырис мöвп и аддзылöм, быттьöкö ме гортын бать-мамкöд да вокъяскöд. А кутшöм мичаöн меным кажитчис асланым сиктöй Важпушуп гöраяс улас. Нöрыс бокъясас да сиктсянь öтар-мöдар асыв да рытыв банас быдмö нянь, а сэсся тыра муяс сайöдыс гöгöрбок помтöм-дортöм вöр. А лунвылас, нёльсё-витсё метрöн улынджык, шлывгö-визувтö Ичöт Визин ю, öтар-мöдар берег кузялаыс быдмöны бадь да öмидз кустъяс, еджыд вурун кодьöсь да мича дзоридзьяса. Юöдзыс сиктсö ыджыд кытшöн кытшовтöны вöръяс, кытчö ме быттьö ветлі тшак вотны. Батьöй быттьö вурис сапöг, а мамöй кыис дöра. И друг юрысь и син водзысь ставыс тайö вошис. Кык тöлысь да джын куйлі госпитальын. Ранитчöм вöсна коли синтöг. Фронт вылын и госпитальын гортсянь воліс некымын письмö. Гортсаяс майшасисны менам здоровье вöсна, кыдзи ме ола, кынмавла ог. 1943 вося январ пуксигöн йиа кын Ладога ты вомöн миянöс, ранитчöмаясöс, машинаяс вылын петкöдісны блокаднöй Ленинградысь да регыдöн демобилизуйтісны. Гортö вои 1943 вося февраль 1-öд лунö».

Висьтасьö Сажин Алексей Николаевич (Спира Миколай Öльöксей) Дал сиктса 75 арöса олысь: «Чуклöмын 1922-öд воын чужлöм тшöтшъяыс вöліс 40 морт. Найö ставныс воюйтісны Ыджыд тышын, а унджыкыс усис тайö война вылас. Чуклöмса школа помалöм бöрын ме муні велöдчыны Сыктывкарса лесотехникумö. Батьöс нуисны война вылö 1942-öд вося январ пуксигöн, и регыд сійö усис фронт вылын. Менö мобилизуйтісны 1942-öд вося май öтиöд лунö. Весиг эг вермы волыны прöщайтчыны мамкöд да Иван воккöд, кодöс босьтлісны фронт вылö 1943-öд вося январö.Сыктывкарысь мекöд тшöтш нуисны кыксё сайö мортöс, велöдчыштöма нин том йöзöс. Тайö вöлі медводдза набор гвардейскöй миномётъяс «Катюшаясöн» воюйтны велöдöм вылö. Горвоенкоматын миянöс колльöдысь чина морт ышöданга кыв бöрын миянлы козьналіс выль гудöк. Туй кузяыс Горький карöдз тайö гудöкнас гажöдіс ставныссö миян пöвстын мунысь зэв бур гудöкасьысь. Унджык мобилизуйтöмаыс вöлі Сыктывкарысь, да миянöс колльöднысö петіс быттьö став карыс. И öні на менам син водзö сувтö серпас: ньöжйöник вешъялысь уна сё йöзысь ловъя стен, коді паськöдчöма пристаньса быд пельöсын да Эжва ю пöлöн, сюрс мортлöн кымын уна дзоридзьяса чышъянъясöн да дöраясöн öвтчöмыс «Коми комсомолец» парокод вылын пристаньысь миян петігöн, пельын век быттьö кылö: «Победаöн тіянöс, муса пиян! Виччысям победаöн!» Парокод вылын кывтігöн, ми первойысь пöттöдз сёйим туй вылö сетöм паёкъясысь. Öдзыс вöлім пыр тшыг нисьö пöтöсь. Вед миянлы техникумын сетлісны нёльсё грамм нянь. А стипендия вöвлі кызь шайт, мый тырмывліс тöлысь джынса нянь карточка вылö. Та вöсна ми рытъяснас уджалім, нажöвитім сьöм частникъяслы пес кералігöн, быд сикас груз сöвтöм-ректöмöн, тшöкыда ветлывлім лесозаводö бунтуйтны пиломатериалъяс да уберитны пес колясъяс.

