Происхожде́ние честны́х древ Честна́го и Животворя́щего́ Креста́ и па́мять святы́х седми́ му́ченик Маккаве́и, и ма́тере их Соломони́и, и учи́теля их Елеаза́ра. Величание

Происхожде́ние честны́х древ Честна́го и Животворя́щего́ Креста́ и па́мять святы́х седми́ му́ченик Маккаве́и, и ма́тере их Соломони́и, и учи́теля их Елеаза́ра

ВЕЧЕР

Обы́чная кафи́зма. На Го́споди, воззва́х: стихи́ры на 8. глас 4.

Днесь ра́дуется ве́рных мно́жество Боже́ственное:/ явля́ется бо Небе́сныи Крест конце́м,/ осия́вает твердь Све́том непристу́пным,/ во́здух озаря́ет и земли́ лице́ укра́шает./ Пое́т Боже́ственными пе́сньми Це́рковь Христо́ва,/ слу́жит, почита́ющи/ свы́ше ю́ соблюда́ющии Крест Боже́ственный и пречу́дный./ Его́же силою укрепля́еми,/ Влады́це присту́пим, зову́ще:/ умири́ мир и просвети́ ду́ши на́ша.

Да ра́дуется тварь и игра́ет:/ днесь бо облиста́ Крест в конце́х с Небесе́,/ земна́я просвеща́я,/ и совоку́плены показа́ расточе́ныя./ Днесь лику́ют с ли́ки а́нгельскими челове́цы,/ ибо браня́щее средогра́дие¹, Кресто́м разоре́но,/ во еди́но вся я́ве совокупи́./ Тем, предсия́я па́че со́лнца, всю тварь просвеща́ет благода́тию,// и уясня́ет, и спаса́ет ве́рно того́ чту́щия.

Па́че со́лнечныя зари́/ хотя́й ми́рови, я́коже скиптр честны́и,/ Царя́ Христа́ и кончи́ну показа́ти,/ Крест Боже́ственныи се предсия́ет ясно в конце́х./ Сеи́ возведе́ из а́да род челове́ч,/ а́да вельми́ плени́в, врага́ низложи́в,/ де́монов горды́ню до конца́ погуби́./ Ны́не же проявля́ет воскре́сение Спа́сово/ и спаса́ет зову́щия:// умири́ мир и просвети́ ду́ши на́ша.

СТИХИРЫ КРЕСТНЫ, ГЛАС 5:

Вся́ древа́ дубра́вная да возра́дуются,/ Дре́во ви́дяще всечестно́е,/ стра́стию Влады́чнею обра́дованно,/ благода́ть облистава́ющее я́ко пла́мень огня́,/ источа́ющее я́коже во́ды дарова́ния все́м,/ ду́ши просвеща́ющее и помышле́ния,/ неду́ги очища́ющее и стра́сти отгоня́ющее неви́димыя,/ язы́ки иноплеме́нныя побежда́ющее я́ве,/ побе́ды подаю́щее всегда́ ве́рным,// благослове́ние и ве́лию ми́лость.

Ме́сту, иде́же стоя́сте но́зе Госпо́дни,/ ве́рою покланя́ющеся, я́коже проро́к рече́:/ Христа́ славосло́вим распе́ншагося/ и сраспе́нша прегреше́ния на́ша:/ ю́же от дре́ва разори́вшаго кля́тву,/ и примири́вша Отцу́ отстоя́щыя отню́д помышле́ньми./ Ручны́я же Его́ и ножны́я гво́здия,/ копие́ и тро́сть,/ гу́бу и вене́ц облобыза́юще, /досажде́ния и наруга́ния, и и́на ели́ка подъя́т,// че́стне почита́ем, и́миже спасо́хомся.

