Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Моли́те за ны́, святи́и му́ченицы, да изба́вимся от беззако́ний на́ших: ва́м бо дана́ е́сть благода́ть моли́тися за ны́.

Сла́ва, и ны́не, Крестобогоро́дичен:

Подо́бен: Преподо́бне О́тче:

Ве́сь восприи́м мо́й зра́к, Созда́тель и Бо́г облече́ся, вообрази́ти и́же пре́жде па́дший зра́к Ада́мов восхоте́вый, на Кре́ст вознесе́ся во́лею я́ко пови́нен: и ру́це распросте́р ны́не, исцеля́я ру́це я́же дре́вле осла́бленныя к дре́ву сне́дному. Его́же Всечи́стая ви́дящи восклица́ше: что́ сие́ Твое́, Сы́не Мо́й, неизрече́нное долготерпе́ние? Не терплю́ на Кресте́ воздви́жена зря́щи Тя́, го́рстию содержа́ща всея́ земли́ концы́.

Та́же, Ны́не отпуща́еши раба́ Твоего́, Влады́ко: Трисвято́е. По О́тче на́ш: тропа́рь свято́му. Сла́ва, и ны́не, Богоро́дичен, во гла́с тропаря́. Та́же, ектениа́, и отпу́ст.

В сре́ду у́тра

по 1-м стихосло́вии, седа́льны кре́стны. Гла́с 5:

Ме́сто ло́бное ра́й бы́сть, то́чию бо водрузи́ся дре́во кре́стное, а́бие израсти́ гро́зд живо́тный, в на́ше весе́лие, Тебе́, Спа́се: сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Распе́ншагося Спа́са и Изба́вителя на́шего во́лею, я́коже ве́сть, и я́коже благоизво́ли, воспои́м ве́рнии, и просла́вим: я́ко пригвозди́ на Кресте́ грехи́ челове́ков: избавля́я от пре́лести ро́д челове́ческий, и Ца́рствию сподо́бил е́сть.

Сла́ва, и ны́не, Крестобогоро́дичен: Возвы́шена на Дре́ве я́ко узре́ роди́вшая Тя́ боле́зней кроме́, рыда́ше с пла́чем и взыва́ше: увы́ Мне́, сладча́йший Сы́не, уязвля́юся душе́ю, на Кресте́ зря́щи Тя́ пригвожде́на, посреде́ двою́ злоде́ю, я́коже злоде́я пригвожде́на.

⇐ Предыдущая 1 234 5 6 7 8 9 10 Следующая ⇒