Горький карын миянöс пыртісны «Катюшаяс» велöдан полковöй школаö. Тöлысь мысти нин боевöй «Катюшаяс» вылын нёль дивизионöн нуисны Воронежса фронт вылö, и веськыда тышö. Комиысь тані ми вöлім куимöн, öтиыс регыдöн усис, а кулöмдінса Карманов ёрткöд аддзысьлывлім на война помöдзыс.Сы бöрын вöлі Сталинград дорйöм да сы дорысь фашистъяслысь войскаяс жугöдöм. Сэсся миянлысь дивизионъяссö вуджöдісны Первой Украинса фронт вылö, кöні юрнуöдіс легендарнöй Ватутин. Паныдасьлі сыкöд кыкысь. Украина мездöм бöрын пырим Польшаö да освободитім сійöс. 1945-öд вося май 5-öд лунö штурмуйтім Берлин, а май 9-öд лунö мездім Прага.

Эз öтчыд юр весьтад шутлявны пуляяс да снарядъяс, эг öтчыд сюрлы бомбёжка улö, но пыр шуалі аслым: «Мамö! Рöднöй менам матушка! Видз менö! Отсав меным!» И меным сійö отсаліс война биын кольны ловйöн, ёна ранитчытöг. Шойччан здукъясö думайті война вылын усьöм бать йылысь, дона мам йылысь, вок, рöдвуж да аслам сикт йылысь. И пырысьтöм пыр вöвлі кокньыдджык сьöлöм вылын, кыпавліс настроение. А менам тшöтшъяяс унджыкыс усисны война вылад, на пиын и Важ Чуклöмысь менам медбур ёртъяс: Сергей Öльöксан Мишка, Мамант Öльöксан, Павел Иван Мишка, Степ Öньö (Сельковъяс), Левонь Павел Иван (Сажин). Накöд ми гожöмъяснас купайтчывлім сиктсянь зэв крута лэччысь джуджыд берега Ичöт Визин ю вылас. Öні ми колим куим годок: Сельков Николай Егорович ( Педöр Егор Миколай) олö Сыктывкарын, Сельков Александр Андреевич (Васька Öньö Öльöксан) олö Ёльбазаын да ме».

Висьтасьö Митюнина Мария Николаевна, 74 арöса Ключ сиктса олысь: «Бать-малöн ми вöлім сизим челядь: вит вок да кык чой. Став вокыс участвуйтісны Ыджыд тышын: Степан, Александр, Михаил, Иван да Пётр. Степан, Иван да Пётр усисны война вылас. Медыджыд Степан вокöс босьтісны армияö 1941 вося август 21-öд лунö. Туй вылö гортсьыс петігöн, синваöн сійö янсöдчис гöтырыскöд, унаысь окыштіс Иван писö да Маша нывсö, босьтіс зыбкасьыс некымын тöлысся Лия нылуксö, окаліс чужöм бокъяссö, мышсö да, неуна вывлань лэптыштöмöн, шуис батьлы: «Батьö, отсав мамыслы найöс быдтыны. Любит найöс сідзжö, кыдзи любитлі ме». Сійö война вылас вöлі ротаса командирöн. Усис 1942-öд вося декабр 18-öд

Митюнина М.Н. лунö.