Вся́ у́ды Христу́ сраспне́м, и ми́рови умертви́мся,/ и Мироде́ржцу Христу́ по стопа́м ходи́ти вожделе́вше,/ Того́же на ра́мех Боже́ственный Кре́ст но́сим,/ отверже́нием плотска́го взыгра́ния,/ и похоте́й злы́х, я́же ду́шу влеку́т ко греху́,/ Тому́ мня́ще предста́ти, и зре́ти Того́ на Кресте́ пригвожде́на,/ и ду́шу свою́ в ру́це Роди́телю со издыха́нием преда́вша,// я́ко да всегда́ с Ни́м бу́дем неразлу́чни.

Сла́ва, глас 8:

От мно́гия Твоея бла́гости,/ я́же к нам Иису́се Бла́же!/ ка́ко Себе́ смири́л еси́/ и был еси́ челове́к, и пострада́ти изво́лил еси́/ Крест и смерть поно́сную за непотр́бныя рабы́ претерпе́в/ кото́рый Ти досто́йный дар принесе́м богоподо́бный; // то́чию сла́вим Тя благодаря́ще ве́рнии.

И ны́не, глас то́йже:

Его́же дре́вле Моисе́й прообрази́в собо́ю,/ Амали́ка низложи́в, победи́,/ и Дави́д песнопе́вец/ подно́жию Твоему́, вопия́, кла́нятися повелева́ше,/ Честно́му Кресту́ Твоему́, Христе́ Бо́же,/ днесь, гре́шнии, кла́няемся, устна́ми недосто́иными/ Тя, изво́лившаго пригвозди́тися на нем, воспева́юще, мо́лимся:/ Го́споди, с разбо́иником Ца́рствия Твоего́ сподо́би нас.

На литии, глас 8:

На Кресте́ Христе́ пригво́ждся,/ пронза́емь в ру́це и но́зе,/ в ребро́ же свято́е прободе́н бы́л еси́,/ источа́я ми́ ка́пли Боже́ственнаго спасе́ния, Преблаги́й,/ кро́вь же и во́ду,/ я́ко да омы́еши мо́й гно́й и скве́рну:// сла́ва Твое́й, Всеще́дре, бла́гости.

Страда́ти претерпе́л еси́, Влады́ко,/ я́ко да безстра́стие все́м пода́си,/ покланя́ющымся Твои́м страсте́м,/ и во́льному заколе́нию,/ и копию́, и гвозде́м, и тро́сти,/ я́же долготерпели́вно хотя́ претерпе́л еси́: /я́ко да и мне́ исхода́таиши, Го́споди,// ра́ди страсте́й Твои́х безстра́стие

Сла́ва, и ны́не, Крестобогоро́дичен:

Го́споди, егда́ Тя Со́лнца Пра́веднаго/ со́лнце ви́де на Дре́ве пове́шена, /лучи́ скры́, и луна́ све́т во тьму́ преложи́:// Всенепоро́чная же Твоя́ Ма́ти утро́бою уязвля́шеся.

На стихо́вне стихи́ры кре́стны, гла́с 5:

Го́споди, при Моисе́и иногда́ проро́це, то́чию о́браз Креста́ Твоего́ явля́емь, побежда́ше враги́ Твоя́. Ны́не же са́мый Кре́ст Тво́й иму́ще, по́мощи про́сим: укрепи́ Це́рковь Твою́, мно́гия ра́ди ми́лости, Человеколю́бче.

Сти́х: Возносите Господа Бога нашего, / и покланяйтеся подножию ногу Его, яко свято есть

Кре́ст Тво́й, Христе́, а́ще и дре́во ви́димо е́сть существо́м, но Боже́ственною оде́яно е́сть си́лою, и чу́вственне ми́рови явля́емь, у́мно на́ше чудотвори́т спасе́ние, ему́же кла́няющеся сла́вим Тя́, Спа́се, поми́луй на́с.

Сти́х: Бог же, Царь наш прежде века, соделал спасение посреди земли.

