Ин кано́н свята́го, на 4, глас 4.

Песнь 7

Ирмо́с: О́роцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Ны́не ви́дена бы́ша апосто́лом неви́димая Божества́ во пло́ти,/ на горе́ Фаво́рстей облиста́вша, вопию́щим:/ благослове́н еси́, Го́споди Бо́же, во ве́ки.

Ужасо́шася стра́хом, уди́вльшеся благоле́пию Боже́ственнаго Ца́рства,/ на горе́ Фаво́рстей апо́столи, вопию́ще:/ благослове́н еси́, Го́споди Бо́же, во ве́ки.

Ны́не неуслы́шанная услы́шана бы́ша:/ без отца́ бо Сын от Де́вы Оте́ческим гла́сом сла́вно свиде́тельствуется,/ я́ко Бог и челове́к То́йже во ве́ки.

Положе́нием не был еси́ Вы́шняго, существо́м же Сын возлю́блен,/ пре́жде Сый, нам прибли́жился еси́ непрело́жно:/ благослове́н еси́, Го́споди Бо́же, во ве́ки.

Ин кано́н свята́го, на 4, глас 4.

Ирмо́с: Спасы́й во огни́ Авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Тайноводи́ти предъизбра́н и служи́ти Сло́ву,/ сосу́д показа́ся свяще́н Небе́снаго хра́ма и возложе́ние, воспева́я Сотво́ршему:/ препе́тый Го́споди, Бо́же оте́ц на́ших, благослове́н еси́.

Зако́ном живота́ и́же во Христе́ огражда́емь, преблаже́нне,/ су́щим сме́рти и тли законоположи́телем ума́ не подклони́л еси́, воспева́я, Лавре́нтие:/ препе́тый Го́споди, Бо́же оте́ц на́ших, благослове́н еси́.

Я́коже не́кий, безболе́знен я́ве, те́лом обложе́н, преблаже́нне,/ до́блим по́мыслом на всея́дца огня́ дерзну́л еси́, взыва́я, пребога́те:/ препе́тый Го́споди, Бо́же оте́ц на́ших, благослове́н еси́.

Богоро́дичен: Дверь показа́лася еси́ мы́сленная восто́ка Вы́шняго,/ я́вльшагося на земли́ челове́ком из Тебе́, Богоневе́сто,/ па́че сло́ва и ума́, Бо́га отце́в благослове́ннаго.

Песнь 8

⇐ Предыдущая 1 2 3 4 5 678 9 10 Следующая ⇒