мая 2020 года 3 страница

Преукраше́нна сла́вою Боже́ственною Честна́я Цари́ца, Сы́ну Своему́ и Бо́гу предстои́т, нам спасе́ние душе́вное прося́щи.

Катава́сия: Боже́ственным покрове́н, медленоязы́чный мра́ком, извити́йствова Богопи́санный зако́н, ти́ну бо оттря́с очесе́ у́мнаго, ви́дит Су́щаго, и науча́ется Ду́ха ра́зуму, хваля́ Боже́ственными пе́сньми.

Песнь 3

Канон воскресный. Глас 6.

Ирмо́с: Несть свят, я́коже Ты, Го́споди Бо́же мой, вознесы́й рог ве́рных Твои́х, Бла́же, и утверди́вый нас на ка́мени испове́дания Твоего́.

Сла́ва, Го́споди, свято́му Воскресе́нию Твоему́.

Бо́га распина́ема пло́тию зря́щи тварь, растаява́шеся стра́хом, но содержи́тельною дла́нию нас ра́ди Распя́таго, кре́пко держи́ма бе.

Сла́ва, Го́споди, свято́му Воскресе́нию Твоему́.

Сме́ртию смерть разоре́на лежи́т окая́нная без дыха́ния, Живота́ бо не терпя́щи боже́ственнаго прираже́ния, умерщвля́ется кре́пкий, и да́руется всем воскресе́ние.

Пресвята́я Богоро́дице, спаси́ нас.

Боже́ственнаго рождества́ Твоего́, Чи́стая, вся́кий естества́ чин превосхо́дит чу́до, Бо́га бо преесте́ственне зачала́ еси́ во чре́ве, и ро́ждши пребыва́еши при́сно Де́ва.

Канон Вознесения. Глас 5.

Сла́ва Тебе́, Бо́же наш, сла́ва Тебе́.

Возше́л еси́ Жизнода́вче Христе́ ко Отцу́, и возне́сл еси́ род наш, Человеколю́бче, неизрече́нным благоутро́бием Твои́м.

Сла́ва Тебе́, Бо́же наш, сла́ва Тебе́.

Чи́ни а́нгельстии, Спа́се, челове́ческое естество́ ви́девше совосходя́щее Тебе́, непреста́нно удивля́еми воспева́ху Тя.

Сла́ва Тебе́, Бо́же наш, сла́ва Тебе́.

Ужаса́хуся а́нгельстии ли́цы, Христе́, зря́ще Тя с телесе́м возне́сшася, и воспева́ху свято́е Твое́ вознесе́ние.

Пресвята́я Богоро́дице, спаси́ нас.

Моли́ непреста́нно, Чи́стая, Произше́дшаго от ложе́сн Твои́х, изба́витися пре́лести диа́воли, пою́щим Тя, Ма́терь Бо́жию.

Канон отцев. Глас 6.

Святи́и отцы́, моли́те Бо́га о нас.

Ток и страсть и сече́ние, А́рий безу́мный Рождеству́ Боже́ственному злоче́стно нечести́вый прилага́я, сечи́тельным оте́ческим мече́м отсека́ется.

Святи́и отцы́, моли́те Бо́га о нас.

Я́коже дре́вле боже́ственный Авраа́м, вво́инившеся вси всечестни́и богоглаго́ливии, враги́ Твоя́, Бла́же, неи́стовныя, Твое́ю си́лою кре́пко погуби́ша.

Сла́ва Отцу́, и Сы́ну, и Свято́му Ду́ху.

Пе́рвое собра́ние собра́вшееся Твои́х свяще́нных, единосу́щна Тя, Спа́се, безнача́льному Отцу́, и Творца́ всех, ро́ждшагося благоче́стно пропове́даша.

И ны́не и при́сно, и во ве́ки веко́в. Ами́нь.

Не мо́жет сло́во земны́х, ниже́ язы́к, Де́во, восхвали́ти Тя досто́йно, из Тебе́ бо без се́мене Жизнода́вец Христо́с воплоти́тися, Пречи́стая, благоволи́.