То́чию водрузи́ся Дре́во, Христе́, Креста́ Твоего́,/ пре́лесть прогна́на бы́сть, и благода́ть процвете́: /уже́ бо ктому́ не́сть осужде́ния мучи́тельство,/ но побе́да яви́ся на́м спасе́ния:/ Кре́ст бо на́м е́сть похвала́, / Кре́ст на́м утвержде́ние,// Кре́ст на́м ра́дование.

Слава, глас 8:

Моисе́ев же́зл прообража́ше/ Честны́й Кре́ст Тво́й, Спа́се на́ш:/ те́м бо спаса́еши, я́ко из глубины́ морски́я, //лю́ди Твоя́, Человеколю́бче

И ны́не, глас то́йже:

Глас проро́ка Твоего́ Моисе́я, Бо́же,/ испо́лнися, глаго́ляй:/ узри́те живо́т ваш, вися́щ пред очесы́ ва́шими./ Днесь Крест воздвиза́ется,/ и мир от ле́сти свобожда́ется;/ днесь Христо́во воскресе́ние обновля́ется,/ и концы́ земли́ ра́дуются,/ в кимва́лех дави́дски песнь Тебе́ принося́ще и глаго́люще:/ соде́лал еси́ спасе́ние посреде́ земли́, Бо́же,/ Крест и воскресе́ние,/ и́хже ра́ди нас спасл еси́, Бла́же и Человеколю́бче,// Всеси́льне Го́споди, сла́ва Тебе́.

Тропа́рь, глас 1:

Спаси́, Го́споди, лю́ди Твоя́/ и благослови́ достоя́ние Твое́,/ побе́ды православным христианам на сопроти́вныя да́руя/ и Твое́ сохраня́я Кресто́м Твои́м жи́тельство.

Изве́стно же да быва́ет: Я́ко пре́жде клепа́ния вхо́дит иере́й в сосудохрани́тельницу и полага́ет Честны́й Крест на же́ртвеннице. И по отпуще́нии вече́рни иере́й и диа́кон облеку́тся в ри́зы. И диа́кон покади́т Честны́й Крест и рече́т: Благослови́, влады́ко. Иере́й: Благослове́н Бог наш: Та́же, Трисвято́е. По О́тче наш: тропа́рь Креста́. Сла́ва, и ны́не: конда́к. И взима́ет иере́й Крест с блю́дом на главу́ и вно́сит в олта́рь, предыде́т пред ним со двема́ лампа́дами. И полага́ет Крест на трапе́зе, на Ева́нгельском ме́сте, а Ева́нгелие на Го́рнее ме́сто. И возжгу́т пред ним свещу́ на всю нощь.

НА У́ТРЕНИ

На Бог Госпо́дь: тропа́рь Креста́, два́жды. Сла́ва: И ны́не: Богородичен, гл.тойже:

Гавриилу вещавшу Тебе, Дево, радуйся, / со гласом воплощашеся всех Владыка, / в Тебе, святем кивоте, / якоже рече праведный Давид; / явилася еси ши́ршая Небес, / поносивши Зиждителя Твоего. / Слава Всельшемуся в Тя, / слава Прошедшему из Тебе, / слава Свободившему нас Рождеством Твоим.

Величание

Величаем Тя,/ Живодавче Христе,/ и чтим Крест Твой святый,/ имже нас спасл еси // от работы вражия.

Псалом избранный:

Суди Господи обидящия мя, побори борющия мя. Приими оружие и щит, и востани в помощь мою. Знаменася на нас свет лица Твоего Господи. Яко оружием благоволения венчал еси нас. Дал еси знамение боящимся Тебе, еже убежати от лица лука. Познати на земли путь Твой, во всех языцех спасение Твое. Видеша вси концы земли спасение Бога нашего.

Аллилуиа, аллилуиа, аллилуиа, слава Тебе Боже (дважды)

Прокимен, глас 4. Видеша вси концы земли спасение Бога нашего.