Иван вокöс армияас босьтлісны войнаöдзыс на действительнöй служба вылö, 1940-öд вося февральын. Сійöс ключсаыс шулывлісны йöз гажöдысьöн, зэв лöсьыда сьывлывліс. Чукöртчасны вöлі том йöзыс Ключ гöра йылас да öтвылысь сьылöны «Катюша», частушкаяс. Сэсся Иван велöдіс найöс сьывны «Три танкиста». А тöвся праздникъяс дырйи вöлі доддялас кöшöваö медся яр вöвъяссö, пуксьöдас кöшöваас нывъясöс и давай сикт кузяыс гöняйтны сьылігтырйи. Гаж радейтысь мортöн вöвліс. Усис 1943-öд вося январын. А Петя вок война вылö мунтöдзыс уджавліс Исанево лесопунктын. 1941-öд вося сентябр 21-öд лунö локтіс сэтысь да ружьеöн муніс вöрö. Зэв ёна вöлі радейтö вöравны. И сійö жö луннас вайисны аскинас мунны армияö повестка. Рытнас бать муніс сійöс корсьны. Локтісны асъя войнас. А асывнас, сентябр 22-öд лунö, мунісны медбöръя туйö сійö, Виктор Василь, Ервась Öльöксан, Доментей Миколай Степан (Сажинъяс),Терень Иван Петыр (Сельков), кодъяс усисны война вылын да Прокö Öльöксан Иван (Лапшин), Кöсьта Öньö (Сельков), кодъяс волісны ранитчöмöн да неважöн кувсьылісны. Петя вок усис 1944-öд вося май 8-öд лунö.

Александр да Мишка вокъясöс нулісны война вылас сійö жö 1941-öд вося август да октябр тöлысьясын. Кыкнанныс война вылысь волісны сьöкыда ранитчöм бöрын. Став вокъясöй вöлісны зэв гажöдчысьöсь да йöзкöд овны радейтысьöсь. Александр вок войпукны нывъяскöд ветлывліс печканöн да панъясьліс накöд печкöмöн. И нывъясыд пыр сылы клопайтлісны, кор сійö медводз помавліс печкыны горс тыр вурун. А Миша вок пыр любитіс шмонитны йöзкöд да аслас семьякöд. Вокъяс радейтісны бать-мамöс, миянöс, чойясöс, рöдвужöс, суседъясöс, сиктса став олысьöс. Фронтъяс вывсянь найö гижлісны миянлы уна письмö, но миянсянь, кöнкö, эз удитлыны пöлучитнысö. Быд письмöын найö гижлісны миянлы выль адрес».

Висьтасьö Кудрявцева Парасковья Михайловна, 88 арöса, Чоййыв сиктса олысь: «Менсьым верöсöс, Кудрявцев Александр Александровичöс, мобилизуйтлісны война вылö 1941 вося октябр 23-öд лунö. Миянöс кулакавлöм йылысь сійö пыр казьтывліс ыджыд öбидаöн да жалитöмöн. Таысь сійö некодöс эз мыжав местнöй начальство кындзи. Войнаöдзса бöръя вояссö сійö уджавліс бригадирöн. Ягдор колхозса Жуöд бригадаын. Зэв ёна вöлі артмö быдöнкöд, торйöн нин Жуöдса пöрысь йöзкöд: Лука Прокоркöд, Терень Öльöшкöд, Парпоней Петыркöд (Сельковъяс), да сэкся сиктсöветса председатель Сажин Евграф Михайловичкöд, коді сідзжö оліс Жуöд юр йылас, ключ дорас. Найö чукöртчывлісны да сёрнитлісны колкозса уджъяс йылысь, политика йылысь да регыд кадö война заводитчöм йылысь. Фронт вылö мунігöн, менö кутліг, сійö шуаліс: «Ме кö пöгибнита, бура быдты челядьöс. Нинöм налы эн жалит. Велöд найöс, мед вöліны грамотнöй, бура уджалысь йöзöн. Кыдзи и öні, бура уджав колкозын. Медым вермыны тышын, колö ставлы уджавны бура». Письмöяссö сылысь пöлучитлім Ленинградса фронт вывсянь, кöні сійö воюйтліс Отдельнöй сапёрнöй батальонын. Письмöяссö гижис пöся радейтöмöн семья да челядь дінас, быд пöрйö налысь нимъяссö гижöмöн: Геня, Катя да Толя. Öти письмöын сійö гижліс, мый войюйтö Отечество вöсна, аслас челядь вöсна, мый ми вермам тайö тышас. 1942-öд вося февральын сійö вошис юöртöг».

