Кондак 12. Молитва

Кондак 12

Благодатию возращая державу Русскую, Господь при начале сего посла тя, Илие, Своего ратоборца, дабы народ нов – Божие стяжание – от клеврет сатанинских ненаветны соблюсти, яко навыкнути православным, на Бога уповая, пети: Аллилуиа.

Икос 12

Поюще деяние жития твоего, воздаем хваление Вседержителю Богу, премудре о мире своем промышляющу, яко Той Сам Триедин, тако и Русь во образ единства Своего устрояя, лик угодников святых во охранение ея призва, в немже тя. Илию, предивнаго воеводу, славящее, верни вопиют: Радуйся, Святыя Троица служителю в житии и по преставлении твоем явивыйся; радуйся, яко трие персты руки твоея, для знамения крестного сложенныя, тако доселе пребывают. Радуйся, яко сим чудом мнози сумнящиися веру правую обретают; радуйся, и по преставлении своем чудеса творити не престающий. Радуйся, и по кончине, в смертнем телеси, Господа прославляющий; радуйся, в нетлении мощей доселе почивающий.

Радуйся, преподобне отче Илие, земли Русския славный заступниче.

Кондак 13

О, святый отче Илие, воине духовный и телесный, ратниче на враги видимыя и невидимыя, защити ныне Отечествие наше – Русь Святую, еже есть подножие Престола Господня, и Церковь Русскую Православную заступи, поют людие память твою, и Господу даровавшему Руси заступника сицеваго, славословие приносят песнию: Аллилуиа.

Сей кондак чтется трижды, затем Икос 1 и Кондак 1

Молитва

О святый преподобный отче Илие! Руси святой заступниче, могучий ратоборче, воине духовный и телесный ей явивыйся, в житии своем благу народа Русскаго и прославлению Бога Христианского верно послуживый, и по преставлении своем предстательства своего о нас не оставивый, испроси, святе, у Всемилостиваго Господа Отечеству нашему мир и благоденствие, Церкви – благоустроение, людем православным от нечестивых избавление, воином русским в ратех победу, и на врагов одоление.

Еще же просим тя, святче Божий, разум нам от Бога ниспосли, силу духовную и крепость телесную, да возмощи на житие покаянием исправити и Русь Святую возродити, и в Царствие Небесное из нея прейти, да тамо с тобою и всеми святыми сподобитися непрестанно восхваляти в Троице славимаго Бога Отца и Сыны и Святаго Духа во веки веков. Аминь.

⇐ Предыдущая 1 2 3 4 56