Таже: Воскресение Христово видевше: Псалом 50. Слава: Молитвами апостолов: И ныне: Молитвами Богородицы: Помилуй мя Боже:

И стихира, глас 6:

Кресте Христов, христиан упование,/ заблуждших наставниче,/ обуреваемых пристанище,/ в бранех победа,/ вселенныя утверждение,/ недужных врачу,/ мертвых воскресение, // помилуй нас.

На хвали́тех стихи́ры на 6, глас 1.

Небе́сная ше́ствия/ Крест Честны́й гото́вит всем,/ тому́ покланя́ющимся ве́рою несумне́нною,/ и лико́м невеще́ственных сил/ И́же на нем Пригвозди́выйся// сочета́ет любо́вию пою́щия того́. (дважды)

Кла́няющеся ве́рою Кресту́ Честно́му,/ на нем распе́ншагося воспое́м Влады́ку,/ Того манове́нием,/ устне́ вку́пе и ду́шу очища́юще,// и сия́нии сего́ мы́сленными уясни́мся, хваля́ще его́.

Го́ресть дре́вле услажда́я, / Моисе́й изба́ви Изра́иля,/ о́браз Креста́ напису́я,/ мы же сего́, вси ве́рнии,/ та́йно и Боже́ственно вообража́юще в сердца́х на́ших,// всегда́ спаса́емся держа́вою его́.

Слава, глас 4:

Кресту Твоему Честному покланяемся Преблагий,/ любовию облобызая,/ и славлю твое еже паче ума сошествие,/ безмерную милость и неизреченны щедроты,/ и богатую благостыню,/ еяже ради спасл еси человеческое естество / содержимо бывшее во тьме прегрешений, // слава Христе распятию Твоему.

И ны́не, Креста́, глас то́йже:

Пособи́вый, Го́споди, кро́ткому Дави́ду покори́ти иноплеме́нника,/ ве́рному на́шему во́инству спобо́рствуй/ и ору́жием Креста́ низложи́ враги́ на́ша./ Покажи́, Благоутро́бне, / на нас дре́вния ми́лости Твоя́,/ и да разуме́ют вои́стинну, я́ко Ты еси́ Бог,/ и, на Тя наде́ющиися, побежда́ем,/ моля́щиися обы́чно Пречи́стей Твое́й Ма́тери// дарова́тися нам ве́лией ми́лости.

Славосло́вие вели́кое, ти́хо, со гла́сом.

Иере́ю же оболче́ну су́щу во всю оде́жду свяще́нничекую, прихо́дит с кади́лом к святе́й трапе́зе, предходя́щу ему́ диа́кону с лампа́дою, и кади́т святу́ю трапе́зу и Честны́й Крест, и та́ко взима́ет Честны́й Крест с блю́дом на главу́, и исхо́дит се́верными дверьми́ из олтаря́, предиду́щим ему́ со двема́ лампа́дами и с кади́лом; прихо́дит же пря́мо ца́рских двере́й и стои́т, ожида́я конца́ трисвята́го. Кончава́ему же трисвято́му, возглаша́ет иере́й: Прему́дрость, про́сти. И кли́рицы пою́т тропа́рь: Спаси́, Го́споди, лю́ди Твоя́: три́жды. И та́ко прихо́дит иере́й, нося́ на главе́ Честны́й Крест, пред святы́я ца́рския две́ри ко анало́гию, ему́же укра́шену су́щу, полага́ет на нем Честны́й Крест. И твори́т поклоне́ние Честно́му Кресту́, три́жды, поя́ тихогла́сно: Кресту́ Твоему́/ покланя́емся, Влады́ко,/ и свято́е Воскресе́ние Тво́е сла́вим. И ли́кове то́же поют велегла́сно, три́жды. Та́же целу́ют Честны́й Крест и покланя́ются па́ки еди́ною.

