Служба собору свв. Псково-Печерских

Служба собору свв. Псково-Печерских

В Неделю 4-ю по Пятидесятнице

На велицей вечерни

На Господи, воззвах: стихиры на 10, и поем стихиры воскресны гласа три, и анатолиев един, и святых на 6.
Стихиры святых глас 1.
Подобен: О, дивное чудо:

Блаженна страна Псковская/ и преславна чудесы/ обитель Печерская,/ имуще вас, соборе дивный,/ отцы наши преподобнии,/ веселися, Пречистая Доме,/ таковыя почитая предстатели,/ иже Богородицу и Матерь всем Милосердную/ за ны умоляют присно,/ темже, людие, возрадуемся и восхвалим// сия молитвенники о душах наших. (Дважды)
Глас 2:
О сокровищнице Господня,/ личе начальный святых Псково-Печерских,/ преподобнии Марко, Ионо, мати Вассо,/ явили бо есте непорочным житием вашим/ образ спасения уставы Богоданными/ и вся полки бесовския низложили есте,// темже и нас ныне от тьмы греховныя избавляете.(Дважды)

От юности Христа возлюбивый/ и душу твою добродетельми удобривый, / Корнилие чудный,/ неустанно учил еси люди вере Христове/ и обитель Печерскую дивно украсил еси,/ да подвигом твоим приимеши от Господа// венец уготованный нетленный.

Слава, святых, глас 6:
На земли ходиша тесною стезею,/ красных мира отвергошася/ и в подвизех иноческаго жития Вышних достигоша,/ темже и нас, иночествующих во обители Печерстей,/ молитвами вашими обогатите сокровищем нетленным.
И ныне, Богородичен первый гласа: Како не дивимся:

Вход. Прокимен дне. И чтения святых три, преподобническая.

На литии стихиры святых глас 3:
О соборе святых Псково-Печерских,/ просиявший, яко светила многосветлая,/ во мраце пещеры, Богом зданныя,/ идеже возгореся в сердцах ваших пламень Духа Святаго,/ сего ради просветите вся люди верныя/ и моленьми крепкими вашими/ распаляйте ны ко Господу любовию,/ во еже спастися воспевающим вас.
Глас 5:
Умы очищенными/ Пресвятей Троице предстояще, преподобнии,/ и Тояже славою осеняемии,/ вся ны просветите/ и за чтущая вас инок множества и люди верныя,/ к мощем честным вашим приходящия,/ Жизнодавца Христа умолите,// во еже спастися душам нашим.

Путем тесным/ шествующе, отцы Печерстии,/ делы вашими явили есте,/ како в широту райскую/ добре ходящий во Христе вводими бывают,/ онем же путем, преподобнии,// приведите ко Христу и вся верныя.
Слава, святых, глас тойже:
Радуются вси людие вернии,/ и земля Псковская ликует,/ празднующи собор святых Печерских,/ их бо житием благочестным/ украсися Церковь Русская,/ Юже Господь таковыми столпы утверди,/ тех молитвами да подаст благодать Свою/ ко спасению душ наших.
И ныне, Богородичен, глас тойже: Храм и дверь еси:

На стиховне стихиры воскресны, глас 3.
Слава, святых, глас 1:
Земли Псковския радование,/ обители Печерския крепкое предстательство,/ соборе святых дивный,/ ныне к вам прибегающе,/ молитвы приносим теплыя/ и чтим любовию память вашу.
И ныне, Богородичен, глас тойже: Се исполнися Исаиино проречение:

Тропарь, глас 6:
Собор святых Псково-Печерских днесь почтим,/ в дебрех лесных обитель чудную основавших,/ и, яко крины, добродетельми процветших,/ и людем правый путь богоподобия указавших,/ молят бо Господа// миру мир даровати и велию милость.

На утрени
На Бог Господь: тропарь воскресен гласа, дважды.
Слава, тропарь святых.
И ныне, Богородичен воскресен по гласу тропаря святых.