Катава́сия: Разве́рзе утро́бы неча́дствовавшия у́зы, доса́ду же неудоботерпи́му благоча́дствующия, еди́на моли́тва проро́чицы дре́вле А́нны, нося́щия дух сокруше́н, к Си́льному и Бо́гу ра́зумов.

Го́споди, поми́луй. Трижды.

Сла́ва, и ны́не:

Конда́к Вознесе́ния, глас 6:

Е́же о нас испо́лнив смотре́ние, и я́же на земли́ соедини́в Небе́сным, возне́слся еси́ во сла́ве, Христе́ Бо́же наш, ника́коже отлуча́яся, но пребыва́я неотсту́пный, и вопия́ лю́бящим Тя: Аз есмь с ва́ми, и никто́же на вы.

И́кос:

Я́же земли́ на земли́ оста́вившии, я́же пе́пельная пе́рсти уступа́ющии, прииди́те воспря́нем, и на высоту́ возведе́м о́чи и мы́сли, впери́м ви́ды, вку́пе и чу́вства, на небе́сная врата́, сме́ртнии, непщу́им бы́ти в Ма́сличной горе́, и взира́ти на Избавля́ющаго на о́блацех носи́ма. Отону́ду бо Госпо́дь на небеса́ востече́, и та́мо даролюбе́зны да́ры раздая́ апо́столом Свои́м, уте́шив я́, я́ко Оте́ц, и утверди́в я́, наста́вив, я́ко сыно́в, и рече́ к ним: не разлуча́юся вас, Аз есмь с ва́ми, и никто́же на вы.

Седален отцев, глас 4:

Свети́льницы пресве́тлии и́стины Христовы ми́ру яви́стеся на земли́ вои́стинну блаже́ннейшии отцы́ боговеща́ннии, изсуши́вше е́реси ху́льных языковре́дий, и угаси́вше пламенови́дная злосла́вных смуще́ния, те́мже, я́ко святи́телие Христо́вы, моли́теся спасти́ся нам.

Слава, другий, глас тойже:

Нике́йский све́тлый град днесь, от всея земли́ к себе́ призва́ три́ста и осмьна́десять священнонача́льников, на глаго́лавшаго хулу́ А́риа, и умаля́ющаго еди́наго от Тро́ицы, Сы́на и Сло́ва су́щаго Бо́жия, его́же А́риа низло́жше, ве́ру утверди́ша.

И ныне, Вознесения:

Возше́д на небеса́ со сла́вою, и соседы́й Отцу́ одесну́ю, ника́коже разлучи́лся еси́, Человеколю́бче Христе́, Ду́ха же Свята́го прему́дрым ученико́м Твои́м посла́ти обеща́вый, и на́ша озари́вый мы́сли, даждь просвеще́ние, я́ко да непреста́нно пое́м Тя, Влады́ко.

Песнь 4

Канон воскресный. Глас 6.

Ирмо́с: Христо́с моя́ си́ла, Бог и Госпо́дь, честна́я Це́рковь Боголе́пно пое́т, взыва́ющи, от смы́сла чи́ста о Го́споде пра́зднующи.

Сла́ва, Го́споди, свято́му Воскресе́нию Твоему́.

Дре́во процвело́ есть, Христе́, и́стинныя жи́зни, крест бо водрузи́ся, и напое́н быв кро́вию и водо́ю от нетле́ннаго Твоего́ ребра́, живо́т нам прозябе́.

Сла́ва, Го́споди, свято́му Воскресе́нию Твоему́.

Не ктому́ змий мне ло́жне обоже́ние подлага́ет, Христо́с бо богоде́латель челове́ческаго естества́, ны́не невозбра́нно стезю́ живота́ мне отве́рзе.

Пресвята́я Богоро́дице, спаси́ нас.

Я́ко вои́стинну неизвеща́нна и непостижи́ма, я́же Твоего́ боголе́пнаго, Богоро́дице, суть рождества́, су́щим на земли́ и на небеси́, Присноде́во, та́инства.

Канон Вознесения. Глас 5.