Висьтасьö Анна Викторовна (Сажина ныв дырйи), Сыктывкарса олысь (ул. Димитрова ): «Бать-мамлöн ми вöлім сизим челядь-нёль ныв да куим пи. Война заводитчигас, ми вöлім сэтшöм семьяöн, кодлöн челядьыс арлыд сертиыс уджалісны нин либö регыд кадöн долженöсь вöлі петны ас нянь вылö. Медыджыд Шура чой да Александр вок уджалісны нин. Шура 45 во чöж уджаліс велöдысьöн да вöвлі «Коми АССР-са Заслуженнöй велöдысьöн». Ме сідзжö уджавлі война заводитчöмсянь велöдысьöн 36 во. Первой уджалі Межадорын, сэсся Чуклöмын, а бöрас 24 во Сыктывкарын. Елена чой война дырйиыс велöдчис трактористкаö да уджавліс тракторъяс вылын. Ичöтджык чой помавліс лесотехникум да сэні дыр кад чöж уджаліс преподавательöн. Ыджыд Александр вок Сыктывкарса лесотехникум помалöм да армияын служитöм бöрын нелямынöд вояс шöрын мунліс Москваö. Уджавліс строительствоын, сэні лöсьöдіс семья, заочнöя босьтіс высшöй образование инженер-строитель дипломöн. Отпускъяс дырйи волывліс семьянас гортö. Война вылö сійöс босьтісны медводдза лунсяньыс. Вöвліс уна фронт вылын. Демобилизуйтчыліс 1946-öд воын капитан званиеын. Сылысь мемуаръяссö ме сдайтлі республикаса музейö.

Ичöтджык Вася вокöс, чужліс 1923-öд воын, нулісны война вылö1941-öд вося сентябрö. Сійö вöлі Ленинградскöй фронтса связьса Отдельнöй коймöд батальонын связистöн да усьліс 1942-öд вося декабр заводитчигöн. Сьöкыд вöлі олöмыс война дырйиыд: куш 500 грамма нянь карточканад кынöмыд оз вöлі пöт. И миянлы, став челядьыслы, отсасисны бать-мам. Найö юксьывлісны миянкöд быдторйöн, мый позьö вöлі шедöдны видз-му овмöсын: и пызьöн, и яйöн, и йöлöн, и выйöн, и картупельöн. Но налы вöлі колö сідзжö пыр отсасьны. И ми, челядь, отсавлім налы, коді кыдзи да кор вермылім. Öта-мöдыдлы отсöгтöгыд война дырйиыд вермин кувны тшыгла.

Сьöкыда овліс война дырйиыд миян ыджыдджык Елена чой. Верöсыс сылöн усьліс война медводдза лунъяснас. Трактористкаалігад восьса ХТЗ вылад сійö ёна кынмавліс. Уджавлісны сэк асъя кыасянь рытъя кыаöдз. Тэрмасьöмöн лöсьöдöм ужын да завтрак, кöдзыд сёянöн да нянь шöрöмöн пажын, пыр кöдзыд ывлаын-ставыс тайö орöдіс сылысь здоровьесö. Ещö шог вöвлі сылы усьöм верöс пондаыс. Ёна мучитчыліс. Кокъясыс кутісны пыктавны, и ковмис öти коксö вундыны. А та бöрын чорыда висьöмöн квайтымын нёль арöсöн и кувсьыліс».

