Моисе́й, проро́ков пе́рвый, да похва́лится словесы́.

Моисе́й, проро́ков пе́рвый, да похва́лится словесы́.

В Богоро́дичнах же: Кли́ментово. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма// Амали́кову си́лу в пусты́ни победи́л есть.

Моисе́й проро́ков да восхва́лится пе́рвый,/ я́ко пред Бо́гом бесе́довав пе́рвый Я́ве лице́м к Лицу́,/ не в гада́ниих рече́ний, но я́ко в ви́де пло́ти ви́дев Того́.

Я́ко боже́ственна народоводи́теля и изба́вителя тя/ ро́ду твоему́ Изра́илю, Моисе́е богови́дче, даде́ Бог,/ Отцу́ я́коже помоли́ся,/ обетова́ния пома́занием провозвеща́я твое́ рожде́ние.

Му́дрости тя сокро́вище обрето́ша родны́я доброде́тели, сокрове́но зна́нием Бо́жиим,/ я́коже в ковче́зе, богови́дче Моисе́е;/ тем тя воспита́ше цари́ца и Боже́ственный Про́мысл.

Богоро́дичен: Устраши́ся Моисе́й, ви́дев пресла́вное в пе́рвых виде́ние,/ купине́ и пла́меню стра́нное смеше́ние, Бо́га из Де́вы Ма́тере прообразу́ющее Нетле́ннаго,/ Его́же, мину́в времена́, ви́де пло́тию.

Песнь 3.

Кано́н священному́ченика. Глас 6.

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени// испове́дания Твоего́.

Несть свят, я́коже Ты, Го́споди Бо́же мой,/ возвы́сивый рог ве́рнаго Твоего́ Вави́лы/ и венча́в его́ венце́м испове́дания Твоего́.

Му́чеников бысть кре́пость, Го́споди, Крест Твой,/ утверди́вый о́троки с блаже́нным Вави́лою/ и низложи́вый те́ми пре́лести безбожныя де́рзости.

Кре́пость оскуде́, Христе́, диа́воля в коне́ц:/ незло́бивыми бо детьми́ и боже́ственным Вави́лою побежда́ется кре́пкий/ и посмева́емь есть, от них поруга́емь.

Богоро́дичен: Боже́ственнаго рождества́ Твоего́, Чи́стая,/ вся́кий естества́ чин прехо́дит чу́до:/ Бо́га бо преесте́ственно зачала́ еси́ во утро́бе/ и, ро́ждши, пребыва́вши Присноде́ва.

⇐ Предыдущая 1 234 5 6 7 8 9 10 Следующая ⇒