Сла́ва Тебе́, Бо́же наш, сла́ва Тебе́.

Возне́слся еси́ во сла́ве, а́нгелов Царю́, Уте́шителя нам от Отца́ посла́в. Те́мже вопие́м: сла́ва, Христе́, вознесе́нию Твоему́.

Сла́ва Тебе́, Бо́же наш, сла́ва Тебе́.

Я́ко взы́де Спас ко Отцу́ с пло́тию, удиви́шася Ему́ а́нгельская во́инства, и возопи́ша: сла́ва, Христе́, вознесе́нию Твоему́.

Сла́ва Тебе́, Бо́же наш, сла́ва Тебе́.

А́нгельския си́лы го́рнейшим вопия́ху: врата́ возьми́те, Христу́ на́шему Царю́, Его́же воспева́ем вку́пе со Отце́м и Ду́хом.

Пресвята́я Богоро́дице, спаси́ нас.

Богородичен: Де́ва роди́ и ма́терняя не позна́, но Ма́ти у́бо есть, Де́вою же пребы́сть, Ю́же воспева́юще, ра́дуйся, Богоро́дице, взыва́ем.

Канон отцев. Глас 6.

Святи́и отцы́, моли́те Бо́га о нас.

Прелюбоде́йствовавый А́рий умо́м неразу́мным правосла́вную ве́ру, оте́ческими суды́ изгна́н бысть от Це́ркве, я́коже уд гнилы́й, злоимени́тый.

Святи́и отцы́, моли́те Бо́га о нас.

О Тебе́, Влады́ко, подвиза́вся лик оте́ц, Твоя́ враги́ зело́ победи́, и соесте́ственна Тя Отцу́ и Ду́ху просла́ви.

Сла́ва Отцу́, и Сы́ну, и Свято́му Ду́ху.

Хода́тай был еси́, Бо́же и Челове́че, Бо́гу и челове́ком, Христе́, те́мже во двою́ Тя естеству́ еди́наго зна́юще Сы́на, богому́дрии пропове́даша.

И ны́не и при́сно, и во ве́ки веко́в. Ами́нь.

Ме́ртва мя показа́ сада́ вкуше́ние, жизнь же дре́во из Тебе́ я́вльшееся, Всечи́стая, воскреси́, и ра́йския сла́дости насле́дника мя показа́.

Катава́сия: Царю́ царе́й, Яковы́й от Якова́го еди́н Сло́ве произше́дый, от Отца́ безвино́внаго, равномо́щнаго Твоего́ Ду́ха апо́столом и́стинно посла́л еси́, я́ко Благоде́теля пою́щим: сла́ва держа́ве Твое́й, Го́споди.

Песнь 5

Канон воскресный. Глас 6.

Ирмо́с: Бо́жиим све́том Твои́м, Бла́же, у́треннюющих Ти ду́ши любо́вию озари́, молю́ся, Тя ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Сла́ва, Го́споди, свято́му Воскресе́нию Твоему́.

Уступа́ют мне херуви́ми ны́не, и пла́менное ору́жие, Влады́ко, плещи́ мне дае́т, Тя ви́девше, Сло́ве Бо́жий, и́стиннаго Бо́га, разбо́йнику путь сотво́ршаго в рай.

Сла́ва, Го́споди, свято́му Воскресе́нию Твоему́.

Не ктому́ бою́ся, е́же в зе́млю, Влады́ко Христе́, возвраще́ния, Ты бо от земли́ мя возве́л еси́ забве́нна, благоутро́бия ра́ди мно́гаго, к высоте́ нетле́ния воскресе́нием Твои́м.

Пресвята́я Богоро́дице, спаси́ нас.

И́же Богоро́дицу Тя от души́, Влады́чице ми́ра блага́я, испове́дающих спаси́, Тебе́ бо предста́тельство непобори́мое и́мамы, и́стинную Богороди́тельницу.

Канон Вознесения. Глас 5.

Сла́ва Тебе́, Бо́же наш, сла́ва Тебе́.

