Аблязиз Велиевнинъ бедиий алеми

Аблязиз Велиевнинъ бедиий алеми

Дюнья дёне, дёне, дёне

Пек чокъ шейлер джоюлыр

Амма тек сёз къаладжакътыр,

Демек къаладжакъ омюр.

Аблязиз Велиев

2014 сенеси октябрь 25-те

языджы, Бекир Чобан-заде мукяфатынынъ лауреаты, Ватан, севги, гузелликнинъ лирик йырджысы Аблязиз Велиев 75 яшыны толдурды.

Ана юртум – азиз Къырым,

Меним дердим – сенсинъ Къырым.

Яткъанда тюшюнджем,

Юргенде тюшюнджем,

Къальбимде сырым,

Тойларда йырым,

Сенсинъ – ана Къырым,

Сенсинъ Ватан –Къырым.

А. Велиев

Аблязиз Велиев 1939 сенеси октябрь 25те Судакъ районынынъ Къоз коюнде догъды. Беш яшында экенде, халкъымызнен берабер, сюргюнликке огърады. О вакъытта бабасы дженкте эди. Андан къайтып кельмеди.

Аблязиз Велиевнинъ балалыкъ ве осьмюрликъ девири Озьбекистанда, Самаркъанд виляетининъ Каттакъургъан районында кечти.

Ташкент девлет университетининъ журналистика факультетини битирди.

А. Велиев 1962 сенесинден матбуатта чалышып башлады.1968 сенесинден башлап «Ленин байрагъы» газетанынъ месуль кятиби оларакъ чалышты.

1968-2008 сенесине къадар шу газетада(1991 сенеси – «Янъы дюнья» олды) сонъки 21 йыл девамында баш муаррир муавини олып чалышты.

1985-1987 сенелери «Йылдыз» меджмуасында месуль кятип олды.

Айны вакъытта иджатнен огърашты. Шаир ичюн Ватан дуйгъусы энъ инсаний, энъ мутебер дуйгъулардан биридир. Ватан онынъ ичюн Ана киби мукъаддес.

Къырым баари

Аджайип улькемиз бар,

Оны джандан севемиз.

Кузь,къыш,яз эм баари

Джыйыныкълы, тер-темиз.

Меним ичюн сен даим

Анам киби дюльберсинъ.

Азиз ана – Ватаным

Биз ичюн сен гуль ерсинъ.

1967 сенесинден берли языджынынъ шахсен озю язгъан 17, муэлифдешликте азырланылгъан 5,терджиме эткен 13 ве тертип этип чыкъаргъан 3 китабы дюнья юзю корьди.

Мелевше Балалар меджмуасы

«Янъы дюнья» газетасынынъ ичинде «Мелевше» адына джыйма китапчыкъ балалар ичюн нешир этильди. Бу кучюк китапчыкъта шаир озюнинъ окъуйыджыларына шиирлер, икяечиклер,масаллар,тапмаджалар,эфсанечиклер такъдым этер эди.

«Мераметли къырмыскъа» Биринджи къырымтатар тилиндеки мультфильм.

Мультфильм къырымтатар масалы сюжети эсасында япылды. Сценарийни Аблязиз Велиев азырлады. Музыкасыны Сервер Какура язды. Къараманларны къырымтатар театр актёрлары сеслендирдилер.

Июнь 26 куню –къырытатар миллий байрагъы куню.

Махсус бу байрамгъа багъышланып миллий байракъ гимны язылды .

«Меним байрагъым»-сёзлернинъ авторы Аблязиз Велиев, музыкасы Сервер Какуранынъ.

Къырымтатар тилинде чыкъкъан «Ха-ха-ха» сатирик меджмуасына 2001сенесинден берли муаррирлик япа.

А.Велиевнынъ иджадынынъ муим къысмыны весикъалы повестлер ве очерклер джыйынтыкълары тешкиль этелер

Эм языджы, эм терджиман, эр тарафтан истидатлы эрбабымыз, шакъасынен кульдюрген, шииринен дуйгъулаткъан, сёз усталыгъы ве терен бильгисен айретте къалдыргъан аджайип инсан Аблязиз Велиевни къырымтатар тилимизге ве эдебияткъа пек буюк иссе къошты.