Пою́ще стихи́ры самогла́сны, глас 2:

Прииди́те, ве́рнии,/ Животворя́щему Дре́ву поклони́мся,/ на не́мже Христо́с, Царь сла́вы, во́лею ру́це распросте́р,/ вознесе́ нас на пе́рвое блаже́нство,/ я́же пре́жде враг сла́стию укра́д,/ изгна́ны от Бо́га сотвори́./ Прииди́те, ве́рнии, Дре́ву поклони́мся,/ и́мже сподо́бихомся неви́димых враг сокруши́ти главы́./ Прииди́те, вся отече́ствия язы́ков,/ Крест Госпо́день пе́сньми почти́м:/ ра́дуйся, Кресте́, па́дшаго Ада́ма соверше́нное избавле́ние,/ о тебе́ бо ве́рнейшии ца́рие на́ши хва́лятся,/ я́ко твое́ю си́лою исма́ильтеския лю́ди держа́вно покаря́юще./ Тя ны́не со стра́хом христиа́не целу́юще,/ на тебе́ пригвозди́вшагося Бо́га сла́вим, глаго́люще:/ Го́споди, на том пригвозди́выйся, поми́луй нас,/ я́ко Благ и Человеколю́бец.

Глас 5: Зря́щи Тя тварь вся, на Кресте́ на́га вися́ща,/ Соде́теля и Зижди́теля всех,/ изменя́шеся стра́хом и рыда́ше,/ со́лнце же свет омрачи́,/ и земля́ колеба́шеся,/ ка́мение же разседа́шеся,/ и хра́ма све́тлость раздира́шеся,/ ме́ртвии воста́ша от гробо́в,/ и А́нгельския cи́лы ужасо́шася, глаго́люще:/ о, чудесе́! Суди́я су́дится/ и стра́ждет хотя́ за спасе́ние ми́ра и обновле́ние.

Глас 8: Днесь Влады́ка тва́ри/ и Госпо́дь сла́вы/ на Кресте́ пригвожда́ется/ и в ре́бра пробода́ется,/ же́лчи и о́цта вкуша́ет/ сла́дость Церко́вная,/ венце́м от те́рния облага́ется./ Покрыва́яй не́бо о́блаки/ оде́ждею облачи́тся пору́гания,/ и зауша́ется бре́нною руко́ю/ руко́ю созда́вый челове́ка;/ по плеще́ма бие́н быва́ет/ одева́яй не́бо о́блаки./ Заплева́ния и ра́ны прие́млет,/ поноше́ния и зауше́ния/ и вся те́рпит мене́ ра́ди, осужде́ннаго,/ Избави́тель мой и Бог,/ да спасе́т мир от пре́лести, я́ко Благоутро́бен.

Сла́ва, и ны́не, глас то́йже:

Днесь неприкоснове́нныи существо́м/ прикоснове́н мне быва́ет,/ и стра́ждет стра́сти/ свобожда́яй мя от страсте́й;/ свет подава́яй слепы́м/ от беззако́нных усте́н оплева́ется/ и дае́т плещи́ за плене́нныя на ра́ны./ Сего́ Чи́стая Де́ва и Ма́ти на Кресте́ зря́щи,/ боле́зненно веща́ше:/ увы́ Мне, Ча́до Мое́,/ что сие́ сотвори́л еси́?/ Кра́сный добро́тою па́че всех челове́к,/ бездыха́нный и беззра́чный явля́ешися,/ не име́я ви́да, ни́же добро́ты./ Увы́ Мне, Мой Све́те,/ не могу спя́ща зре́ти Тя,/ утро́бою уязвля́юся,/ и лю́тое ору́жие се́рдце Мое́ прохо́дит./ Воспева́ю Твоя́ стра́сти,/ покланя́юся благоутро́бию Твоему́,/ Долготерпели́ве, сла́ва Тебе́.

Посе́м ектении́. Поми́луй нас, Бо́же: И Испо́лним у́треннюю моли́тву: Диа́кон: Прему́дрость. Иере́й отпу́ст, и пе́рвый час. На 1-м ча́се тропа́рь Креста́. Сла́ва: святы́х. И ны́не: Богоро́дичен часо́в. По О́тче наш: конда́к Креста́ и соверше́нный отпу́ст.