По 1-м стихословии седален, глас 1:
Соборе святых Псково-Печерских,/ преподобнии отцы наши, молим вы прилежно,/ сохраните от бурь и искушений обитель сию,/ дом Пречистыя Богоматере,/ иноков в ней подвизающихся/ и всех верных, тихую пристань зде обретающих.
Слава, и ныне, Богородичен:
Настави ны на путь покаяния, уклоняющияся присно к злым безпутием,/ и Преблагаго прогневающия Господа,/ Неискусобрачная, Благословенная Марие,/ прибежище отчаянных человек, Божие обиталище.
По 2-м стихословии седален, глас 2:
Днесь обитель Псково-Печерская светло сияет,/ святых отец своих память творящи,/ днесь людие окрестнии радуются,/ во псалмех и пениих славяще Господа,/ Давшаго таковыя предстатели и заступники.
Слава, и ныне, Богородичен:
Тобою, Богородице Приснодево,/ Божественнаго естества быхом общницы, / Бога бо нам Воплотившагося родила ecи,/ темже по долгу Тя вси благочестно величаем.

Величание:
Ублажаем вас,/ преподобнии отцы наши Псково-Печерстии,/ и чтим святую память вашу,/ наставницы монахов/ и собеседницы Ангелов.
Псалом избранный: Терпя, потерпех Господа:

Ипакои гласа.
По полиелеи седален, глас 1:
Наста ныне, отцы богоноснии,/ светозарный собора вашего праздник,/ проповедует днесь обитель Псково-Печерская/ и Церковь Русская славу вашу,/ величающе вас Прославльшаго.
Слава, и ныне, Богородичен:
Безневестная Чистая Дево Богородице,/ Едина верных Предстательнице и Покрове,/ бед и скорбей, лютых обстояний вся избави./ на Тя надежду, Отроковице, имущия,/ и души наша спаси Божественными мольбами Твоими.

По 50-м псалме стихира, глас 7:
Приимите ныне благодарение чад ваших,/ преподобнии отцы Псково-Печер-стии,/ яко не оставили есте нас любовию отчею/ и тою страстей наших коварства разоряете,/ да приимем от Господа дарования небесная,/ подражающе деянием вашим Боголюбезным.

Канон воскресен, глас 3, со ирмосом на 4, и Богородицы на 2, и святых на 8.
Канон святых, глас 2.
Песнь 1
Ирмос: Во глубине постла иногда/ фараонитское всевоинство преоруженная сила,/ Воплощщееся же Слово всезлобный грех потребило есть,/ препрославлен-ный Господь, славно бо прославися.
Припев: Вси святии Псково-Печерстии, молите Бога о нас.
Приидите, инок множества, приидите, духовное сословие и людие вернии,/ составим лик празднующих,/ днесь духовная наша трапеза, днесь нам Небесное радование,/ совершающим святую память отец наших.

Светло совершаем торжество ваше сие и достойно почитаем вы,/ преподобнии Марко, Ионо, Корнилие, мати Вассо, Вассиане и Дорофее,/ Богу угодивший и на Небесех со всеми святыми прославленнии.

Ничтоже возлюбив на земли паче Зиждителя,/ прияли есте труды и подвига любве ради Христовы,/ темже сподобилися есте наследия праведных,/ молите Христа о нас, почитающих память вашу.

Богородичен:Достойно есть хвалити Тя, Мира Владычицу,/ яко и месту сему дольнему даровала еси Небес велелепие,/ мы же, веселящеся, прославляем Тя, Мати щедрот,/ мир подающую обители сей и велию милость.

Песнь 3
Ирмос: Процвела есть пустыня, яко крин, Господи,/ языческая неплодящая церковь,/ пришествием Твоим,/ в нейже утвердися мое сердце.
Притецем ныне, вернии, первонасельника Печерскаго Марка воспоим велегласно/ и о благочестнем Ионе благодарне возрадуемся,/ их бо молитвами смиренными и во тьме земней пещер богозданных/ излияся благодати Небесныя светолитие Трисиянное.

Песньми священными воспрославим и тя, преподобная Вассо,/ яко мира сего прелести возгнушавшися,/ возжелела еси образа иноческаго, во еже единому Христу послужити,/ темже и венец брачный на Небесныя славы венец пременила еси.