Испо́лнив весе́лия вся́ческая Ми́лостиве, к го́рним си́лам с пло́тию прише́л еси́.

Сла́ва Тебе́, Бо́же наш, сла́ва Тебе́.

А́нгельския си́лы взе́млема Тебе́ ви́девше, врата́, взыва́ху, Царю́ на́шему возьми́те.

Сла́ва Тебе́, Бо́же наш, сла́ва Тебе́.

Апо́столи ви́девше возвыша́ема Спа́са, с тре́петом взыва́ху Царю́ на́шему: сла́ва Тебе́.

Пресвята́я Богоро́дице, спаси́ нас.

Богородичен: Де́ву по рождестве́ пое́м Тя, Богоро́дице, Ты бо Бо́га Сло́ва пло́тию ми́рови родила́ еси́.

Канон отцев. Глас 6.

Святи́и отцы́, моли́те Бо́га о нас.

Кра́сны но́ги я́ко вои́стинну, ны́не пропове́дающих Тя мир всяк ум преиму́щий, всех а́нгелов и челове́ков, Христе́, и мно́жеством ми́ра мiр совокупля́ющий.

Святи́и отцы́, моли́те Бо́га о нас.

Прему́дрость, си́лу, О́тчее Сло́во ипоста́сное, Христе́, Тебе́ соше́дшеся пропове́даша, всесвята́го свяще́нства че́стно зако́ном печа́тавше, боже́ственнии учи́телие.

Сла́ва Отцу́, и Сы́ну, и Свято́му Ду́ху.

Вод струя́ми чи́стыми уче́ния, Правосла́вную Це́рковь напои́вшии, на вода́х поко́я ны́не наслажда́етеся ве́чно ра́дующеся.

И ны́не и при́сно, и во ве́ки веко́в. Ами́нь.

Све́щник Пречи́стая све́тлый, всем озаря́ющий Христа́, пра́вды Со́лнце, Тебе́ ве́дуще, еди́на Богороди́тельнице Чи́стая, Твое́ ны́не заступле́ние призыва́ем.

Катава́сия: Реши́тельное очище́ние грехо́в, огнедохнове́нную приими́те Ду́ха ро́су, о ча́да светообра́зная церко́вная. Ны́не от Сио́на бо изы́де зако́н, языкоогнеобра́зная Ду́ха благода́ть.

Песнь 6

Канон воскресный. Глас 6.

Ирмо́с: Жите́йское мо́ре, воздвиза́емое зря напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли живо́т мой, Многоми́лостиве.

Сла́ва, Го́споди, свято́му Воскресе́нию Твоему́.

Распина́емь, Влады́ко, гвоздьми́ у́бо, кля́тву ю́же на нас потреби́л еси́, копие́м же пробода́емь в ребро́, ада́мово рукописа́ние растерза́в, мир свободи́л еси́.

Сла́ва, Го́споди, свято́му Воскресе́нию Твоему́.

Ада́м низведе́ся, ле́стию запя́т быв, ко а́дове про́пасти, но и́же естество́м Бог же и ми́лостив, сшел еси́ на взыска́ние, и на ра́му поне́с, совоскреси́л еси́.

Пресвята́я Богоро́дице, спаси́ нас.

Пречи́стая Влады́чице, ро́ждшая челове́ком ко́рмчию Го́спода, страсте́й мои́х непостоя́нное и лю́тое утоли́ смуще́ние, и тишину́ пода́ждь се́рдцу моему́.

Канон Вознесения. Глас 5.

Сла́ва Тебе́, Бо́же наш, сла́ва Тебе́.

Взыгра́шася апо́столи, зря́ще на высоту́ днесь Зижди́теля взе́млема, упова́нием Ду́ха, и стра́хом зовя́ху: сла́ва восхо́ду Твоему́.

Сла́ва Тебе́, Бо́же наш, сла́ва Тебе́.

Предста́ша а́нгели, вопию́ще, Христе́, ученико́м Твои́м: и́мже о́бразом ви́десте Христа́ восходя́ща с пло́тию, па́ки прии́дет Пра́ведный всех Судия́.