Висьтасьö Мельник Александра Дмитриевна (ныв дырйи Селькова): «Чужлі ме 1924-öд воын. Бать, Дмитрий Фёдорович, да мам, Александра Михайловна Сельковъяс, овлісны Ягдор грездын да уджавлісны колкозын. Ми бать-мамлöн вöлім сизим челядь-квайт ныв да öти пи, коді войнаöдзыс на кувсьыліс. Со и ме квайт чойысь веськавлі война вылö. Миянöс мобилизуйтлісны война вылö1943-öд вося август тöлысьын. Мекöд Визинысь тшöтш босьтлісны Лебедева Лидаöс да Безносова Лидаöс. А Сыктывкарын чукöрмывлім ныв куимсё кымын. Нуисны Москваöдз. Сэні овлім Планетарий улын. Прöйдитім разведчикъяслысь курсъяс. А сэсся нуисны Белорусскöй фронт вылö да пыртісны 613-öд зенитнö-артиллерийскöй полкö разведчикöн. Участвуйті Белоруссия да Польша мездöмын, Варшава вöсна сьöкыд тышъясын. Демобилизуйтлісны 1945-öд вося сентябр тöлысьын. Война помасьöм бöрын 40 во чöж уджалі лесопунктын, первой пöрöдчысьöн лучкöвöй пилаöн на, а кор заводитісны уджавны электропилаясöн, а сэсся «Дружбаöн» да «Уралöн» пыр уджавлі ув суййысьöн. Ме вöлі шудтöмöн верöсъяс кузяыд: медводдза верöс, Мельник Павел, 40 арöсын пöрöдчигас лямавліс пуöн да кувсис, мöд верöс, Ивлев Коля, сідзжö кувсис 39 арöсаöн. Быдті сизим челядьöс, кодъяс ставныс нин семьяяöсь. Быдтысьны öтнамлы вöлі, дерт, сьöкыд, но век жö ставсö сувтöді кок йылö. Ставныс лоисны прамöй йöзöн. Öні менам быдмö нин 10 нук, на пиысь öтиыс воюйтö Чечняын, да куим правнук».

Лапшин А.С. Менам бать. (Лапшин Сергей Протасьевичлöн висьтасьöм серти)

Война вылад, мися, батьö, кыдзи ті мунінныд, сьылігтырйи? Йöюк пö тэ, Öльöксан, бöрдігтырйи пö мунім. Вöлöн нуöмны Ключ пырыс, веськыд туй вöлöм, Визин туйöн шусис. Ог тöд, кодъяскöд менсьым батьöс, Прöтасей Сергейöс, öтлаын босьтлöмны, но арланьыс 1941-öд воын. Нуöмны Прибалтикаö. Веськалöма сійö Власовскöй армияö. Узкоколейкаті пö пыртісны миянöс, салдатъясöн тыр дзонь эшелон. Фронтыс колис нин кытчöкö зэв ылö, а миянöс век нуöны,быттьö мешöкö сюйисны. Тшöктісны перйыны окопъяс, бать миян ичöт тушааа вöлі, но томдырйиыс зэв ён мортöн вöлöма- сійö и , гашкö, ловйöн колис. Перйи пö окоптö полнöй профиль, голяöдз, дай ещö увдорас перйи дзебсянін. А мекöд орччöн Межадорысь Опонь нима мужичöй перйис сöмын пидзöсöдзыс и водзö оз перйы. Шуа сылы, мед перйис окоптö, немечыд кö воас, медводдза пуляыс и тэнад лоö. А начкыны кö пö вед начкасны жö нин, шуис Опоньыд. Кылам, кыдзи пикируйтіс самолёт и пулемётысь öти öчередь и лэдзис, ме пö дзебси, а Опоньыд, кыла, ойзыны кутіс да недыр мысти и ланьтіс.