Достойную похвалу принесем/ преподобномученику Корнилию, игумену премудрому,/ иже и днесь умудряет сердца наша добре,/ направляя нас ко спасению.
Богородичен: Благодатию Твоею, о Богомати,/ нас, скверны всякия исполненных, очисти и укрепи,/ яко ко образу Успения Твоего Печерскому припадающе, взываем сице:/ не остави нас, грешных, но помилуй вся молитвами преподобных отец наших.
Седален,глас 4:
Псково-Печерская похвало, отцы преподобнии,/ явилися есте яко оружницы
Христовы,/ молитвы бо ваща яко меч духовный, грехи посекаяй,/ не престайте
ходатайствовати о чтущих память вашу светло. (Дважды)
Слава, и ныне, Богородичен, глас тойже:
Дево, Мати Благая, миру покрове и заступление,/ не остави обитель Псково-Печерскую, якоже во Успении мира не оставила еси,/ но спасай на Тя уповающия.
Песнь 4
Ирмос: Пришел ecи от Девы, не ходатай, ни Ангел, /но Сам, Господи, воплощься,/ и спасл ecи всего мя человека./ Тем зову Ти: слава силе Твоей, Господи.
Воспеваем днесь вас любовию, подвижницы Христовы:/ преподобномучениче Вассиане, преподобне отче Дорофее и Лазаре, старче праведный,/ иже процвели есте во обители сей, яко крини райстии.

Радуйся, Церковь Российская, возрасте бо в тебе апостольское сеяние Андрееве,/ земли Русския украшение, обители чудныя Печерския,/ едина во стране Киевстей, во Псковстей же другая:/ и та о Бозе ликует, и сия веселится, воспевающе соборы святых своих.

Свет спасительный возсия живущим окрест обители Псково-Печерския,/ глас словес Божественных и хвалы Творцу/ потрясе воздух прежде неплодныя пустыни,/ подвигнув верныя непрестанно славословити Христа Жизнодавца.
Богородичен:Богородице Дево, упование наше, моли Сына Твоего и Господа нашего/ сохранити от всех бед и напастей обитель сию, / юже преподобный Корнилий вкупе с подвизавшимися зде созда,/ да вси почерпающии помощь неоскудную от святынь ея/ во вся дни славят и ублажают Тя, в песнех величающе.
Песнь 5
Ирмос: Ходатай Богу и человеком был ecи, Христе Боже,/ Тобою бо, Владыко, к Светоначальнику Отцу Твоему/ от нощи неведения/ приведение имамы.
Жития треволнения ни во что же вменив, преподобне отче наш Марко преблажненне,/ в пустыню Псковскую вселился еси/ и в пещере, Богом зданней, в подвизех мнозех сокровенно пожил еси,/ того ради память твоя пребывает во веки.

Храня веру православную, латиняном не покорился еси/ и, от Юрьева града изшед, Иоанне, иерее Бога Живаго,/ храм Пречистыя в горе ископал еси, возжадав Той послужите во образе иночестем,/ наречен быв Иона, в души своей богатство Духа Святаго собрал еси, преблаженне.

Егда болезнь смертная постиже тя,/ прияла еси образ ангельский, преподобная мати Вассо,/ гроб же твой по кончине силою Божиею изнесен бысть двукраты из земли,/ да притекают людие вернии к раце мощей твоих.
Богородичен:Вся упования наша в Тебе, Мати Дево, имуще,/ молим Тя, яко святых Славу и Владычицу милосердную:/ даруй нам, преподобных Твоих ради, грехов исправление/ и иноческому житию споспешествуй присно, подающи благодать Свою неоскудну.
Песнь 6
Ирмос: В бездне греховней валяяся,/ неизследную милосердия Твоего призываю бездну:/ от тли, Боже, мя возведи.
Явился еси, преподобномучениче Корнилие,/ благочестия дивный наставник и обители Печерския строитель изрядный,/ украсил еси ю храмы святыми, такожде и окрест воздвизал еси их, чудь просвещая,/ ныне же в обители пребывая Небесней и Троице Святей предстоя выну, моли спастися душам нашим.
Оболгаша тя, отче Корнилие, льстецы злобнии,/ к безумию склонися царь Грозный и смерти тя предаде,/ темже и освятися твоею кровию обитель Псково-Печерская,/ и обогатишася тобою чада твоя, ту иночествующая, яко заступником пред Богом.
Памятующе подвиги твоя и борения и кончину от руки самодержца Российскаго,/ скорбящая братия Псково-Печерская/ храм устроиша во имя твое, преподобномучениче Корнилие,/ в немже безкровную жертву приносят, хваляще и благословяще Бога.
Богородичен:Яже снабдением пскович благоверных и труды преподобных созданный,/ почитаем пречестныя иконы Твоя, Богородице, просиявшия во обители Псково-Печерстей:/ Одигитрии, Звезды путеводныя, Успения и Умиления чудна,/ и, духовно веселящеся, яко Саму Тя, лобызаем, христианом Похвало и спасения Утверждение.
Кондак, глас 2:
Подобен: В молитвах неусыпающую:
Тебе, Богородице и Деве Чистей/, за вся люди Бога умоляющей,/ обитель Псково-Печерская святых своих, яко дар, днесь приносит,/ твоих же даров богатство кто исповесть,// яко и в рай возвела еси отцы наша.
Икос:
Яко сад благоуханный, процвела есть обитель Псково-Печерская святыми Твоими, Господи,/ ихже молитвами обилие милости Божия источися на месте сем, по словеси премудраго:/ елика аще помолится Тебе на месте сем,/ и Ты услышиши на месте жилища Твоего на Небеси, и сотвориши и милостив будеши им./Сея милости причастницы бывше, смиренно молим Тя, Христе:/ милостив буди ныне и присно ко\ святей обители сей,/ молитвами преподобных отцев наших, ихже Пречистая Богородица в рай введе.
Песнь 7
Ирмос: Богопротивное веление беззаконнующаго мучителя/ высок пламень вознесло есть. / Христос же простре Богочестивым отроком росу духовную, / Сый благословен и препрославлен.
Времена и лета Церкве Псковския изъявил еси нам, преподобномучениче Вассиане,/ Корнилию богомудрому в летописании помогая изрядно, таже и делом его ревнитель быв славный,/ ныне же с ним во Свете Трисияннем вопиеши согласно:/ благословен еси, Боже отец наших.