Сла́ва Тебе́, Бо́же наш, сла́ва Тебе́.

Я́ко ви́деша Тя, Спа́се наш, небе́сныя си́лы, на высоту́ взе́млема с те́лом, взыва́ху, глаго́люще: вели́ко, Влады́ко, человеколю́бие Твое́.

Пресвята́я Богоро́дице, спаси́ нас.

Богородичен: Купину́ Тя неопали́мую и го́ру, и ле́ствицу одушевле́нную, и дверь небе́сную досто́йно сла́вим, Мари́е сла́вная, правосла́вных похвало́.

Канон отцев. Глас 6.

Святи́и отцы́, моли́те Бо́га о нас.

Утаи́тися не возмо́же пле́велов се́ятель, про́мысла неизрече́ннаго, неи́стовству тезоимени́т нарече́нный, Иу́де бо поревнова́в, я́коже он разсе́деся вселука́вый.

Святи́и отцы́, моли́те Бо́га о нас.

Боже́ственное собра́ние оте́ц честно́е, единоро́дное озаре́ние, от существа́ возсия́вшее О́тча, пропове́дует Тя, Влады́ко, и пре́жде всех век рожде́нна Сы́на.

Сла́ва Отцу́, и Сы́ну, и Свято́му Ду́ху.

Чре́во растерза́ется по словеси́, исто́чник му́тный и непи́тный ересе́й, источи́вший злочести́вых, ра́лом моли́твы свяще́нник боже́ственных промы́сленнее.

И ны́не и при́сно, и во ве́ки веко́в. Ами́нь.

Вели́кий преднаписа́ во проро́цех Моисе́й, Тебе́, ковче́г и трапе́зу, и све́щник, и ру́чку, обра́зно зна́менуя воплоще́ние Вы́шняго из Тебе́, Ма́ти Де́во.

Катава́сия: Очище́ние нам, Христе́, и спасе́ние, Влады́ко, возсия́л еси́ от Де́вы, да я́ко проро́ка от зве́ря морска́го пе́рсей Ио́ну, от тли исхити́ши всего́ Ада́ма всеро́дна па́дшаго.

Го́споди, поми́луй. Три́жды.

Сла́ва, и ны́не:

Конда́к отце́в, глас 8:

Апо́стол пропове́дание и оте́ц догма́ты Це́ркви еди́ну ве́ру запечатле́ша, я́же и ри́зу нося́щи и́стины, истка́ну от е́же свы́ше богосло́вия, исправля́ет и сла́вит благоче́стия вели́кое та́инство.

И́кос:

Высо́ким пропове́данием, Бо́жию Це́рковь услы́шим вопию́щу: жа́ждай да гряде́т ко мне и пие́т ча́шу, ю́же держу́, ча́ша есть прему́дрости, сие́ питие́ и́стины сло́вом почерпо́х, во́ду пролива́ющую не прекосло́вия, но испове́дания, ю́же пия́ ны́нешний Изра́иль, Бо́га зрит веща́юща: ви́дите, ви́дите, я́ко Сам Аз есмь, и не пременя́юся. Аз Бог пе́рвый, Аз же и по сих, и ра́зве Мене́ несть ино́го отню́д. Отсю́ду причаща́ющиися насы́тятся, и восхва́лят благоче́стия вели́кое та́инство.

Песнь 7

Канон воскресный. Глас 6.

Ирмо́с: Росода́тельну у́бо пещь соде́ла А́нгел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: благослове́н еси́, Бо́же оте́ц на́ших.

Сла́ва, Го́споди, свято́му Воскресе́нию Твоему́.

Рыда́ющее во стра́сти Твое́й со́лнце, во мрак облече́ся, и во дни по всей, Влады́ко, земли́ свет поме́рче, вопия́: благослове́н еси́, Бо́же оте́ц на́ших.

Сла́ва, Го́споди, свято́му Воскресе́нию Твоему́.

Облеко́шася, Христе́, схожде́нием Твои́м во свет преиспо́дняя, пра́отец же весе́лия испо́лнь, яви́ся ликовству́я, взыгра́ся, вопия́: благослове́н еси́, Бо́же оте́ц на́ших.