Немечыд локтіс, ставсö бомбитіс, лои быттьö адын, юртö эськö кысь нин лэптыны, пышйыны он вермы , сöмын кольö муас гуасьны. Кутшöмкö воронкаö пö водім, а ставыс пышйöны, морт сизимöн пö ме вылö усисны, вирнас тыри, сідзи легöдчытöг и куйлі. Автоматсьыд лыйлöмны, но шойясыс спаситöмны, весиг некыті абу ранитчöма. Олöмыс, кöнкö, мортыдлöн сэтшöм, а овныд вед быдöн кöсйö, кызь квайт арöснад кувны некодлы абу окота. Аскинас югдас, да кытчö нин, ставыс немеч улын, ловйöн кольöмаяс веськаласны пленö. Батьö нёль во вöлöма Германияын пленын. А гортас Öлдöк Öльга пöч мамлы, батьлöн мамыслы, воöма юöр, мый вошöма без вести. Миян обычай серти батьöс дзебöмны и колльöмны, а сэсся 1946-öд воын локтас мортыд ловйöн. Сэки пленад веськалöм мортыд лыддьысис изменникöн, некутшöм праздникъяс вылö эз корлыны, война бöрад ёна на кыскавлісны Особöй отделъясті. Бать сёрни серти, выпытывайтöны пö вöлі, но, давай висьтась, кыдзи немечыдлы служитін. Чуклöмсьыд унаöн сійö медводдза сьöкыд вонад веськалöмны пленад: Кирö Иван, Тоньö Öндрей, Пиля Öльöк, Доментий Симён Опонь. Миян батьöкöд öти лагерö веськалöма воча вокыс-Öлдöк Иван Василь. Сійö вöлöм Севернöй флотын кадрöвöй служба вылын. Кыкнанныс со локтісны ловйöн. Пленад ёна пö и тшыгъявлім, коді мыйсюрöсö сёйис(сельги юръяс да отброссö), найö пö и кулалісны. Морт яйтö пö тшöтш видлім, юмов кöра. Шойсö тшöктасны гуавны, видзöдан да: чигъяиныс вундöма. Нуждаыд суас тай, а овны быдöнлы окота. Бöрас сэсся кутісны бурджыка вердны, ёнджыкъяссö да винёвджыкъяссö офицеръяс, лагерса начальство, прислугаö босьтлісны, уборщикавны. Немечыд пö зэв культурнöй: оз радейт пöръясьöм да гусясьöм. Нарошнö вöлі прöверитö мортсö, гусясьö али оз.Вот сэтшöм лыдас батьö веськалöма, нянь босьтöма. Зэв пö чорыда накажитöмны: менö пö öшöдлісны, кыкнан киöс мышкö домалöмöн. Мездöмны война помасьöм бöрын. Американечьястö аддзылöма жö: негръяс пö сьöдöсь, сöмын пиньясыс еджыдöн югвидзöны. Мездöм бöрас абу на дзик пыр лэдзöмны гортас. Уджöдöмны Штеттин карын, демонтируйтöмны военнöй завод. Батьöлöн эм сійö кадся фото. Зэв унаöн снимайтчöмны, весиг нывбабаяс эмöсь. Батьö увдорса радас, медся веськыдвылас пукалö, фуражкаа том молодеч. Сійö жö радас, батьöдз нёль морт, пукалö еджыд формаа Öлдöк Иван Василь. Тайö фотоыс батьлы вöлі зэв донаторйöн. Батьлöн бöръя воясö олігöн, тшöкыда вöлі казялан, кыдзи доршасьö сылöн синваыс, нормывлö сьöлöмыс. Быд морт олö ассьыс олöм, кодлы кутшöм олан туй сетас Енмыс. Коді вуджис став мучитчöмсö, а коді и дзик пыр усис война вылад.

Семья лöсьöдліс бать комын кык арöсын, мамкöд, Семан Васька Варуккöд, гижсьылöмны 1947-öд воын, быдтісны куим пиöс: Иванöс(1947), Васильöс(1950), менö, Öльöксанöс,(1953). Кувсис батьö водз, квайтымын нёль арöсын, 1979-öд воын. Тöдчис, кöнкö, став сьöкыд олöмыс: ичöтсяньыс кулакавлöмыс,войнаыд да пленыд, война бöрас на кымын удж мырисны-вöчисны, асьнысö жугöдісны. Ёна и уна усис миян бать-мамлöн тшöтшъяяслы. Сэтшöм вöлі олöмыс, нинöм он шу, а миянлы пыр колö тöд вылын тайöс кутны, пыр казьтывлыны коми сиктса олысьясöс, кодъяс странакöд öтвыв вуджисны став сьöкыдлунсö.

Плен бöрын Штеттин завод вылын уджалiгöн. (Лапшин С.П. лöз кытшöн торйöдöма фото вылас)