В трудех постнических яко благодати росу испивал еси вкупе со отцем нашим Корнилием, Вассиане преподобномучениче,/ такожде и чашу смертную испил еси с ним безвинно,/ и от царя земнаго к Царю Небесному предпосланы бысте, Тому вопиюще:/ благословен еси, Боже отец наших.

О, преподобномучениче Корнилие, не остави и ныне молитвами твоими чада твоя,/ якоже и прежде ты, защитниче страны Псковския, не оставил еси ю в нашествие Баториево,/ но, быв ко Пречистей теплый ходатай, пред Нею предстал еси в видении чуднем над Псковом градом, со святыми вопия:/ благословен еси, Боже отец наших.
Богородичен: Показа небо православия славу, егда явися на воздусе Мати всех верных,/ от нашествия же воев Баториевых Псков град и обитель Печерскую збавльши,/ горе бо святии со Корнилием Ю умоляху,/ долу же иноцы Печерстии со псковичи ко образу Ея со слезами припадаху, Богу вопиюще:/ благословен еси, Боже отец наших.
Песнь 8
Ирмос: Пещь иногда огненная в Вавилоне действа разделяше, / Божиим велением халдеи опаляющая, / верныя же орошающая, поющия:/ благословите, вся дела Господня, Господа.
Постнических подвигов желая сподобитися, преподобне отче наш Дорофее,/ во обитель Псково-Печерскую пришед, ветхаго человека совлеклся еси, добродетелей множеством украсився,/ темже и избра тя Пречистая Дева пренести образ Свой светозарный из предел Печерских в землю Ярославскую,/ да и тамо возсияет сугубо благодать Богородицы Преславныя.
Отрасле духовная обители Печерския, богоносе смиренне Дорофее,/ издревле страна Псковская и страна Ярославская велию веру к тебе имут,/ яко в первей сам духовно умудрися, во друзей же иныя умудрял еси, в пустыню Югскую приходя-щия,/ темже тя, угодника Христова, величаем.
Лазаре, благочестия подвижниче, равноангельным и праведным житием твоим в затворе/ явился еси наследник благ вечных,/ такожде и нас, грешных, в покаянии утверди,/ да и мы молитвами твоими просветимся и избавимся от сетей вражиих, отче наш преблаженне.
Богородичен: Богородицу и Матерь Света Тя присно величающе,/ ныне гласы умиленными Тя воспеваем,/ яко даровала еси нам собор преподобных Псково-Печерских славный,/ Едина Чистая и Благословенная.
Песнь 9
Ирмос: Безначальна Родителя Сын, Бог и Господь,/ воплощься от Девы, нам явися,/ омраченная просветити, собрати расточенная./ Тем Всепетую Богородицу величаем.
Недра земная не сокрыша сокровища мощей ваших, преподобнии Псково-Печерстии,/ имиже источаете струи благодати, освящающе души наша,/ да и мы внидем ко трапезе Христа Бога и Небеснаго веселия причастницы будем,/ ваш собор почитающе.
Величает вас, преподобнии, обитель Псково-Печерская,/ на Святей горе во имя ваше храм создавшая, яко споборником крепким в трудех и молитвах,/ и просит умильно: молите Христа Бога согрешением оставление даровати/ чтущим любовию святую память вашу.
Троичен:Триипостасный Боже, Живоначальная Троице,/ сохраняй обитель святую сию,/ молитв ради преподобных ея,/ во вся дни до скончания века.
Богородичен:Радуйся, Обрадованная,/ во Успении Твоем нас не оставляющая/ и молитвы преподобных отец Псково-Печерских/ к Сыну Твоему приносящая о спасении душ наших.
Светилен:
Соборе святых Печерских,/ стране Псковстей украшение,/ молитеся ко Господу/ о всем иночестве Российстем/ и о еже просветити чтущия вас любовию.
Стихиры на хвалитех, глас 8:
Духовными песньми преподобныя восхвалим,/ Марка, Иону, Корнилия,/ купно же Вассиана и Дорофея с преподобною Вассою/ и Лазаря прозорливаго, схимника Печерскаго,/ плотское мудрование духу повянувшия,/ пощении и сокровенными подвиги очистившияся,/ к нимже взываем:/ поминайте нас, чтущих память вашу.