Пресвята́я Троице, Бо́же наш, сла́ва Тебе́.

Ца́рствующее и все́ми владя́щее Естество́ Триипоста́сное, бла́гости и безме́рныя пучи́ны свет пою́ще, возопии́м ве́рнии: благослове́н еси́, Бо́же оте́ц на́ших.

Канон Вознесения. Глас 5.

Сла́ва Тебе́, Бо́же наш, сла́ва Тебе́.

На о́блацех све́та вознесы́йся и спасы́й мир, благослове́н Бог оте́ц на́ших.

Сла́ва Тебе́, Бо́же наш, сла́ва Тебе́.

На ра́му, Спа́се, заблу́ждшее взем естество́, возне́сся, Бо́гу и Отцу́ приве́л еси́.

Сла́ва Тебе́, Бо́же наш, сла́ва Тебе́.

Возше́дый во пло́ти к безпло́тному Отцу́, благослове́н Бог оте́ц на́ших.

Сла́ва Тебе́, Бо́же наш, сла́ва Тебе́.

Умерщвле́ное на́ше грехо́м естество́ взем, Твоему́ сво́йственному Отцу́, Спа́се, приве́л еси́.

Пресвята́я Богоро́дице, спаси́ нас.

Богородичен: От Де́вы ро́ждься, Ю́же Богоро́дицу соде́лал еси́, благослове́н Бог оте́ц на́ших.

Канон отцев. Глас 6.

Святи́и отцы́, моли́те Бо́га о нас.

Победи́сте неи́стовству тезоимени́таго А́риа, неи́стовствовавшаго лю́те и глаго́лавшаго на высоту́ непра́ведная. Бо́жию бо Сы́ну отрече́ся вопи́ти: благослове́н еси́, Бо́же оте́ц на́ших.

Святи́и отцы́, моли́те Бо́га о нас.

Сы́на Гро́мова подража́юще чу́днии, Сло́ва Отцу́ собезнача́льна и единопресто́льна, огнезра́чными усты́ ва́шими всех научи́сте вопи́ти: благослове́н еси́, Бо́же оте́ц на́ших.

Сла́ва Отцу́, и Сы́ну, и Свято́му Ду́ху.

Я́ко крила́тии, Сло́ву помо́гшии, приидо́сте богоблаже́ннии, от коне́ц бо вселе́нныя собра́ вас Дух Святы́й вопи́ти: благослове́н еси́, Бо́же оте́ц на́ших.

И ны́не и при́сно, и во ве́ки веко́в. Ами́нь.

Ю́ноши три пещь не опали́, Рождество́ прообразу́ющия Твое́, Боже́ственный бо огнь Тебе́ не опали́в, всели́ся в Тя, и всех просвети́ вопи́ти: благослове́нна еси́, Бо́га пло́тию Поро́ждшая.

Катава́сия: Согла́сная возшуме́ орга́нская песнь, почита́ти златосотворе́нный безду́шный истука́н: Уте́шителева же светоно́сная благода́ть почеству́ет, е́же вопи́ти: Тро́ице Еди́ная, равноси́льная, безнача́льная, благослове́на еси́.

Песнь 8

Канон воскресный. Глас 6.

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́, вся бо твори́ши, Христе́, то́кмо е́же хоте́ти. Тя превозно́сим во вся ве́ки.

Сла́ва, Го́споди, свято́му Воскресе́нию Твоему́.

Иуде́йския дре́вле пророкоуби́йцы лю́ди, богоуби́йцы за́висть ны́не соде́ла, Тебе́ на крест возне́сшия, Сло́ве Бо́жий, Его́же превозно́сим во вся ве́ки.

Сла́ва, Го́споди, свято́му Воскресе́нию Твоему́.

Небе́снаго кру́га не оста́вил еси́, и во ад соше́д, всего́ совоздви́гл еси́ лежа́щаго во гно́ищи, Христе́, челове́ка, Тя превознося́ща во вся ве́ки.

