Канон святому апостолу Варфоломею (Нафанаилу)

Канон святому апостолу Варфоломею (Нафанаилу)

Припев: Святы́й апо́столе Вафоломéе, моли́ Бо́га о на́с.

Память:05 мая (22 апреля ст. ст.); 24 июня (11 июня ст. ст.); 07 сентября (25 августа ст. ст.)

Пе́снь 1.

Ирмо́с:Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Прове́дец все́х и Бо́г, ума́ твоего́ богови́дно зря́, избра́ и тя́ сочета́ ли́ку апо́стольску, Варфоломе́е всехва́льне, благода́тию просвети́в се́рдце твое́.

Доброде́телей на высоту́ возше́д, язы́ком огнедохнове́нным огневи́дно разделе́нием обогати́лся еси́, я́ко Христо́в апо́стол, прише́ствием Уте́шителя, пребога́те, нече́стия хвра́стие пояда́я, и неразу́мия.

Богоно́сен у́гль вои́стинну, Боже́ственнаго Ду́ха заре́ю разжже́н, показа́лся еси́, пре́лести се́но попаля́я, Варфоломе́е прехва́льне, и просвеща́я ве́рою сердца́ пою́щих тя́.

Богоро́дичен:Чи́стая, рцы́, ка́ко дои́ши? Ка́ко же Ма́ти была́ еси́, де́вственными печа́тьми сия́ющи? — Не пыта́й бе́здны, неприча́стна естество́м, испыта́яй еди́н все́х Бо́г и Госпо́дь, Его́же и пло́тию роди́х.

Пе́снь 3.

Ирмо́с:Процвела́ е́сть пусты́ня, я́ко кри́н, Го́споди, язы́ческая неплодя́щая це́рковь, прише́ствием Твои́м, в не́йже утверди́ся мое́ се́рдце.

Я́ко до́ждь небе́сный, изсо́хшую, прему́дре, вселе́нную всю́ тмо́ю безбо́жия напои́л еси́, богови́дче досточу́дне.

Исто́чник изы́де спаси́тельнаго пи́ва, Варфоломе́е всече́стне, и многосугу́б пло́д прине́сл еси́ язы́ком спасе́ния, досточу́дне.

Со́лию благода́ти и́дольское уста́вил еси́ гное́ние, всему́дре, сла́дким сло́вом ве́ры сердца́ услажда́я чту́щих тя́.

Богоро́дичен:Еди́ну Де́ву Тя́ и Ма́терь чти́м, я́ко спасе́ния Хода́таицу бы́вшую на́м, Непоро́чная, и ми́р избавля́ющую моли́твами Твои́ми.

12 3 4 Следующая ⇒