Во время эпидемии

Во время эпидемии

Го́споди Бо́же наш, не вни́ди в суд с рабы́ Твои́ми¹, и огради́ нас от губи́тельнаго пове́трия на ны дви́жимаго. Пощади́ нас смире́нных и недосто́йных рабо́в Твои́х в покая́нии с те́плою² ве́рою и сокруше́нием серде́чным к Тебе́ милосе́рдному и благопремени́тельному³ Бо́гу на́шему припа́дающих и на ми́лость Твою́ упова́ющих.
Твое́ бо есть, е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.

Текст утверждён Патриархом Московским и всея Руси Кириллом в 2020 г.

Бо́же Вели́кий и Вы́шний, Благоутро́бный¹ и Человеколюби́вый Влады́ко, услы́ши нас недосто́йных рабо́в Твои́х, во мно́жестве ми́лости Твоея́ и низпосли́ нам по́мощь Твою́ во вре́мя наше́ствия боле́зни губи́тельныя на род челове́ческий, Твое́ю Кро́вию иску́пленный.
Ве́мы² Го́споди, яко согреши́хом пред Лице́м Твои́м и грехо́м на́шим несть числа́. Но умилосе́рдися и отврати́ от нас гнев Твой пра́ведный на ны дви́жимый. Не прогне́вайся на ны зело́³, Ты бо рекл еси́, яко ра́дость быва́ет на небеси́ о еди́ном гре́шнице ка́ющемся. Приими́ ны́не и на́ше покая́ние, сле́зы и смире́нныя моли́твы возноси́мыя из глубины́ серде́ц на́ших пред святы́м олтаре́м Твои́м.
О́тче щедро́т, Бо́же вся́кого утеше́ния, укрепи́ ны моли́твами Преблагослове́нныя Влады́чицы на́шея Богоро́дицы, си́лою Честна́го и Животворя́щего Креста́, свята́го великому́ченика и цели́теля Пантелеи́мона, святителя Луки, исповедника Кры́мскаго, святы́х враче́й и цели́телей на́ших: Агапи́та, Дамиа́на, Ипа́тия Пече́рских и Все́х святы́х земли́ на́шея и прекрати́ боле́зненное пове́трие⁴ и отжени́⁵ от нас вся́кую боле́знь и не́мощь, да изба́вльшеся от вся́кия напа́сти Руко́ю Твое́ю кре́пкою, порабо́таем Ти со вся́ким благодаре́нием. Да я́ко и ны́не причаща́ющеся Твоего́ неизглаго́ланнаго Человеколю́бия, пое́м и сла́вим Тя, Творя́щаго вели́кая и чу́дная, сла́вная же и изря́дная⁶.
Я́ко Ты еси́ Исто́чник исцеле́ний, Бо́же наш, и Тебе́ сла́ву возсыла́ем, Отцу́ и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Текст утвержден Блаженнейшим Онуфрием, Митрополитом Киевским и всея Украины в марте 2020 г.

Влады́ко, Го́споди Бо́же наш, при́зри¹ ми́лостивно с высоты́ святы́я сла́вы Твоея́ на моли́тву нас, гре́шных и недосто́йных рабо́в Твои́х, бесчи́сленными греха́ми и беззако́ниями на́шими Твою́ бла́гость прогне́вавших, и милосе́рдие Твое́ удали́вших.
Не вни́ди² в суд с раба́ми Твои́ми, но отврати́ стра́шный гнев Твой, пра́ведно на нас дви́жимый, укроти́ губи́тельное наказа́ние, удали́ стра́шный меч Твой, неви́димо нас поража́ющий. Пощади́ нас, гре́шных и недосто́йных рабо́в Твои́х, и не обрека́й на смерть ду́ши на́ша, и́бо мы зна́ем своя́ прегреше́ния и с сокруше́нным се́рдцем, и со слеза́ми к Тебе́, Милосе́рдному Бо́гу на́шему в покая́нии припа́даем и проще́ние согреше́ниям на́шим пода́ти про́сим.
Влады́ко, Вседержи́телю, Врачу́ душ и теле́с на́ших, смиря́яй и вознося́й, наказу́яй и па́ки³ исцеля́яй, простри́ мы́шцу⁴ Твою́ испо́лнену ми́лости и милосе́рдия, и исцели́ боля́щих, запрети́ дух́у не́мощи, отжени́⁵ вся́кую боле́знь на нас дви́жимую, прости́ нам вся́кое согреше́ние, во́льное же и нево́льное, и спаси́ ду́ши на́ша, я́ко Благ и Человеколю́бец. Ами́нь.

Из циркулярного письма митрополита Минского и Заславского Павла, Патриаршего Экзарха всея Беларуси от 17.03.2020

Го́споди Бо́же наш, ще́дрый ми́лостию, с попечи́тельной му́дростью управля́ющий на́шу жи́знь, услы́ши моли́тву на́шу, приими́ на́ше покая́ние во греха́х и положи́ сему́ пове́трию преде́л.
Ты, Врачу́ душ и теле́с, да́руй здра́вие тем, кого́ пости́г неду́г, восста́ви их вско́ре от одра́ страда́ния, да возмо́гут сла́вить Тебя́, о ми́лостивый Спа́се.
Сохрани́ от вся́кой боле́зни тех, кто пребыва́ет в до́бром здра́вии.
Сохрани́ и нас сами́х, Твои́х недосто́йных служи́телей, а та́кже на́ших роди́телей и на́ших бли́зких.
Благослови́, укрепи́ и сохрани́, Го́споди, Твое́ю благода́тию всех, кто с любо́вью к лю́дям и в ду́хе же́ртвования собо́й слу́жит больны́м в их дома́х и́ли в лече́бницах.
Удали́ вся́кую боле́знь и страда́ние от Твоего́ наро́да и научи́ нас цени́ть жи́знь и здра́вие как дары́, ниспо́сланные Тобо́ю.
Да́руй нам, Го́споди, мир Твой и испо́лни сердца́ на́ши несокруши́мой ве́рой в Твою́ защи́ту, упова́ния на Твою́ по́мощь, любви́ к Тебе́ и к на́шему бли́жнему.
Твое́ бо есть, е́же ми́ловати и спаса́ти нас, и Тебе́ сла́ву возсыла́ем со Безнача́льным Твои́м Отце́м и со Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в. Ами́нь.

Авторство Патриарха Румынского Даниила

Богородичен¹

Засту́пнице усе́рдная, Ма́ти Го́спода Вы́шняго, за всех мо́лиши Сы́на Твоего́ Христа́ Бо́га на́шего, и всем твори́ши спасти́ся, в держа́вный Твой покро́в прибега́ющим. Всех нас заступи́, о Госпоже́ Цари́це и Влады́чице, и́же в напа́стех и в ско́рбех, и в боле́знех обремене́нных грехи́ мно́гими, предстоя́щих и моля́щихся Тебе́ умиле́нною душе́ю и сокруше́нным се́рдцем, пред пречи́стым Твои́м о́бразом со слеза́ми, и невозвра́тно наде́жду иму́щих на Тя, избавле́ния всех зол, всем поле́зная да́руй, и вся спаси́, Богоро́дице Де́во: Ты бо еси́ Боже́ственный покро́в рабо́м Твои́м.