Подобен: О, преславнаго чудесе:
О, преподобнии отцы Псково-Печерстии,/ равноангельное житие поживше,/ труды постническими и добротами духовными/ покорили есте телеса и души ваша Духу Божию,/ и, яко злато в горниле, испыта вас Христос Бог,/ темже и обрете вас достойны Себе,/ и яко всеплодие жертвенное прият,/ молитеся ко Господу/ спастися душам нашим.
О, Царице Небесе и земли,/ днесь собор святых Псково-Печерских/ всехвально совершающе,/ вопием Ти:/ Благодатная, радуйся,/ се Сына Твоего угодницы,/ се предстателие за нас пред Богом благочестнии,/ помощию Твоею таковии содеяшася,/ приими милостивно молитвы их о нас, грешных.
Ина стихира святым, глас тойже:
Преподобнии отцы Псково-Печерстии,/ предстояще за ны соборне Христу Богу,/ утверждение всем верным будите,/ иже к вам припадают, глаголюще:/ радуйтеся, Духа Святаго обиталища прекрасная,/ радуйтеся, Девы Пречистыя честнии служителие,/ радуйтеся, мысленная светила церковная,/ радуйтеся, ко Христу монахов множества приведшии,/ и, яко имущии дерзновение ко Господу,/ молите спастися душам нашим.
Слава, глас 8:
Иже Троицы Святыя зарею просвещаемии/ и Престолу Христа Бога выну предстоящии,/ преподобнии отцы Псково-Печерстии,/ приимите сие хвалебное пение/ и непрестанно о нас молитеся,/ почитающих верою пречестную память вашу.
И ныне, Богородичен:
Владычице, приими молитвы раб Твоих/ и избави нас/ от всякия нужды и печали.

На Литургии
Прокимен, глас 7: Честна пред Господем/ смерть преподобных Его. Стих: Что воздам Господеви о всех, яже воздаде ми? Апостол к Галатом, зачало 213. Аллилуиа, глас 6: Блажен муж, бояйся Господа,/ в заповедех Его восхощет зело. Стих: Сильно на земли будет семя его. Евангелие от Луки, зачало 24. Причастен: В память вечную будет праведник, от слуха зла не убоится.

Тропарь, глас 6:
Собор святых Псково-Печерских днесь почтим,/ в дебрех лесных обитель чудную основавших,/ и, яко крины, добродетельми процветших,/ и людем правый путь богоподобия указавших,/ молят бо Господа// миру мир даровати и велию милость.

Кондак, глас 2:
Тебе, Богородице и Деве Чистей/, за вся люди Бога умоляющей,/ обитель Псково-Печерская святых своих, яко дар, днесь приносит,/ твоих же даров богатство кто исповесть,// яко и в рай возвела еси отцы наша.