Пресвята́я Богоро́дице, спаси́ нас.

От Све́та Светода́вца Сло́ва зачала́ еси́, и ро́ждши неизрече́нно Сего́, просла́вилася еси́, Дух бо в Тя, Отрокови́це, Бо́жий всели́ся. Те́мже Тя пое́м во вся ве́ки.

Канон Вознесения. Глас 5.

Сла́ва Тебе́, Бо́же наш, сла́ва Тебе́.

Во двою́ существу́ возлете́вшаго Жизнода́вца Христа́ на небеса́ со сла́вою, и Отцу́ соседя́щаго, свяще́нницы, по́йте, лю́дие, превозноси́те во вся ве́ки.

Сла́ва Тебе́, Бо́же наш, сла́ва Тебе́.

От рабо́ты и́дольския тварь изба́вившаго, и предста́вившаго ту свобо́дну Твоему́ Отцу́, Тебе́, Спа́се, пое́м, и Тебе́ превозно́сим во вся ве́ки.

Сла́ва Тебе́, Бо́же наш, сла́ва Тебе́.

Свои́м схожде́нием низложи́вшаго супоста́та, и Свои́м возше́ствием возне́сшаго челове́ки, свяще́нницы, по́йте, лю́дие, превозноси́те во вся ве́ки.

Пресвята́я Богоро́дице, спаси́ нас.

Богородичен: Херуви́мов превы́шшая яви́лася еси́, Богоро́дице Чи́стая, во чре́ве Твое́м си́ми Носи́маго носи́вшая, Его́же со безпло́тными, челове́цы, славосло́вим во вся ве́ки.

Канон отцев. Глас 6.

Святи́и отцы́, моли́те Бо́га о нас.

Просвети́вшеся луча́ми Твоего́ Божества́ блази́и Твои́ па́стырие, Тебе́ испове́даша бытию́ Соде́теля всех и Го́спода, Его́же превозно́сим во вся ве́ки.

Святи́и отцы́, моли́те Бо́га о нас.

Лик па́стырей приснопа́мятный собра́вся, богому́дренно Тро́ицу несозда́нную ны́не богосло́вя, всех учи́т вопи́ти: Тя превозно́сим во вся ве́ки.

Благослови́м Отца́, и Сы́на, и Свята́го Ду́ха, Го́спода.

Священнонача́льницы, па́стырие достосла́внии, Христо́ву Це́рковь просвеща́ют, ины́й и́нуду сию́ освеща́юще и превознося́ще во вся ве́ки.

И ны́не и при́сно, и во ве́ки веко́в. Ами́нь.

Та́йно во о́бразех предви́деша Тебе́ проро́цы вси, Сло́во, ро́ждшую, плоть бо из Тебе́ взе́мый, Сей про́йде сугу́б, Его́же превозно́сим во вся ве́ки.

Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Катава́сия: Разреша́ет у́зы, и ороша́ет пла́мень, трисве́тлый Богонача́лия О́браз, пою́т о́троцы, благослови́т же Еди́наго Спа́са и Вседе́теля, я́ко Благоде́теля сотворе́нная вся́ческая тварь.

Та́же пе́снь Богоро́дицы:

Вели́чит душа́ Моя́ Го́спода и возра́довася дух Мой о Бо́зе Спа́се Мое́м.

Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо, от ны́не ублажа́т Мя вси ро́ди.

Я́ко сотвори́ Мне вели́чие Си́льный, и свя́то и́мя Его́, и ми́лость Его́ в ро́ды родо́в боя́щимся Его́.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Низложи́ си́льныя со престо́л, и вознесе́ смире́нныя, а́лчущия испо́лни благ, и богатя́щияся отпусти́ тщи.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́ да́же до ве́ка.

Песнь 9

Канон воскресный. Глас 6.

Ирмо́с: Бо́га челове́ком не возмо́жно ви́дети, на Него́ же не сме́ют чи́ни А́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́ же велича́юще, с Небе́сными во́и Тя ублажа́ем.

⇐ Предыдущая 1 234 5 Следующая ⇒